Baefeso 6

Zyabana abazyali

¹ Nobana, amuswiilile bazyali banu mu Mwami, nkaambo kucita boobu cililuleme. ² Nkaambo Majwi aa Leza alati, “Lemeka uso abanyoko.” (Ooyu ngo mulawo mutaanzi uujisi cisyomezyo.) ³ “Wacita boobo, ulalelekwa, alimwi uloongola munyika.”

⁴ Anywebo nomawisi, mutanookalalili akunyemya bana banu cabuyo, pele amubalele mukubaiisya akubalailila munzila ya Mwami.

Zyabazike abasimalelo babo

⁵ Nobazike, kamubaswiilila basimalelo banu baansi aano, cakubalemeka akubapa bulemu amoyo omwe, mbubonya mbomunga mulabelekela Kilisito. ⁶ Citabi buyo cipa meso mbuli kuti muyanda kubotezya buyo bantu. Pele mbuli babelesi ba Kilisito, mubamanine milimo amoyo omwe oobo mbwayanda Leza. ⁷ Amubabelekele calumwemwe, mbuli kuti mubelekela Mwami, kutali bantu buyo. ⁸ Mulizi kuti kufumbwa cibotu ncacita muntu, uyootambula bulumbu ku Mwami nkaambo kancico, naba muzike naba muzyale.

⁹ Anywebo nobasimalelo, mubacitile mbubonya bazike banu. Mutali kubakongi pe. Mulizi kuti balo andinywe mulijisi simalelo omwe uuli kujulu, walo uutajisi lusalululo.

Zilwanyo Leza nzyapa

¹⁰ Kumanizya ndati, amuyume mu Mwami amunguzu zyakwe zipati. ¹¹ Amubweze zilwanyo zyoonse zya Leza, kutegwa mukakonzye kukazya bucenjezu bwa Saatani. ¹² Nkaambo nkondo yesu tiili yakulwana aabantu pe, pele njakulwana abasibwami, abasinguzu, abeendelezi bamudima waansi ano, alimwi amyuuya mibi minji-minji yamujulu. ¹³ Nkaambo kaako amubweze zilwanyo zyoonse zya Leza, kutegwa mukakonzye kuzuunyana mubuzuba bubyaabi, mwaakumanizya muya kwiima.

¹⁴ Amuyume, mulyaange bwini mbuli lutambo mucibuno. Amusame bululami mbuli kabaki kalubulo acamba. ¹⁵ Amulibambilile kukambauka Makani Mabotu aapa luumuno mbuli kuti mwasama ndyasyo. ¹⁶ Kwiinda zyoonse amube aalusyomo, alube ntobo yanu, njomukonzya kuzimya mivwi iiyaka mulilo iifuswa a Mubi. ¹⁷ Lufutuko ndomujisi lube mbuli ngowani iimukwabilila. Amubelesye majwi aa Leza aali ndepanga limupa Muuya Uusalala. ¹⁸ Amukombe ciindi aciindi kamusolwedwa a Muuya Uusalala. Amupaile kuli Leza ankombyo ziindene-indene. Amupakamane kukombela bantu ba Leza, mutaleki pe. ¹⁹ Amundikombele ambebo kuti Leza andipe majwi nekambaukila bantu maseseke aali mu Makani Mabotu. ²⁰ Nikuba kuti ndili muntolongo, pele ndi mutumwa wa Makani Mabotu. Amundikombele kuti ndaaambe cabusicamba mbuli mbweelede.

Kujuzya kwamamanino

²¹ Tikikasi, mukwesu uuyandika uzoomwaambila zintu zyoonse, mbuli mbwepona ancendicita. Ooyu ngusimulimo uusyomeka wa Mwami. ²² Nkakaambo aako ncindamutumina kulindinywe, kuti azoomwaambile mbotupona akuti azoomuyumye.

²³ Leza Taata a Mwami Jesu Kilisito amupe luumuno, luyando, alusyomo, nobakwesu. ²⁴ Leza ababede aaluse boonse bayanda Mwami wesu Jesu Kilisito aluyando lutamani.