Babetesi 1

Baisilayeli mbubakazunda Bakenani

¹ Lino Josyuwa naakafwa, Baisilayeli bakabuzya Mwami Leza kuti, “Ino mbaani batisaangune kuyoolwana Bakenani?”

² Mwami Leza wakaingula kuti, “Bamusyobo wa Juda mbabatisaangune, nkaambo nyika ndiiaba kale kulimbabo.”

³ Basololi ba Juda bakati kubasololi ba Simiyoni, “Atweende tukalwane antoomwe kunyika eeyo njitwakapegwa. Twamana nituyoolwanina cipaanzi canu.” Aboobo Basimiyoni bakainka ambabo.

⁴ Basololi ba Juda nibakalwana Mwami Leza wakaaba Bakenani kubikkilizya a Bapelezi. Bantu mbibakazunda ku Bezeki bakali zyuulu zili kkumi. ⁵ Nkukonya ooko bakajana Mwami Adonibizeki akumulwana. ⁶ Wakati sole kutija, pele bakamutandaanya akuyoomujata. Bakamukosola zyala zyakumaboko azyakumaulu. ⁷ Aawo Adonibizeki wakati, “Ndakakosola zyala zyabami bali makumi aali ciloba, aabo mbindakacita kuti kababwezelela bufwefwelenga buwa atebule lyangu. Lino Leza wandicita mbubonya.” Bantu bakwe Adonibizeki bakamuleta ku Jelusalemu, nkabela ooko mwakafwida.

⁸ Lino Bajuda bakalwana munzi wa Jelusalemu. Bakanyonyoona bantu bawo akuumpa. ⁹ Bazwe buyo bakainka kuyoolwana Bakenani bakali kukkala munyika yamalundu akumusanza, amumakkuti. ¹⁰ Kuzwa aawo bakainka kuyoolwana Bakenani bakakkede mumunzi wa Hebuloni, kaindi wakali kutegwa Kiliyataaba. Ooko bakazunda baziinga zya Syesyayi, Ahimani, a Talimayi.

Otiniyeli wazunda munzi wa Debii

¹¹ Nibakazwa aawo Bajuda bakainka kuyoolwana munzi wa Debii, kaindi wakali kutegwa Kiliyatisefa. ¹² Kalebi wakati, “Silutwe wampi iiyoozunda munzi wa Kiliyatisefa uzookwata mwanaangu Akisa.” ¹³ Otiniyeli mwanaa Kenazi musyoonto wa Kalebi, nguwakazunda munzi ooyo, nkaako Kalebi wakamupa mwanaakwe Akisa.

¹⁴ Nibakakwatana, Otiniyeli wakakombelezya mukaintu wakwe kuti akumbile muunda kuli wisi, mpoonya wakainka kuli Kalebi. Mbwaakaselukila buyo ambongolo, Kalebi wakamubuzya ncaakali kuyanda. ¹⁵ Walo wakaingula kuti, “Ndalikuyanda tusensa kayi nyika njookandipa ncimpayuma.” Nkaako Kalebi wakamupa tusensa twamutala atwamukkuti.

¹⁶ Lino Bakenani balunyungu lwa syaanyinazyala Mozesi bakainka a Bajuda kuzwa kumunzi watukunka kuya kunkanda kumusanza wa Aladi munyika ya Juda ooko nkobakaakukkala a Baameleki. ¹⁷ Bajuda antoomwe a Basimiyoni babunyina bakainka antoomwe, nkabela bakazunda Bakenani bakali kukkala mu Zefati, akubanyonyweeda limwi. Nkaako munzi ooyo bakuuulika kuti Holoma. ¹⁸ Pele Bajuda tiibakatola munzi wa Gaza acisi cawo, munzi wa Asikeloni acisi cawo, amunzi wa Ekiloni acisi cawo. ¹⁹ Nikuba boobo Mwami Leza wakali aa Bajuda, nkaako bakakonzya kutola nyika yamalundu. Mukuti bakajisi nkalaki zyalubulo, bakakacilwa kutanda bantu bakali kukkala mucibanda.

²⁰ Lino Kalebi wakapegwa Hebuloni mbubonya mbuli Mozesi mbwaakalaililide, alimwi wakatanda ziinga zyotatwe zya Baanaki. ²¹ Pele Babenjamini taakwe nibakatanda Bajebusi bakali kukkala mu Jelusalemu. Ncenciceeco Bajebusi ncobacikkede antoomwe a Babenjamini asunu.

²² Bamisyobo ya Josefa bakainka kuyoolwana munzi wa Beteli, Mwami Leza wakali aambabo. ²³ Bakatuma bantu kuti bakatwele munzi wa Beteli, kaindi wakali kutegwa Luzi. ²⁴ Basikutwela aabo bakabona muntu wakali kuzwa mumunzi, mpoonya bakati kulinguwe, “Twaambile mbotunga twanjila mumunzi ooyu, kutegwa yebo tukubede aankumbu.” ²⁵ Muntu ooyo wakabatondezya mbobanga banjila munzi. Mbombuboobu mbubakanyonyoona munzi ooyo. Kwaamba zyamuntu uulya bakamuleka amukwasyi wakwe. ²⁶ Lino muntu ooyo wakaya kunyika ya Bahiti akuyooyaka munzi mupati, ngwakaita kuti Luzi, mbuuciitwa abwasunu.

²⁷ Musyobo wa Manase tuuwakatanda banyinzi bamuminzi ya Batesyiyani, Taanaki, Doo, Ibuleyamu, a Megido atunzi twawo alimwi aminzi yakazingulukide. Aboobo Bakenani bakacilikkede ooko, tiibakabatanda pe. ²⁸ Baisilayeli nibakabaanguzu bakabelesya Bakenani cabuzike.

²⁹ Musyobo wa Efulemu tuuwakatanda Bakenani bamu Geza, aboobo bakalikkede ambabo. ³⁰ Awalo musyobo wa Zebuluni tuuwakatanda banyinzi bamuminzi ya Kitiloni a Nahalaii. Aboobo Bakenani bakacilikkede ambabo, bakababelesya cabuzike.

³¹ Musyobo wa Asya tuuwakatanda banyinzi bamuminzi ya Ako, Sidoni, Ahalabu, Akizibu, Heliba, Afeki amu Lehobu. ³² Aboobo Baasya bakacilikkede a Bakenani, nkaambo tiibakabatanda. ³³ Awalo musyobo wa Nafutali tuuwakatanda banyinzi bamuminzi ya Betesyemesyi a Betanati. Aboobo Bakenani bakacilikkede ambabo, bakababelesya cabuzike.

³⁴ Lino Baamoli bakasinkilizya Badani munyika yamalundu. Tiibakabaleka kuti baselemukile muzibanda. ³⁵ Baamoli bakakkede mu Hahelesi, Aijailoni, amu Syaalibimu. Pele bamisyobo ya Josefa nibakabaanguzu, bakabelesya Baamoli cabuzike.

³⁶ Munyinza wa Baamoli wakali kutalikila kumumpata wa Akilabimu kusikila kunyika ya Sela.