Babetesi 20

Baisilayeli mbubakalibambila Nkondo

¹ Mpoonya bantu boonse ba Isilayeli bakayoboloka, bakazwa muzisi zyoonse kuzwa ku Dani kusikila ku Biiyasyeiba, kubikkilizya acisi ca Giliyadi, bakabungana antoomwe kumbele lya Mwami Leza ku Mizipa. ² Nkabela basololi bamisyobo yoonse ya Isilayeli bakaliko ooko kwakabungene bantu ba Leza. Kwakali bantu basika kuzyuulu zili myaanda yone balwana nkondo yaansi amapanga. ³ Ciindi eeco bamusyobo wa Benjamini bakamvwa kuti Baisilayeli bamwi bali ku Mizipa. Lino Baisilayeli bakabuzya Mulevi uulya kuti, “Twaambile, ino cakacitika buti?” ⁴ Mpoonya Mulevi ooyo wakaingula kuti, “Ndakasika ku Gibeya mucisi ca Benjamini, mebo amwanakasuwa wangu kuti toone nkuko. ⁵ Mpawo bantu baku Gibeya bakaboola kuti bandijate, bakazingulukide ŋanda ciindi camasiku, bakali kuyanda kundijaya, nibakakacilwa bakajata mwanakasuwa wangu, bamucita zitaambiki, nkabela wakafwa. ⁶ Mpoonya ndakamubweza akumukosoola muzibeela akuzitumizya kumisyobo yoonse ya Isilayeli, nkaambo bantu aaba ncintu cisesemya munyika ya Isilayeli. ⁷ Nywebo nobantu ba Isilayeli nomuli waano, amukosole makani aaya naa tweelede kwaacita buti.”

⁸ Mpawo bantu boonse bakanyamuka antoomwe bakati, “Taakwe naba omwe wesu uutibweede kutente lyakwe nikuba kuŋanda yakwe pe. ⁹ Pele mbotuticite mboobu. Tulauma cisolo, kuti tubone naa mbaani batikalwane munzi wa Gibeya. ¹⁰ Tulasala bantu bamanya kkumi kuzwa kumisyobo yoonse ya Baisilayeli kuti babambile basilumamba zyakulya. Basilumamba bayooinka kuyoobweedezezya baku Gibeya cibi cabo.” ¹¹ Aboobo bantu boonse bakabungana antoomwe kuti balwane munzi ooyo.

¹² Mbombuboobu misyobo yoonse ya Isilayeli mbuyakatuma basilumamba mucisi coonse ca Benjamini bakati, “Ino ncinzi eeci ncimwakacita? ¹³ Lino amutupe babi aabo bali mu Gibeya, kuti tubajaye akugwisya bubi oobu munyika ya Isilayeli.” Pele bamusyobo wa Benjamini tiibakaswiilila Baisilayelinyina pe. ¹⁴ Lino Babenjamini bakaboola ku Gibeya kuzwa muminzi yoonse ya Benjamini kuti bazoolwane Baisilayelinyina. ¹⁵ Mubuzuba oobo bakabunganya basilumamba bakali zyuulu zili makumi obilo acisambomwe balwanya mapanga. Kunze lyabaaba, kwakali abamwi basilumamba bakasalidwe kuzwa ku Gibeya, aaba bakali myaanda iili ciloba. ¹⁶ Boonse bakali basicimwensi, bakali kukonzya kufusa bbwe kuuma nikaba kasusu kakunyina akwiinzya pe. ¹⁷ Eelyo Baisilayeli kuleka Babenjamini, bakabunganya basilumamba bakali zyuulu zili myaanda yone balwanya mapanga.

Babenjamini mbubakalwana

¹⁸ Lino Baisilayeli bakaya ku Beteli kuyoobuzya kuli Leza kuti, “Ino mbabali besu batisaangune kuyoolwana Babenjamini?” Mpawo Mwami Leza wakati, “Bajuda mbabeelede kusaanguna kuunka.”

¹⁹ Nibwakaca Baisilayeli bakabuka akuyooyaka zivuka kumbali aa Gibeya. ²⁰ Bamane bakaya kuyoolwana Babenjamini, eelyo Baisilayeli bakaima mumindando ku Gibeya. ²¹ Abalo Babenjamini bakazwa mumunzi wa Gibeya bazoolwana, mubuzuba oobo kwakajaigwa Baisilayeli bali zyuulu zili makumi obilo azibili. ²² Pele Baisilayeli bakayumizyanya, bakaima mumindando alimwi mubusena oobo mbubakaimvwi kusaanguna. ²³ Baisilayeli bakainka kuyoolilila Mwami Leza mane kusikila kumazuba, eelyo bakabuzya Mwami Leza kuti, “Sena tuleelede kuyoolwana bakwesu Babenjamini alimwi?” Mwami Leza wakati, “Kamuya mukabalwane.”

