Babetesi 9

Abimeleki

¹ Lino Abimeleki mwanaa Gidiyoni wakainka ku Syekemu ooko kwakali kukkala bamukowa wakwe abanyina. Wakabaambila kuti, ² bababuzye baku Syekemu kuti, “Muyeeya buti? Sena muyanda kulelwa abana ba Gidiyoni boonse bali makumi aali ciloba naa kulelwa amuntu omwe buyo? Tee mulizi kuti mebo ndiwanu?” ³ Lino banzubo zyabanyina bakaambaula makani aaya kubantu baku Syekemu. Mpawo bakayanda kutobela Abimeleki nkaambo wakali wabo. ⁴ Bakamupa mali aansiliva aali makumi aali ciloba ngobakagwisya kukaanda ka Baalibeliti. Mali aaya wakaabbadela bafumpi bamwi kuti bamutobele. ⁵ Wakaya kuŋanda yawisi ku Ofula. Naakaakusika wakajaya bana bokwabo boonse bakali makumi aali ciloba abbwe lyomwe. Pele Jotamu wakali keela, wakayuba. ⁶ Eelyo baku Syekemu aku Betimilo bakabungana antoomwe akuunka kumusamu uulya munsi aamutuni ku Syekemu, ooko Abimeleki bakamubikka bwami.

⁷ Lino Jotamu naakamvwa cakacitika, wakaakwiima atala aacilundu ca Gelizimu akoompolola kati, “Amuteelele nywebo nobantu baku Syekemu kuti Leza amuswiilile anywebo. ⁸ ‘Kaindi kaindi zisamu zyakabungana kuti zisale mwami wazyo.’ Zyakati ku muoliva, ‘Koba mwami wesu.’” ⁹ Walo muoliva wakaingula kuti, “Ma inga ndaleka buti kugwisya mafuta aakulemeka baleza abantu kuti ndilele zisamu?” ¹⁰ Lino zisamu zyakaambila mukuyu kuti. “Koba nduwe mwami wesu.” ¹¹ Pele walo mukuya wakaingula kuti, “Ma inga ndaleka buti kuzyala micelo mibotu iinona kuti ndilele zisamu?” ¹² Kuzwa waawo zisamu zyakati kumusaansa, “Koba nduwe mwami wesu.” ¹³ Pele walo musaansa wakaingula kuti, “Ma, inga ndaleka buti kuzyala nsaansa zipa waini uubotezya baleza abantu kuti ndilele zisamu?” ¹⁴ Kumane zisamu zyakati kumutuluzyamalumba, “Ambweni ube nduwe mwami wesu.” ¹⁵ Walo mutuluzyamalumba wakati, “Kuti kamuyandisya ncobeni kuti mbe mwami wanu, amuboole muyuse mucimvule cangu. Kuti pe, kulazwa mulilo mumitabi yangu akuumpa milombe yaku Lebanoni!”

¹⁶ Jotamu wakaindilizya akuti, “Ngangayaayo. Sena mwakacita ciluleme cakusyomeka nimwakabikka Abimeleki kuba mwami wanu? Sena wakacitila cibotu Gidiyoni amukwasyi wakwe mbuli bwakeelede milimo yakwe? ¹⁷ Amuyeeye kuti nguwakamulwanina. Wakabikka buumi bwakwe muntenda yalufu mukuvuna ndinywe ku Bamidiyani. ¹⁸ Pele sunu mwafutatila mukwasyi wakwe. Mwajaya bana bakwe bali makumi aali ciloba abbwe lyomwe. Mwapa bwami kuli Abimeleki mwanaa mukaintu muzike kuti abe mwami waku Syekemu nkaambo ngusiluzubonyoko. ¹⁹ Aboobo, kuti kamuyeeya kuti ncimwacitila Gidiyoni amukwasyi wakwe sunu ncibotu, cililuleme, amubotelwe a Abimeleki awalo abotelwe andinywe. ²⁰ Pele kuti pe, mulilo uvutuke kuzwa kuli Abimeleki akuumpa Basyekemu boonse abaku Betimilo. Nikuba kuti kuvutuke mulilo kuzwa ku Syekemu a Betimilo utuumpe Abimeleki.” ²¹ Mpoonya Jotamu wakatija, waakukkala ku Biya nkaambo wakayoowa mupati wakwe Abimeleki.

²² Lino Abimeleki wakalela mu Isilayeli kwamyaka yotatwe. ²³ Kumane Leza wakazwanganya Abimeleki abaku Syekemu, eelyo bakamubukila. ²⁴ Leza wakacita oobo kuti asubule Abimeleki akaambo kakujaya bana ba Gidiyoni bakali makumi aali ciloba a Basyekemu bakamugwasya. ²⁵ Basyekemu bakabikka bamwi bakali kukkalilila Abimeleki azilundu. Aaba bakali kubbida kufumbwa wainda. Eelyo Abimeleki wakaambilwa zya zeezi.

²⁶ Lino Gaali mwana wa Ebedi wakasika ku Syekemu abana bokwabo, eelyo baku Syekemu bakamusyoma. ²⁷ Bakali kuunka mumyuunda kabacela nsaansa akukumba waini. Bakacita pobwe, baya kukaanda ka leza wabo. Ooko bakali kulya akunywa kabaseka Abimeleki calweeno. ²⁸ Gaali wakati, “Ino Abimeleki nguni ngotutobela, mbuli ndiswe notuli mu Syekemu? Tee mwanaa Gidiyoni buyo, Zebulu ngumutobela, Ino swebo tweelede kumutobelela nzi? Amutobele sikale wanu Hamo, mupati waciinga canu. ²⁹ Nkeli ndime eensololela bantu aaba nikwali kunga ndakamutanda kaindi Abimeleki! Nindakamwaambila kuti, ‘Nkoo bunganya mpi yako mpati uboole, tulwane!’”

