Babetesi 10
Tola
1 Naakafwa Abimeleki, Tola mwanaa Puwa, muzyukulu wa Dodo waciinga ca Isakaa wakasika kuzoovuna Isilayeli. Wakali kukkala ku Shamila munyika yatulundu-lundu ya Efulemu. 2 Wakaba mubetesi mu Isilayeli kwamyaka iili makumi obilo amyaka yotatwe. Mpoonya wakafwa akuzikkwa nkukonya ooko ku Shamila.
Jeya
3 Naakafwa Tola kwakaboola Jeya wakazwida ku Giliyadi. Wakaba mubetesi mu Isilayeli kwamyaka iili makumi obilo aibili. 4 Wakalijisi bana balombe bali makumi otatwe bakali kutanta mbongolo zyabo. Bakalikweendelezya minzi iili makumi otatwe, mu Giliyadi, eeyi minzi asunu iciitwa kuti minzi yamatente aa Jeya. 5 Jeya wakafwa akuzikkilwa ku Kamoni.
Jefuta
6 Alimwi mbubonya Baisilayeli bakabisizya Mwami Leza. Bakatalika kukomba Babaali a Asitaloti, abaleza ba Siiya, Sidoni, Mowabu, Amoni a Filisitiya. Bakasiya Mwami Leza akuleka kumubelekela. 7 Nkaako Mwami Leza wakanyemena Baisilayeli akucita kuti Bafilisiti a Baamoni babazunde. 8 Kwamyaka iili kkumi alusele bakali kudyaminina akupenzya Baisilayeli bakali kukkala kujwe lyamulonga wa Jolodani mucisi ca Giliyadi, ooko kwakali Baamoli. 9 Baamoni aabo bakazubuka Jolodani kuyoolwana misyobo ya Juda, Benjamini a Efulemu. Nkaako Baisilayeli bakajana mapenzi mapati loko.
10 Aawo Baisilayeli bakalilila Mwami Leza kuti, “Twakubisizya, nkaambo twakasiya nduwe O leza wesu, akubelekela Babaali.” 11 Mwami Leza wakabaingula kuti, “Sena mebo nsiindakamuvuna kuba Baijipiti, Baamoli, Baamoni, Bafilisiti, 12 Basidoni, Baameleki a Bamaoni? Aabo bakamudyaminina mumazuba aainda, lino nywebo mwakandililila kuti ndimugwasye. Sena tiindakamuvuna? 13 Pele nindakacita boobo nywebo mwakandisiya akukomba baleza bambi, kaako mebo lino ndakaka, nsikoomuvuna alimwi pe. 14 Kamuya, mukalilaukile baleza bambi aabo mbomwakalisalila. Amusikila mapenzi baleza aabo mbabeelede kuti bamuvune.”
15 Pele Baisilayeli bakati ku Mwami Leza, “Twakubisizya, kocita kufumbwa ncoyanda, pele kaka twakomba, tuvune lino.” 16 Mpoonya bakagwisya baleza bambi aabo akutalika kukomba Mwami Leza alimwi. Aboobo wakeetela amapenzi ngubakajisi.
17 Ciindi eeco impi ya Baamoni yakalibambila nkondo akubungana ku Giliyadi. Abalo Baisilayeli bakabungana ku Mizipa. 18 Basololi baba Isilayeli bakabuzyanya kabati, “Nguni uutitusolwede kulwana Baamoni? Ngonguwe uyooba mweendelezi waboonse mu Giliyadi.”