Bafilipi 3

Zyabululami bwini-bwini

¹ Alimwi, nobakwesu, ndati amusekele mu Mwami. Kumulembela zintu zindakamulembelede kale takundilemyi pe, alimwi kulindinywe cilagwasya. ² Amubacenjelele aabo basofweede mbuli babwa, bacita zibi, aabo bapalula buyo mubili. ³ Nkaambo swebo ndiswe bapalule beni-beni, notusolwedwa a Muuya mukukomba Leza. Tulalikankaizya nkaambo ka Kilisito Jesu, tatusyomi zyabuntunsi pe. ⁴ Takuli kuti mebo ndabula ncesyoma kuti ndikankaizye. Kuti naa kuli muntu uuyeeya kuti ulijisi zintu zili boobo zyakulikankaizya mebo ndamwiinda. ⁵ Nindakazyalwa, ndakapalulwa mubuzuba bwalusele. Ndimusyobo wa Isilayeli, wamusyobo wa Benjamini. Ndi Muhibulu wa Bahibulu. Kwaamba zya Mulawo wa Bajuda, ndakali Mufalisi. ⁶ Ndakali munkutwe cakuti ndakapenzya mbungano. Kwaamba zyabululami buzwa ku Mulawo bantu bakandibona kuti ndinyina kapa.

⁷ Pele nkaambo ka Kilisito zyoonse nzindakali kuyeeyela kuti nzyampindu, sunu ndazibona kuti nzyabuyo. ⁸ Ncobeni, zintu zyoonse ndaziziba kuti nzyabuyo nkaambo kampindu mpati njelaayo mukuziba kuti Jesu Kilisito Mmwami wangu. Nkaambo kanguwe ndasiya zyoonse akuzibona mbuli zifuse mukuti ndijane Kilisito, ⁹ akujanika mulinguwe. Nsilibikki kuti ndimululami mukubamba Mulawo, pele bululami bwangu buzwa mukusyoma Kilisito, bululami oobu buzwa kuli Leza alimwi bulakwabililwa alusyomo. ¹⁰ Ncendiyanda ncakuti ndizibe Kilisito anguzu zyakamubusya. Ndimvwe mapenzi aakwe akuba mbuli nguwe mulufu lwakwe, ¹¹ kuti ndacita boobo nkajane buumi mububuke bwabafu.

Zyakutijaana kuya kumpa

¹² Takuli kwaamba kuti ndatambula kale eezi naa kuti mebo ndililondokede kale, pele ndazuzaana kuti nkajate zintu eezi nkaambo Kilisito Jesu wakandijata kuti mbe wakwe. ¹³ Nobakwesu, nsiyeeyi kuti ndazijana kale pe. Pele cintu comwe ncecita nceeci, ndasiya zyoonse zili musule, ndidunamina buyo zintu zili kumbele. ¹⁴ Aboobo ndizuzaanina kumpa iili kumbele, kuti nkajane bulumbu bwakujulu mbwatwiitila Leza muli Kilisito Jesu.

¹⁵ Lino swebo toonse notusimide kale tweelede kuyeeya zeezyo. Kuti naa kuli umwi uuyeeya bumbi, Leza ulamuyubunwida eezyo. ¹⁶ Nikuba buti, atujatisye eezyo nzitwakajana kale.

¹⁷ Nobakwesu, amwiiye ndime, alimwi amutobele aabo beenda munzila njitwakamwiisya. ¹⁸ Lyoonse ndilamwaambila, alino ndiyanda kwiinduluka cakulila, kuti nkobali banji batondezya mubuumi bwabo kuti mbaasinkondonyina akukambauka kwakuti Kilisito wakatufwida aciingano. ¹⁹ Kumamanino bayoonyonyoonwa nkaambo leza wabo nzintu zibotya mubili. Balisumpwida zeezyo nzibakeelede kufwida nsoni. Mizeezo yabo iili aazintu zyabuntunsi. ²⁰ Pele swebo munzi wesu uli kujulu, nkabela Mufutuli ngotulindila uyoozwida nkuko. Ooyo ngo Mwami Jesu Kilisito, ²¹ uyoosandula mibili yesu yabuntunsi kuti ikabe mbuli mubili wakwe wabulemu, kwiindila munguzu zikonzya kuzunda zintu zyoonse kuti azilele.