Babetesi 17

Zyamituni ya Mika

¹ Lino kwakali muntu umwi wakali kukkala munyika yatulundu-lundu ya Efulemu zina lyakwe Mika. ² Ooyu wakaambila banyina kuti, “Mali aalya aansiliva aali myaanda iili kkumi aumwi aakabbigwa, mucimana mwakasinganya mubbi nkemvwide, ngaaya ndaajisi ndime ndakaatolede.”

³ Banyina bakati, “Mwami Leza akuleleke mwanaangu.” Eelyo mali oonse aaya wakaabweedezya kuli banyina, balo bakati, “Mukuti mwanaangu atasinganyizigwi mali aaya ndaapa ku Mwami Leza. Mwanaangu afule akubumba mutuni, nkaako ngaaya ndaapa kuli nduwe.” ⁴ Kuzwa kumali aayo ngaakapilusizye kuli banyina, banyina bakagwisya mali aali myaanda yobilo, baakupa mufuzi, walo wakaafula mutuni, akubumba aumwi mutuni, mituni eeyi yakabikkwa mwa Mika.

⁵ Lino Mika wakalijisi kapaililo kakwe mwini alimwi wakapanga akabaki kabupaizi kaefodi amituni imwi, amane wakabikka umwi wabana bakwe kuti abe mupaizi. ⁶ Mazuba aayo kwakanyina mwami mu Isilayeli pe, umwi aumwi wakali kulicitila mbwayanda mwini.

⁷ Lino kwakali mukubusi Mulevi wakali kuzwa ku Betelehemu mucisi ca Juda. ⁸ Nkabela muntu ooyu wakali kuyabuyandaula busena bwakuyakila. Lino kayabweendeenda wakasika kucisi ca Tulundu-lundu ca Efulemu kuŋanda ya Mika. ⁹ Mika wakamubuzya kuti, “Ino wazwidayi?”

Wakati, “Ndili Mulevi ndazwida ku Betelehemu mucisi ca Juda, nja buyandaula busena bwakuyakila.”

¹⁰ Mika wakamwaambila kuti, “Kkala andime, ube mulailili amupaizi wangu. Ndinookubbadela kkumi lyamali aansiliva amwaka, antoomwe azisani azyakulya.” ¹¹ Mpawo Mulevi ooyo wakazumina kukkala anguwe, nkabela wakalelwa mbuli umwi wabana ba Mika. ¹² Mika wakamubikka kuba mupaizi wakwe kakkala muŋanda yakwe. ¹³ Mika wakati, “Lino mbwindajana Mulevi mupaizi ndaziba kuti Mwami Leza ulandileleka.”