Bafilipi 2
Zyakulibombya kwa Kilisito akusumpulwa kwakwe
1 Mwayumizigwa nkaambo muli omwe a Kilisito alimwi luyando lwakwe lwamuumbulizya. Muuya Uusalala wamuswaanganya, nkaako mulijisi lubomba ankumbu kuli umwi aumwi. 2 Aboobo ndamulomba kuti mundikkomanisye kapati mukumvwana amukukamantana caluyando. Mucite eezi camoyo amuzeezo omwe. 3 Mutaciti cintu niciba comwe cakulikankaizya nikuba kulisumpula, pele amulibombye, muntu amuntu ayeeye kuti beenzinyina balamwiinda. 4 Tamweelede kuyeeya zimugwasya nobeni buyo pe, pele umwi aumwi uleelede kugwasya mweenzinyina. 5 Amube aamoyo uuli mbuli yooyo wakajisi Kilisito Jesu.
6 Walo wakali aabube bwa Leza,
pele taakayeeya kuti alikakatizye kuba mbuli Leza.
7 Pele wakalibombya kwiindilila naakabweza ciimo camuzike
akuba muntu mbuli bantu boonse.
8 Eelyo naakaba muntu boobo,
wakalibombya akuswiilila kusikila kulufu,
iiyi, lufu lwaciingano.
9 Nkankakaako Leza ncaakamusumpula kwiindilila
akumupa zina bbotu kwiinda mazina oonse.
10 Wakacita oobo kuti boonse bakujulu, aansi akunsi anyika,
bafugamine akulemeka zina lya Kilisito.
11 Nkabela boonse bayooamba kuti Jesu
Kilisito Mwami mukulemeka Leza Taata.
Bakilisito bamweke mbuli mimuni
12 Lino nobayandwa bangu, mbubonya mbuli mbumwakali kuswiilila nindakali aandinywe, lino amuswiilisisye ciindi nentali aandinywe. Aboobo amwiindilizye kubeleka cakuyoowa akuzyangama kweendelana alufutuko lwanu. 13 Nkaambo ngu Leza uubeleka mulindinywe kuti muyande akucita eezyo zimubotela.
14 Amucite zintu zyoonze cakutatongooka nikuba kukazyanya, 15 kutegwa mubule kampenda, mulondoke mbuli bana ba Leza batakwe kapa akati kabantu bapilingene balubizya beenzinyina. Akati kabantu bali boobo mulamweka mbuli mimuni iili mujulu 16 mukubapa majwi aabuumi cakuti njooba aacakulisumpwida ciindi Kilisito aakuboola alimwi. Ndendilyo nikuyoozibika kuti nsindaazuzaanina cabuyo naa kubeleka abunkutwe cabuyo. 17 Ambweni bulowa bwangu buyootilwa mbuli cipaizyo cipegwa alusyomo lwanu kuli Leza. Kuti naa kacili boobo ndilakondwa akusekelela andinywe nyoonse. 18 Mbubonya buyo oobo nywebo muleelede kukondwa akusekelelela andime.
Zya Timoti a Epafuloditasi
19 Mwami Jesu ayanda ndilafwambaana kumutumina Timoti, kuti moyo wangu uzookkale ndazoomvwa zyandinywe. 20 Ndinyina uumbi uuli mbuli nguwe uuyeeyesya zyandinywe pe. 21 Bamwi bayanda buyo kuligwasya lwabo beni, tabayeeyi makani aa Kilisito Jesu pe. 22 Pele mulizi kuti bukkale bwa Timoti bwaboneka kale kuti mbubotu. Mbubonya mbuli mwana mbwabeleka awisi, awalo wabeleka andime kugwasya milimo ya Makani Mabotu. 23 Aboobo ndisyoma kuti ndilamutuma kufwambaana, ndaziba mbozitindibede zintu. 24 Pele ndasyoma kuti, Mwami ayanda, ndizoofwambaana kusika lwangu ndemwini.
25 Lino ndayeeya kuti kuleelede kumuboozezya Epafuloditasi mukwesu similimoma alimwi ngusilumambama. Mwakamutuma kuti andigwasye. 26 Lino ulamuyeeya nyoonse alimwi ulipengede mumoyo nkaambo mwakamvwa kuti wakali kuciswa. 27 Ncobeni wakali kuciswa kapati kayanda kufwa. Pele Leza wakamubeda aalweengelelo, kutali nguwe buyo pele andime, mukuti intayungizilwi mapenzi atala lyayaayo ngejisi kale. 28 Nkankakaako nceyanda kumubweedezya cakufwambaana kuti mwamubona mukkomane alimwi akuti kulibilika kwangu kuceye. 29 Aboobo amumutambule alukondo lupati mbuli munyoko mu Mwami, bantu bali mbuli nguwe beelede kulemekwa. 30 Wakali aafwiifwi kufwa akaambo kamilimo ya Kilisito. Wakasanga buumi bwakwe kuti amanizye milimo eeyo yakundigwasya njomwakali kundiyandila.