³⁰ Ciindi Zebuluni muleli wamunzi ooyo naakamvwa zyakaamba Gaali wakanyema. ³¹ Wakatumya nkombe kuli Abimeleki ku Aluma yakumucenjezya kuti, “Gaali mwana wa Ebedi abanabokwabo nkobali ku Syekemu, bapyopyonganya bantu kuti bakubukile.” ³² Aboobo yebo abantu bako mweelede kweenda masiku kamuyubila mumyuunda. ³³ Ufume juunza aapolela zuba muzoozinguluke munzi akuulwana. Ciindi Gaali abantu bakwe baakuti bazwe mukabapwayaule mbomukonzya.

³⁴ Nkaako Abimeleki abantu boonse mbaakali aabo bakeenda masiku akulizandaula mutubunga tone anze aamunzi wa Syekemu. ³⁵ Gaali wakaza kumulyango wamunzi. Abimeleki wakayubunuka mpaakalisiside abantu bakwe. ³⁶ Gaali naakababona wakaambila Zebulu kuti, “Langa! Mbabaya bantu balaselemuka kuzwa azilundu.” Zebulu wakati, “Eziya nzimvule buyo zyamalundu, tabali bantu pe.” ³⁷ Gaali wakaindulula alimwi kati, “Langa ii! Mbaabaya bantu balaselemuka kuzwa azilundu. Bamwi bazwida kusamu lya musondi.” ³⁸ Mpoonya Zebulu wakati, “Kocaamba we mbocita lyoonse! Tee nduwe wakali kutwaambila kuti tumutobelela nzi Abimeleki. Mbaaba mbookali kunyansya, balwane we, tukubone!”

³⁹ Mpawo Gaali wakasolweda baku Syekemu kuti balwane Abimeleki. ⁴⁰ Abimeleki wakalulama Gaali, Gaali abone boobo wakatija. Bantu banji ba Gaali bakacisigwa, kubikkilizya a bakali amulyango mupati wa munzi. ⁴¹ Abimeleki wakajokela ku Aluma, Zebulu wakatanda Gaali abana bokwabo boonse, wakabakasya kukkala mumunzi wa Syekemu.

⁴² Nibwakaca bantu baku Syekemu bakapangana kuti baye mumyuunda. Amvwe boobo, Abimeleki wakaza, ⁴³ wakazandula bantu bakwe mutubunga totatwe mumyuunda, wakatalika kulwana bali mumyuunda. ⁴⁴ Abimeleki ampi imwi bakaakukkalilila amulyango mupati wa munzi. Impi zimwi zyobilo zyakali kujaya baabo bakali mumyuunda. ⁴⁵ Buzuba oobo lyakamubbilila Abimeleki kalwana bantu bamumunzi ooyo. Wakazunda akubajaya bantu boonse wakamwaya maanda oonse. Amane wakasansaila munyo alinguwo.

⁴⁶ Ciindi bantu baku ŋanda ndamfu yaku Syekemu nibakamvwa nzyaakacitika bakainka kucikwabililo ca kaanda ka Baalibeliti baakuyubila nkuko. ⁴⁷ Nkabela Abimeleki wakaambilwa kuti bakalibungene ooko. ⁴⁸ Wakatanta mulundu wa Zalumune abantu bakwe wagonka lukuni, akulubikka aciwezo. Wakaambila bantu bakwe kuti bafwambaane kucita mbubonya. ⁴⁹ Bakacita mbubonya, bakamutobela Abimeleki, bakalundika nkuni bakunka mulilo. Boonse baku Syekemu bakali mumo bakafwa, kubikkilizya abakaintu bakali cuulu comwe.

⁵⁰ Kuzwa waawo Abimeleki wakainka ku Tebezi wakuuzinguluka munzi ooyo alimwi akuuzunda. ⁵¹ Kwakali ŋanda ndamfu yakali njumu mumunzi ooyo, baalumi abakaintu boonse bakatijila mumo. Bakalipingila mukati akuyookkalila kuciluli. ⁵² Abimeleki naakasika wakainka kumulyango waŋanda eeyi mpoonya wakadomeka mulilo. ⁵³ Pele mukaintu umwi wakalosya nkando amutwe wa Abimeleki akumwaandula. ⁵⁴ Mpoonya aawo Abimeleki wakaita mulombe uubweza zibelesyo zyakwe akumwaambila kuti, “Gwisya panga lyako undijaye, mukuti inga balaba nobati wakajaigwa aamukaintu.” Mpoonya mulombe ooyo wakamuyasa, wafwa. ⁵⁵ Ciindi Baisilayeli nibakabona kuti wafwa Abimeleki, boonse bakajokela kuminzi yabo.

⁵⁶ Mbombuboobu Leza mbwaakabweedezya bubi bwa Abimeleki mbwaakacita kuli wisi naakajaya bana bokwabo bali makumi aali ciloba. ⁵⁷ Alimwi Leza wakabweedezya bubi bwabantu baku Syekemu mbubonya mbuli Jotamu mwanaa Gidiyoni mbwaakaambide ciindi naakabasinganya.