Babetesi 13

Kuzyalwa kwa Samusoni

¹ Lino Baisilayeli alimwi bakabisizya Mwami Leza, eelyo wakabaaba ku Bafilisiti kwamyaka iili makumi one. ² Lino kwakali muntu umwi wakali kuzwa ku Zola wamusyobo wa Dani, zina lyakwe wakali Manowa. Mukaintu wakwe taakali kuzyala pe. ³ Nkabela mungelo wa Mwami Leza wakalibonya kumukaintu akuti, “Bona, tozyali, nikuba boobo lino uyoomita akuzyala mwana mulombe. ⁴ Nkaako ono utanoonywi waini, nikuba cimwi cikola alimwi utanoolyi cintu niciba cimwi cisofweede. ⁵ Waakuzyala mwana ooyo, takoonooyoogelwa pe, nkaambo mulombe ooyu uyooba Munazili uupedwe ku Mwami Leza kuzwa kukuzyalwa kwakwe. Uyoovuna Baisilayeli kuzwa ku Bafilisiti.”

⁶ Lino mukaintu ooyu wakaboola wazooambila mulumi wakwe kuti, “Muntu wa Leza wasika kulindime. Busyu bwakwe bwali mbuli bwamungelo wa Leza, bulayoosya. Taakwe nindamubuzya nkwaazwida pe, alimwi taakwe naandaambila zina lyakwe. ⁷ Pele wandaambila kuti, ‘Bona, uyoozyala mwana mulombe, nkaako utanoonywi waini, nikuba cimwi cikola, alimwi utanoolyi cisofweede nkaambo mulombe ooyo unooli Munazili kuzwa kukuzyalwa kwakwe kusikila kulufu.’”

⁸ Mpoonya Manowa wakakomba ku Mwami Leza wati, “O Leza ndakukumbila kuti muntu wa Leza ooyo ngookatuma aboole kulindime alimwi kuti azootwiisye mbotweelede kulela mulombe ooyo uuyoozyalwa.” ⁹ Nkabela Leza wakamvwa kukomba kwa Manowa, mpawo mungelo wa Leza wakasika kumukaintu alimwi ciindi naakali kulyookezya mumuunda, pele Manowa mulumi wakwe taakwe naakaliwo pe.

¹⁰ Mpoonya mukaintu wakazuzaanina kumulumi wakwe waakuti, “Teelela, muntu uulya wakazide kulindime buya buzuba walibonya kulindime alimwi.” ¹¹ Aawo Manowa wakanyamuka akuccilila mukaintu wakwe, wakaakusika kwakali muntu ooyo akumubuzya kuti, “Sena nduwe ookaambaula kumukaintu wangu?” Walo wakaingula kuti, “Iiyi, ndime.” ¹² Manowa wakaindilizya akubuzya kuti, “Lino eezyo nzyookaamba zyaakucitika, ino mwana ooyo uyoocita nzi? Kanooyoopona buti?”

¹³ Mungelo wa Mwami Leza wakamwaambila kuti, “Mukaintu wako weelede kuyoocita zyoonse nzindakamwaaambila. ¹⁴ Atanoolyi nsaansa nikuba kunywa waini niciba cimwi cikola, naa kulya cisofweede. Weelede kubamba zyoonse nzindakamulailila.”

¹⁵ Manowa wakabuzya mungelo wa Mwami Leza kuti, “Ino mbuti kuti walindila, twakucitila-citila kapongo?” ¹⁶ Mungelo ooyo wakati, “Pe mbubo, nikuba kuti ndalindila, inga nsikoolya. Mbuti kuti mwapa cipaizyo cakutenta ku Mwami Leza?” Kwaciindi coonse eeci Manowa taakazi kuti muntu ooyo mmungelo wa Mwami Leza.

¹⁷ Mpawo Manowa wakamubuzya kuti, “Nduweni zina? Eelyo zyaakucitika inga twaakukulemeka.”

¹⁸ Mungelo ooyo wakati, “Ino ndyaanzi zina lyangu? Lilakankamika.”

¹⁹ Aawo Manowa wakatola kapongo antoomwe acituuzyo camaila, wakakapaizya atala aabbwe ku Mwami Leza. Eelyo Mwami Leza wakacita zigambya Manowa amukaintu wakwe kabalangilila. ²⁰ Mulilo niwakavwilima kuya mujulu, mungelo ooyo wakatanta mulinguwo. Babone boobo, Manowa amukaintu wakwe bakavuntama ansi. ²¹ Ciindi mungelo ooyo naatakalibonya limbi, Manowa wakaziba kuti wali mungelo wa Mwami Leza.

²² Wakaambila mukaintu wakwe kuti, “Tulafwa, nkaambo twabona Mwami Leza.”

²³ Pele mukaintu wakwe wakaingula kuti, “Kuti Mwami Leza naayanda kutujaya, naatatambula zipo zyesu, nikuba kututondezya akutwaambila zeezi.”

²⁴ Bweende-bweende mukaintu ooyu wakazyala mwana mulombe akumuulika kuti Samusoni. Mwana ooyo wakakomena, alimwi Mwami Leza wakalimulelekede. ²⁵ Muuya wa Mwami Leza wakatalika kumuyumya kacili kuzivuka zya Dani akati ka Zola a Esyitawoli.