Babetesi 11

¹ Lino Jefuta waku Giliyadi wakali silumamba singuzu. Wisi wakali Giliyadi, banyina bakali baamu. ² Giliyadi wakalijisi abamwi bana balombe kunze lya Jefuta mbaakazyala amukaintu wakwe wini. Lino aaba balombe nibakakomena, bakatanda Jefuta akuti, “Taakwe ancotikakone kuli taata, uli wamusokwe.” ³ Aawo Jefuta wakatija akusiya bana bokwabo, waakukkala munyika ya Tobu. Wakamvwana abamwi baalumi batakali kabotu watalika kweenda ambabo.

⁴ Nicakaba ciindi, Baamoni bakalwana Baisilayeli. ⁵ Nkaako basololi baku Giliyadi bakakwiita Jefuta kuzwa ku Tobu. ⁶ Bakati, “Koboola uzootusolwede mukulwana a Baamoni.”

⁷ Walo wakati, “Tee mulindisulide, mwakanditanda kuŋanda ya taata. Ani inga mwaboola buti kulindime mwabona mapenzi?”

⁸ Balo bakati, “Pe, kaka mbubo, twaboola kulinduwe lino nkaambo tuyanda kuti usolwede basilumamba boonse kukulwana Baamoni baku Giliyadi.”

⁹ Jefuta wakati kulimbabo, “Atwaambe mwanditola kukulwana Baamoni, wamana Mwami Leza wabaaba kulindime sena inga ndiyooba muleli wanu ncobeni?”

¹⁰ Balo bakati, “Mwami Leza ngokamboni wesu. Tuyoocita mbubonya oobo.” ¹¹ Aboobo Jefuta wakainka abasololi aaba baku Giliyadi, mpoonya bantu bakamupa bweendelezi. Jefuta wakainduluka makani oonse aaya ku Mizipa kumbele lya Mwami Leza.

¹² Kumane wakatumya nkombe ku mwami wa Baamoni kuyoomubuzya kuti, “Ino ncotuzwanganina ncinzi? Nkaambo nzi ncoonjila munyika yesu?”

¹³ Walo mwami wa Baamoni wakaingula kuti, “Nkaambo Baisilayeli nibakazwa ku Ijipiti bakatola nyika yangu kuzwa kumulonga wa Anoni kuyoosika ku Jaboki, mane ku Jolodani. Mwiijokezye nyika yangu muluumuno.”

¹⁴ Jefuta alimwi wakabatuma bantu akwiingula mwami wa Baamoni ¹⁵ kuti, “Baisilayeli tiibakatola nyika ya Mowabu niiba ya Amoni. ¹⁶ Baisilayeli nibakazwa ku Ijipiti, bakainda munkanda kuyoosika ku Lwizi Lusalala akuyoosikila ku Kedesyi. ¹⁷ Mpoonya bakatumya nkombe kumwami wa Edomu kuti bakamukumbile kuti abazumizye kwiinda munyika yakwe. Pele wakabakasya. Mbubonya oobo a mwami waku Mowabu bakamukumbila, pele awalo wakabakasya. Aboobo Baisilayeli bakakkala mu Kedesyi.

¹⁸ “Kuzwa kooko bakanyamuka baandulula nkanda. Bakazinguluka nyika ya Edomu kubikkilizya aya Mowabu baakusika kujwe mutala limwi lya mulonga wa Anoni. Bakayaka zivuka ooko, pele taakwe nibakazubuka mulonga wa Anoni nkaambo ngowakali munyinza wa Mowabu. ¹⁹ Mpoonya Baisilayeli bakatumya mulomo kuli Sihoni Muamoli mwami wa Hesyiboni, kuti abazumizye kwiinda munyika yakwe. ²⁰ Pele awalo Sihoni wakabakasya, wakaleta mpi yakwe yoonse ku Jahazi kuzoolwana Baisilayeli. ²¹ Pele Mwami Leza, Leza wa Baisilayeli wakaaba Sihoni abantu bakwe boonse kulimbabo. Mbombuboobu Baisilayeli mbubakatola nyika yoonse ya Baamoli. ²² Bakatola nyika eeyi ya Baamoli kutalikila kumulonga wa Anoni kumusanza kuyoosikila ku Jaboki kunyika akuzwida kunkanda iili kujwe kuyoosikila ku Jolodani kumbo.

