Babetesi 8
Bamidiyani bakakomenwa limwi
1 Baefulemu bakatongookela Gidiyoni bati, “Ino tookatwiitila nzi ciindi nookaakulwana Bamidiyani? Wakacitila nzi boobo?” Bakatongooka kapati mumakani aaya. 2 Walo wakaingula kuti, “Ncindakacita ncisyoonto kwiinda ncomwakacita nywebo. Tamubwene kuti kuvulula kwa Baefulemu nkupati kwiinda kutebula kwa Baabiyeza boonse? 3 Kayi Leza wakaaba kulindinywe bami Bamidiyani ba Olebu a Zebu. Ani mebo ndakacita nzi ciinda ceeci?” Abaambile buyo boobu bakatontomena.
4 Gidiyoni abantu baya bali myaanda yotatwe bakasika kumulonga wa Jolodani akuuzubuka. Bakalikatede, pele taakwe nibakaleka kutandila Bamidiyani. 5 Nibakasika ku Sukkoti, Gidiyoni wakaambila bantu aabo kuti, “Amundaabilile bantu bangu cinkwa. Bakatala, tutandila Zeba a Zalumuna bami Bamidiyani.”
6 Mpoonya bapati ba Sukkoti bakakaka akuti, “Nkaambo nzi ncotweelede kusanina mpi yako kotana mujata Zeba a Zalumuna?”
7 Mpawo Gidiyoni wakati, “Mbubo! Mwami Leza waakundipa Zeba a Zalumuna, nzoomukwabbauzya mamvwa! 8 Gidiyoni wakaya ku Penuweli akwalo ooko wakakumbila cakulya kubantu, pele bantu baku Penuweli bakamwiingula mbubonya mbuli baku Sukkoti. 9 Abalo wakabaambila kuti, ‘Ndaakumana kuzunda njooboola nzoowisye ŋanda ndamfu eeyi!’”
10 Ciindi eeco Zeba a Zalumuna bakali ku Kkaako ampi zyabo bakali buyo zyuulu zili kkumi azisanu, nkaambo bali zyuulu zili makumi obilo bakajaigwa. 11 Gidiyoni wakatola mugwagwa wakali kubembeleka nkanda, kujwe lya Noba a Jogubeha. Akababone buyo wakabavumpa. 12 Bami ba Midiyani bobilo ba Zeba a Zalumuna bakatija, pele wakabatanda, wabajata. Nkaako impi yabo yoonse yakanyongana akumwaika.
13 Gidiyoni mwanaa Jowasyi wakapiluka kuzwa ku nkondo wazooinda amumpata wa Helezi. 14 Ooko nkwaakaakujata mulombe waku Sukkoti ngwaakabuzya. Mulombe ooyo wakalembela Gidiyoni mazina abapati baku Sukkoti bali makumi ciloba aciloba. 15 Mpoonya Gidiyoni wakaya ku Basukkoti, akubaambila kuti, “Ati muliyeeyede nimwakati ba Zeba a Zalumuna bali kuli kuti tukupe cinkwa? Ani, mbaani aaba?” 16 Amane wakakwapula tusanzu twamamvwa, wakwabbaula bapati aabo baku Sukkoti. 17 Azwe waawo wakaya ku Penuweli, waakukolomona ŋanda ndamfu iilya akujaya baalumi mumunzi ooyo.
18 Mpoonya wakabuzya ba Zeba a Zalumuna kuti, “Bantu mbumwakajaya ku Taboo bakali kulangika buti?” Bakamwiingula kuti, “Mbuli nduwe, yebo oboneka mbuli mwanaa mwami.”
19 Gidiyoni wakati, “Mwaamba kabotu bakali bana bokwesu bana ba baama. Ndakonkezya muzina lya Mwami Leza kuti nimwatakabajaya ambebo nindatamujaya pe.” 20 Eelyo wakalailila Jeta mwanaakwe mupati kuti, “Bajaye.” Pele walo mwana taakasomona panga wakayoowa nkaambo wakacili musyoonto. 21 Aawo ba Zeba a Zalumuna bakati, “Ino kuti watujaya nduwe omwini omupatima.” Mpoonya Gidiyoni wakabajaya, alimwi wakabweza zilisakatizyo zyakali munsingo zyankamela zyabo.
22 Baisilayeli bakaambila Gidiyoni kuti, “Koba mubetesi wesu yebo alunyungu lwako. Watuvuna kuzwa ku Bamidiyani.”
23 Gidiyoni wakabaingula kuti, “Nsikonzyi kuba muleli wanu naba mwanaangu. Mwami Leza ngo muleli wanu.” 24 Wakaindilizya akuti, “Andimukumbile cintu comwe buyo. Omwe-omwe wanu andipe tunkwinta-nkwinta ntwaakasaala. Bamidiyani bakali kusama tunkwintankwinta twa ngolida mbubuli bwakali bantu bamunkanda. 25 Balo bakaingula kuti, ‘Mbubo, tulakupa.’” Bakayala cisani, eelyo muntu uuli oonse wakabikka aawo tunkwinta-nkwinta ntwaakasaala. 26 Tunkwinta-nkwinta ooto twakali kulema masyekeli aali zyuulu amyaanda iili ciloba kutabikkilizya azilisakatizyo azisani zyacisombo zyakali kusama bami baku Midiyani alimwi aminkonde yankamela. 27 Gidiyoni wakabelesya ngolida eeyi kubumba mutuni wa efodi akuubika mumunzi wakwe wa Ofula. Nkaako Baisilayeli boonse bakaleka kutobela Leza bakomba mutuni ooyo. Wakaba cilebyo kuli Gidiyoni amukwasyi wakwe.
28 Bamidiyani bakazundwa a Baisilayeli, aboobo tiibakacili kubayoosya limbi pe. Nkaako kwakanyina nkondo munyika kwamyaka iili makumi one yabuponi bwa Gidiyoni.
Lufu lwa Gidiyoni
29 Gidiyoni, mwanaa Jowasyi wakainka akuyookkala kwabo. 30 Wakalijisi bana balombe bali makumi aali ciloba nkaambo wakakwete bakaintu banji. 31 Alimwi wakalijisi amwanakasuwa wakwe waku Syekemu. Mukaintu ooyu wakazyala mwana mulombe eelyo wakamuulika kuti Abimeleki. 32 Bweende-bweende Gidiyoni wakafwa kacembeede, wakazikkwa mucuumbwe ca Jowasyi wisi mumunzi waciinga ca Abiyeza.
33 Naakafwa Gidiyoni Baisilayeli bakaleka kutobela Mwami Leza, bakatalika kukomba ba Baali. Bakabamba Baalibeliti kuti abe leza wabo. 34 Bakaleka kutobela Mwami Leza wabo wakabavuna kuzwa kuli basinkondonyina boonse. 35 Tiibakalumba mukwasyi wa Gidiyoni akaambo kazintu zyoonse nzyaakabacitila.