²⁴ Nkaako Baisilayeli bakainka lwabili. ²⁵ Abalo Babenjamini bakazwa mumunzi wa Gibeya bazoolwana, ciindi eeci kwakajaigwa Baisilayeli basika kuzyuulu zili kkumi alusele balwana amapanga. ²⁶ Mpoonya Baisilayeli boonse bakainka ku Beteli kuyoolila ku Mwami Leza, bakaliimya kulya buzuba oobo mane kusikila kumangolezya. Bakapa zipaizyo zyakutenta, azyalumvwano ku Mwami Leza. ²⁷ Kumane bakabuzya Mwami Leza ooko nkaambo bbokesi lyacizuminano lya Mwami Leza nkulyakabede kwamazuba aayo. ²⁸ Fineyasi mwana wa Eliyazaa, mwana wa Aloni, nguwakali kulilanga ciindi eeco. Bantu bakati, “Sena tuunke alimwi kuyoolwana bakwesu Babenjamini, naa tubaleke buyo?” Mwami Leza wakati, “Kamuya nkaambo juunza njobaaba kulindinywe.”

²⁹ Aboobo Baisilayeli bakayubika bamwi bantu kuzinguluka Gibeya. ³⁰ Nkabela mubuzuba bwatatu Baisilayeli bakainka kuyoolwana Babenjamini akwiima mumindando ku Gibeya, mbubonya mbuli mbubakacitide kale. ³¹ Babenjamini nibakainka kuyoobalwana, bakasiya munzi akuya kule, lino mbubonya mbuli kuziindi zimwi bakatalika kuuma akujaya Baisilayeli mumigwagwa, yakali kuya ku Beteli, kuya ku Gibeya amusokwe, bakajaigwa bakatisike kumakumi otatwe. ³² Mpoonya Babenjamini bakati, “Twabatanda mbubonya mbuli lutaanzi.” Baisilayeli bakati, “Atutije kuti kabaciza kulaale kuzwa mumunzi mane kumigwagwa.” ³³ Nibakasika ku Balitama Baisilayeli bakali kutija bakaima mumindando, aawo beenzinyina bakayubide bakayubunuka mumasena aabo kumbo lya Geba. ³⁴ Bakasalidwe kuyoolwana munzi wa Gibeya bakali zyuulu zili kkumi. Nkondo yakayuma, pele Babenjamini taakwe nibakazi kuti mapenzi akali aafwiifwi ambabo pe. ³⁵ Mwami Leza wakazunda Babenjamini kumbele lya Baisilayeli, nkabela mubuzuba oobo, Babenjamini bakajaigwa bakali zyuulu zili makumi obilo azisanu amwaanda. Aaba boonse bakali baabo bakali kulwanya mapanga. ³⁶ Babenjamini bakabona kuti bazundwa. Baisilayeli bakacita mbuli kuti batija Babenjamini nkaambo bakali kusyoma beenzinyina bakayubide ku Gibeya. ³⁷ Aabo bakayubilide bakazwa akusaala munzi woonse. Bakajaya bantu boonse bakali mumunzi. ³⁸ Citondezyo ncibakapangene Baisilayeli ncakuti, babona busi kabuuntumuka mumunzi, ³⁹ baya batija baleelede kupiluka mulumamba. Babenjamini bakatalika kuuma akujaya bantu bakali makumi otatwe bakali kuyeeya kuti, “Ncobeni twabazunda mbuuli lyoonse.” ⁴⁰ Citondezyo nicakalibonya kuzwa mumunzi, nkokuti musumpuululu wabusi niwakalibonya, Babenjamini bakaceba musule bakabona munzi woonse wuunta busi. ⁴¹ Mpoonya Baisilayeli baya bakapiluka mulumamba, aawo Babenjamini bakayoowa mukuti bakabona kuti mapenzi abasikila. ⁴² Nkaako bakatija, batozya kunkanda, pele basinkondonyina bakabeenzya, nkabela aabo bakazwida mumunzi bakabajaya mumigwagwa. ⁴³ Baisilayeli bakabbatikizya Babenjamini, akubatandaanya baakubeenzya kujwe lya Gibeya. ⁴⁴ Babenjamini bakajaigwa bakali zyuulu zili kkumi alusele. ⁴⁵ Bamwi bakanyona akutijila kumwaala waku Limoni, pele zyuulu zyosanwe bakajaigwa mumigwagwa. Bakali buyabubatandaanya kuya ku Gidomu, ooko kwalo kwakajaigwa bali zyuulu zyobilo. ⁴⁶ Babenjamini bakajaigwa mubuzuba oobo bakali zyuulu zili makumi obilo azisanu, boonse bakali basimapanga basinguzu.

⁴⁷ Pele bali myaanda iili cisambomwe bakatijila kunkanda kumwaala waku Limoni, bakaakukkala ooko kwamyezi yone. ⁴⁸ Baisilayeli bakapiluka kukulwana Babenjamini bamwi akubajaya boonse, bantu abanyama babo mbibakajana. Aminzi yoonse bakiitenta.