Babetesi 3

Misyobo yakacikkede munyika

¹ Lino Mwami Leza wakaleka misyobo imwi mukuti asunke Baisilayeli aabo batakalwanide nkondo mu Kenani. ² Mwami Leza wakali kuyanda kuti mazyalani oonse a Baisilayeli azibe kulwana nkondo, kwaambisya aabo batanalwanide. ³ Njeeyi misyobo eeyo yakacili munyika, bami bosanwe ba Bafilisiti, a Bakenani boonse, Basidoni a Bahivi aabo bakali kukkala muzilundu zya Lebanoni, kuzwa kucilundu ca Balahemoni kusikila kumumpata wa Hamati. ⁴ Leza wakabasiya kuti asunke Baisilayeli kuti azibe kuti naa Baisilayeli balaswiilila milawo eeyo Mwami Leza njaakapa basikale babo kwiindila muli Mozesi. ⁵ Mbombuboobu Baisilayeli mbubakakkala akati ka Bakenani, Bahiti, Baamoli, Bapelezi, Bahivi, a Bajebusi. ⁶ Baisilayeli aabo bakatalika kukwatana abamisyobo eeyo, alimwi bakali kukomba abaleza babo.

Otiniyeli mbwaakavuna Baisilayeli

⁷ Lino Baisilayeli bakaluba Mwami Leza akumubisizya. ⁸ Nkaako Mwami Leza wakanyemena Baisilayeli, wakabaaba kuli Kusyanilisatayimu, mwami waku Mesopotamiya, eelyo bantu ba Isilayeli bakabelekela Kusyanilisatayimu kwamyaka iili lusele.

⁹ Ciindi Baisilayeli nibakalilila Mwami Leza, wakabapa muvuni uutegwa Otiniyeli mwanaa Kenani musyoonto wa Kalebi. ¹⁰ Muuya wa Leza wakamusikila, nkaako Otiniyeli wakakonzya kweendelezya Baisilayeli. Wakabatola kunkondo, ooko Mwami Leza nkwaakaaba Kusyanilisatayimu mwami waku Mesopotamiya kulinguwe wamuzunda. ¹¹ Kwakanyina nkondo kwamyaka iili makumi one. Kumane Otiniyeli wakafwa.

Ehudi mbwaakavuna Baisilayeli

¹² Lino Baisilayeli bakabisizya Mwami Leza alimwi. Nkabela wakalekela Egiloni mwami waku Mowabu kuti abalwane. ¹³ Wakayobolola Baamoni a Baameleki walwana Baisilayeli akubazunda wakatola munzi watukunka. ¹⁴ Baisilayeli bakalelwa a Egiloni kwamyaka iili kkumi alusele.

¹⁵ Pele Baisilayeli nibakalilila Mwami Leza, wakabapa muvuni uutegwa Ehudi mwanaa Gela wamusyobo wa Benjamini, sicimwensi. Baisilayeli bakatumina cipego kuli Egiloni mwami waku Mowabu bapa Ehudi. ¹⁶ Ehudi wakafulide panga lyakali kubosya koonse koonse, lyakali kulampa kakokola komwe, wakalisekka kunsi aazyakusama zyakwe akasolo kalulyo. ¹⁷ Wakainka kutola cipego eeco kumwami Egiloni. Mwami Egiloni wakalineneede. ¹⁸ Naakamana kupa cipego eeco wakaambila baabo bakaciyumwide kuti bapilukile. ¹⁹ Walo mwini wakaakupilukila kumabwe aaconcomene ku Giligali, waza kumwami wazooti, “Ndijisi maseseke aakukwaambila o mwami.” Mpoonya mwami wakati kubabelesi bakwe, “Amutusiye aasyoonto.” Bakazwida aanze.

²⁰ Lino mwami kakkede alikke mukaanda kakwe katontola kali mujulu, Ehudi wakaboola kulinguwe akuti, “Ndilaa mulumbe wakazwa kuli Leza wakwaambila nduwe, o mwami.” Mwami naakamvwa boobo wakanyamuka. ²¹ Mpawo Ehudi ajanza lyakwe lyalumwensi wakasomona panga lyakali kukasolo wamubbwabula mwida, ²² panga lyakabbila acijatizyo calyo lyakupolela kusule, nkabela mafuta akavumba acijatizyo. Taakalisomona pe cifusi cakazwa. ²³ Mpoonyaawo Ehudi wakazwida aanze akujala milyango yoonse, wasiya waipinga. ²⁴ Azwe buyo babelesi bamwami bakaboola bazoojana kuti milyango ilipingidwe, eelyo balo bakayeeya kuti mwami uciligwasya. ²⁵ Bakalindila mane limwi bakazingwa, pele taakwe naakajalula kumulyango. Nkaako bakapingulula bajana mwami wabo uliwide ansi wafwa.

²⁶ Ciindi ciya ncibakacili kulindila Ehudi mbwaakabonena wakatija wakwiinda kumabwe aaconcomene, watijila ku Siila. ²⁷ Asike buyo munyika yatulundu-lundu ya Efulemu wakasiba mweembo, eelyo Baisilayeli bakazwa mumalundu ngooyo wabasolweda. ²⁸ Wakabaambila kuti, “Amunditobele, nkaambo Mwami Leza wabaaba kale basinkondoma Bamowabu kulindiswe. Aboobo bakamutobela bakasaala zito zya Jolodani, basinkilizya Bamowabu cakuti taakwe muntu wakali kukonzya kuzubuka. ²⁹ Ciindi eeco nciconya bakajaya Bamowabu bakatisike kuzyuulu zili kkumi. Boonse bakajaigwa bakali basinguzu, nikuba boobo taakwe muntu naba omwe wakatija. ³⁰ Mbombuboobu Bamowabu mbubakazundwa a Baisilayeli. Eelyo kwakanyina nkondo kwamyaka iili makumi aali lusele.”

Syamugaa mbwaakavuna Baisilayeli

³¹ Lino musule lya Ehudi kwakaza uumbi musololi zina lyakwe Syamugaa mwana wa Anati. Ooyo wakajaya Bafilisiti bali myaanda iili cisambomwe acidunsyo cabasune. Mbombuboobu awalo ooyu mbwaakavuna Baisilayeli.