²³ “Mukuti Mwami Leza wa Isilayeli nguwakatanda Baamoli kutegwa bantu bakwe Baisilayeli bakkale mbabo, ani yebo inga wiikakatila buti nyika eeyi? ²⁴ Kojisi buyo eeyo leza wako, Kemosi, njaakakupa. Aswebo mbubonya tunoojisi eeco Mwami Leza ncaakatupa. ²⁵ Sena yebo ulaanguzu kwiinda Balaki mwanaa Zipoo, mwami wa Mowabu ooyo watakabusya nkondo ku Baisilayeli? Sena kuli naakaboolede kuzootulwana? ²⁶ Baisilayeli bakalikkede mu Hesyiboni a Alowe aminzi imwi yakazingulukide kubikkilizya aminzi iili kumbali lya mulonga wa Anoni kwamyaka iili myaanda yotatwe. Ino nootakatunyanga ciindi eeco? ²⁷ Wabona, taakwe ncindakubisizya. Nduwe ootibisye ooyanda kundilwana. Mwami Leza mubetesi nguuzi mubi akati ka Baisilayeli a Baamoni.” ²⁸ Pele nikuba boobo mwami wa Baamoni taakwe naakaswiilila makani aakaamba Jefuta.

²⁹ Mpoonya muuya wa Mwami Leza wakazida Jefuta. Nkaako wakeenda waakwiinda mu Giliyadi amu Manase, amane wakajokela waya ku Mizipa uuli mucisi ca Giliyadi, azwe kooko wakaya ku Amoni. ³⁰ Jefuta wakasyomezya Mwami Leza akuti, “Kuti waaba Baamoni, ³¹ kufumbwa uutisaangune kuzwa muŋanda kuzoondicingauzya ndazwa kunkondo, njoomupa abe cipaizyo cakutenta kulinduwe.” ³² Amane aawo Jefuta wakazubuka mulonga kuti akalwane Baamoni, eelyo Mwami Leza wakamuzundya. ³³ Kulwana wakatalikila ku Alowe ngooyo waakusika kumbali aku Miniti aku Abelekelamimu. Minzi eeyi yakali makumi obilo. Wakajaya bantu banji, mbombuboobu Baamoni mbubakazundwa a Baisilayeli.

Mwana musimbi wa Jefuta

³⁴ Ciindi Jefuta naakajokela kumunzi ku Mizipa, mwana musimbi wakazwa muŋanda kuzoomucingauzya kazabuzyana akuuma kantimbwa. Ngomwana alikke ngwaakajisi, taakwe uumbi pe. ³⁵ Ciindi naakamubona, wakazapula cisani cakwe akaambo kamapenzi ngaakaliletelezya. Wakaamba kuti, “Maawe o mwanaangu, wandipenzya! Nkaambo nzi nooba nduwe oondeetela mapenzi? Ndasyomezya kale ku Mwami Leza, lino nsikonzyi kutacita eeco ncindasyomezya!”

³⁶ Walo mwana wakaambila wisi kuti, “Kuti naa wasyomezya kale ku Mwami Leza, kocita eeco ncoosyomezya kuti ulacicita. Mwami Leza wakuzundya Baamoni basinkondonyoko.” ³⁷ Amane wakakumbila wisi kuti, “Ndicitila eeci cintu comwe buyo. Ndileke kwamyezi yobilo kuti ngunke abeenzuma nkeende-ende ndemupenzi mumalundu, nkelila kuti ndafwa nketanakwatwa.”

³⁸ Wakamuzumizya kuti ainke kwamyezi yobilo. Walo abeenzinyina bakainka kumalundu akuyoolilila nkuko nkaambo wakali kuyanda kujaigwa katanakwatwa. ³⁹ Niyakamana myezi yobilo, wakajokela kuli wisi. Eelyo wisi wakacita mbubonya mbwaakasyomezya ku Mwami Leza. Ooyo mwana musimbi wakafwa katanakwatwa katazi mwaalumi. Aawa mpaakatalikila cilengwa ca Baisilayeli, ⁴⁰ cakuti bakaintu kabainka musokwe kwamazuba one mwaka amwaka kuyoolila mwanaa waku Giliyadi.