Baefeso 3
Mulimo wa Paulu kuli bamasi
1 Nkankakaako mebo, nde Paulu mwaange akaambo ka Kilisito Jesu ncindati mmubelekele nywebo nobamasi, 2 ndikasimpe kuti mwakamvwa kuti Leza wakandipa mulimo wakukambauka kulindinywe zyaluse lwakwe. 3 Wakandiyubunwida maseseke aakwe, mbuli mbwindakamulembelede buniini buyo. 4 Nkabela ciindi nimubala mulakonzya kubona luzibo ndwejisi lwakumvwisya makani aasisidwe aa Kilisito. 5 Maseseke aaya taakazizilwe abasikale mbuli Leza mbwaayubununa a Muuya Uusalala kubatumwa abasinsimi bakwe basalala. 6 Maseseke aaya ngakuti kwiindila mu Makani Mabotu bamasi abalo baleelede kukona zya Leza mbuli Bajuda. Antoomwe a Bajuda baba zizo zyamubili omwe, alimwi muli Kilisito Jesu balatambula cisyomezyo ca Leza.
7 Muluse lwakwe Leza wakandipa mulimo wakukambauka Makani Mabotu aaya. Eelyo naakacita boobo wakatondezya nguzu zyakwe. 8 Mubantu ba Leza ndime muniini kwiindilila, nikuba boobo Leza wakandipa mulimo wakukambaukila bamasi Makani Mabotu aalubono lutaambiki Leza ndwatupede muli Kilisito. 9 Wakandipa mulimo wakupandulwida bantu boonse muzeezo wazintu eezyo zisisidwe. Leza wakalenga zyoonse nguwakabamba maseseke aaya kuzwa lili. 10 Lino kwiindila mumbungano baleli abeendelezi bamujulu bazibe busongo bwa Leza bunji kapati. 11 Leza wakacita eezi kuti zicitike ncobeni muli Kilisito Jesu Mwami wesu nzyaakabamba ciindi kacitanatalika. 12 Nkaambo tulasyoma Kilisito, tulakonzya kuza kuli Leza cabusicamba akutadonaika. 13 Aboobo ndamukumbila kuti mutatyompwi nkaambo kamapenzi ngendimupengela, aali mbobulemu bwanu.
Luyando lwa Kilisito
14 Nkaambo kaako ndilavuntama kuli Taata, 15 kuzwa kulinguwe mukwasyi oonse uuli mujulu auli aansi ulaitwa azina lyakwe. 16 Ndakumbila kuli Leza mukweendelana abulemu bwakwe bupati kuti ayumye canguzu moyo wanu mupya kwiindila mu Muuya wakwe. 17 Ndakumbila kuti kwiindila mulusyomo Kilisito akkale mumyoyo yanu. Ndakumbila kuti nywebo muzyatile akwiima muluyando, 18 kuti mukonzye kumvwisya antoomwe abasyomi boonse bwaamba, bulamfu bwakuya mujulu, abulamfu bwakuya ansi, bwaluyando lwa Kilisito. 19 Muzibe luyando lwa Kilisito lutazibiki kuti Leza akkale mulindinywe buzwide.
20 Lino bulemu bube kuli Leza, walo munguzu zyakwe zibeleka mulindiswe, ulakonzya kucita kwiinda mbuli nzyotukumbila naa nzyotuyeeya. 21 Mbungano imulemeke muli Kilisito Jesu mumazyalani oonse, mane kukabe kutamani. Akube boobo.