Babetesi 2

Mungelo wa Mwami Leza mbwaakasika ku Bokimu

¹ Lino mungelo wa Mwami wakainka kuzwa ku Giligali kuya ku Bokimu nkwaakaakwaambila Baisilayeli kuti, “Ndakamugwisya mu Ijipiti akumuleta munyika njindakasyomezya kuli basikale banu. Lino ndati, ‘Taakwe nenjootyola cizuminano ncindakapangana andinywe akutamani. ² Anywebo lwanu tamweelede kupangana cizuminano abantu bamomuno. Muleelede kumwaya zipaililo zyabo!’ Nikuba boobo taakwe nimwakandiswiilila pe. Ino mwacitila nzi oobo? ³ Lino mebo mwaambila kuti, ‘nsikoobatanda aaba pe, banoomupenzya lyoonse, abalo baleza babo banoomulebya.’” ⁴ Ciindi mungelo wa Mwami Leza naakamana kwaamba majwi aaya oonse ku Baisilayeli, bantu bakalila cakupozomoka. ⁵ Nkaako busena oobo bakabwiita kuti Bokimu, nkokuti balila. Kubusena oobo bakapa zipaizyo ku Mwami Leza.

Lufu lwa Josyuwa

⁶ Lino Josyuwa naakamwaisya bantu, Baisilayeli bakainka umwi aumwi kucaabilo cakwe canyika. ⁷ Bakabelekela Mwami Leza mubuponi bwa Josyuwa boonse. Josyuwa naakafwa, bakacili kubelekela Mwami Leza mubuponi bwabapati aabo bakabona milimo yoonse iigambya eeyo Mwami Leza njaakacitilide Baisilayeli. ⁸ Eelyo Josyuwa mwanaa Nuni mubelesi wa Mwami Leza, wakafwa kali aamyaka iili mwaanda akkumi lyomwe. ⁹ Bakamuzikka munyika yacaabilo cakwe ku Timunatihelesi munyika yatulundu-lundu ya Efulemu cilundu ca Gaasyi nkocili kunyika. ¹⁰ Lino zyalani lyoonse eelyo nilyakamana kufwa kwakaza zyalani limbi lyatakazi Mwami Leza anzyaakacitilide Baisilayeli.

Baisilayeli mbubakaleka kukomba Mwami Leza

¹¹ Lino Baisilayeli bakabisizya Mwami Leza akutalika kukomba ba Baali, ¹² bakaleka kukomba Mwami Leza wabasikale babo ooyo wakabagwisya ku Ijipiti, batalika kukomba baleza bamisyobo yakabazingulukide. Nkaako bakakalazya Mwami Leza. ¹³ Bakaleka kukomba Mwami Leza, bakabelekela ba Baali a Asitaloti. ¹⁴ Baisilayeli bakakalazya Mwami Leza, mpawo wakabaaba kuli basikuvumpa bakasaala zintu zyabo. Wakabalekelezya kuli basinkondonyina basinguzu bakabazingulukide cakuti tiibakacili kukonzya kulikwabilila. ¹⁵ Kwakali kunga nkubaakulwana, Mwami Leza wabalekelezya, mbubonya mbuli mbwaakakonkezya kuti mbwayoocita. Nkaako bakapenzegwa kapati.

¹⁶ Mwami Leza wakabapa babetesi aabo bakabavuna kuzwa kuli basinkondonyina. ¹⁷ Nikuba boobo tiibakabaswiilila babetesi aabo pe. Bakacili kukomba baleza bambi akubabelekela. Cakufwambaana bakaleka nzila eeyo basikale babo njibakali kutobela mukuswiilila milawo ya Mwami Leza. Tiibakacita oobo pe. ¹⁸ Kufumbwa ciindi eeco Mwami Leza naakabapa mubetesi, Mwami Leza lwakwe wakali kumugwasya mubetesi ooyo cakuti wakakonzya kuvuna Baisilayeli kuzwa kuli basinkondonyina, mumazuba oonse aayo mubetesi ooyo ngaakali kupona. Mwami Leza wakabausila nsoni naakamvwa mbubakali kutongela akaambo kabaabo bakali kubapenzya akubadyaminina. ¹⁹ Pele bakali kunga ciindi mubetesi wabo wafwa, babweedela kukucita nzizyonya nzyobakali kucita akubisya kwiinda basikale babo. Bakali kutobela baleza bambi akubabelekela. Bakakakatila kutobela nzila zyabo zibi mucinguni cabo. ²⁰ Alimwi Mwami Leza wakanyemena Baisilayeli wakati, “Bantu aaba batyola cizuminano cangu ncindakapangana abasikale babo mukutaswiilila majwi aangu. ²¹ Nkaako nsikooyoobatandila limbi musyobo nuuba omwe akati kamisyobo njaakasiya Josyuwa naakafwa. ²² Munzila eeyi ndilasunka Baisilayeli kuti mbone naa balatobela nzila zyangu bwakacita basikale babo naa pe.” ²³ Ncenciceeco Mwami Leza ncaakalekela misyobo eeyo, kataitandi nikuba kwiiaba kuli Josyuwa.