Babetesi 12

Jefuta a Baefulemu

¹ Lino Baefulemu bakazubuka mulonga wa Jolodani akuya ku Zafoni, bakwaambila Jefuta kuti, “Ino nkaambo nzi ncookazubuka kuyoolwana Baamoni kotatwaambili swebo kuti tukusindikile? Tulakuumpila muŋanda!” ² Jefuta wakabaingula kuti, “Mebo abantu bangu, twakalikuzwangana a Baamoni. Ndakamwiita, pele mwakakaka kuti mundigwasye kubalwana. ³ Mebo nindakabona kuti mwakaka, ndakalisungula buyo kuti ndizubuke nkabalwane Baamoni endikke. Mwami Leza wakandigwasya, ndakabazunda, ino ono ncinzi ncimwaaboolela kundilwana sunu?”

⁴ Mpoonya Jefuta wakabunganya baalumi boonse baku Giliyadi, bakalwana baku Efulemu akubazunda. Baefulemu bakaambide kuti, “Nywebo noba Giliyadi nomuli akati ka Baefulemu a Manase mwakatija kuzwa mulindiswe!”

⁵ Lino mukuti Baefulemu batatiji, Bagiliyadi bakasinkila zito zyoonse zyamulonga wa Jolodani, kufumbwa Muefulemu watitije akumbila kuti, “Andizubuke,” bantu baku Giliyadi bakali kumubuzya kuti, “Sena uli Muefulemu?” Kuti waamba kuti, “Peepe,” ⁶ bakamwaambila kuti, “Amba kuti Syiboleti” walo naa wati “Siboleti” mukuti taakalikukonzya kulyaamba bbala eeli, bakamujata mpoonya aawo akumujaya. Nkabela ciindi eeco Baefulemu bakajaigwa bakasika kuzyuulu zili makumi one azibili.

⁷ Lino Jefuta Mugiliyadi wakabeteka Baisilayeli kwamyaka iili cisambomwe. Kumane wakafwa akuzikkwa mumunzi wakwe uuli ku Giliyadi.

Zya Ibuzani Eloni a Abuloni

⁸ Ciindi Jefuta naakafwa, Ibuzani waku Betelehemu ngowakabeteka Isilayeli. ⁹ Wakalijisi bana balombe bali makumi otatwe abasimbi makumi otatwe. Basimbi wakabakwasya kumikowa iimbi, alimwi wakakwatila bana bakwe balombe bali makumi otatwe kumikowa iimbi. Wakabeteka Baisilayeli kwamyaka iili ciloba. ¹⁰ Kumane Ibuzani wakafwa akuzikkwa ku Betelehemu. ¹¹ Kuzwa waawo, Eloni wamusyobo wa Zebuluni nguwakabeteka Baisilayeli kwamyaka iili kkumi. ¹² Mpawo Eloni Muzebuluni wakafwa akuzikkwa ku Aijailoni munyika ya Zebuluni.

¹³ Kuzwa waawo Abudoni mwanaa Hilelu Mupilatoni nguwakasolweda Baisilayeli. ¹⁴ Wakalijisi bana balombe bali makumi one alimwi abazyukulu bali makumi otatwe, aabo bakali kutanta mbongolo zili makumi aali ciloba. Wakabeteka Baisilayeli kwamyaka iili lusele. ¹⁵ Kumane wakafwa akuzikkwa ku Pilatoni munyika ya Efulemu, kutulundu-lundu twa Baameleki.