Amosi 7
Cilengaano cacikwikwi
1 Nceeci Mwami Leza ncaakanditondezya. Wakali kulibambila kutumina makata aacikwikwi nikwakamana kujugwa bwizu bwakusanizya banyama bamwami kuciindi lisyuuka mweemvwe uumbi. 2 Lino cikwikwi nicakamanizya kulya zisyango zyoonse munyika ndakati, “O Mwami Leza, kolekelela. Ino bantu ba Jakobo inga bapona buti oobu? Bacili bace!”
3 Nkaako Mwami Leza wakaleka. Mwami Leza wakati, “Eeci tacikacitiki alimwi.”
Cilengaano camulilo
4 Nceeci Mwami Leza ncaakatondezya. Mwami Leza wakaita mulilo walubeta, mulilo ooyo wakayuminizya maanzi manji akunyonyoona nyika. 5 Mpawo ndakati, “O Mwami Leza, ndakukumbila, koleka! Ino bantu ba Jakobo inga bapona buti oobu? Bacili bace!”
6 Nkaako Mwami Leza wakaleka. Mwami Leza wakati, “Acalo eeci tacikacitiki limbi pe.”
Cilengaano caceelesyo
7 Nceeci Mwami Leza ncaakanditondezya. Mwami Leza wakaliimvwi kumbali aabwaanda oobo bwakeelekedwe, wakajisi antambo yakweelesya. 8 Mpawo Mwami Leza wakandibuzya wakati, “Ino ubwene nzi Amosi?” Ndakaingula kuti, “Ndibwene ntambo yakweelesya.” Mpawo Mwami wakati, “Bona ndiyanda kubikka ntambo yakweelesya akati kabantu bangu Baisilayeli, nsikabalekeleli limbi pe. 9 Masena aakombela balunyungu lwa Izaka ayoonyonyoonwa, masena aasalala aabantu ba Isilayeli ayoopwaigwa, mebo lwangu ndemwini ndiyoolwana baciinga ca Jelobowamu.”
Zya Amosi a Amaziya
10 Mpoonya Amaziya mupaizi waku Beteli wakatuma majwi kuli Jelobowamu mwami wa Isilayeli aakuti, “Amosi wakuzangila mukati kacisi ca Isilayeli. Bantu bamunyika yako tabakookonzya kuyumina majwi aakwe oonse pe.” 11 Mboobu Amosi mbwaamba ulati, “Jelobowamu uyoojaigwa munkondo, kasimpe Baisilayeli bayootolwa mubwaange, bayootolwa kulaale kuzwa kucisi cokwabo.”
12 Mpawo Amaziya wakati kuli Amosi, “Kozwa yebo omusinsimi! Pilukila kucisi ca Juda. Koya ukabelekele nkuko, koyoosinsima ooko. 13 Utanoocisinsimi limbi muno mu Beteli, nkaambo oobu mbusena bwamwami, ŋanda yabwami.”
14 Amosi wakaingula Amaziya kuti, “Nsiindakali musinsimi nokuba sicikolo wamusinsimi, pele ndakali buyo mweembezi, ndakali kulimina-limina mikuyu. 15 Pele Mwami Leza wakandilesya kweembela butanga akundaambila kuti, ‘Koya ukasinsimine bantu bangu Baisilayeli.’ 16 Nkaako lino swiilila majwi aa Mwami Leza. Yebo waamba kuti, ‘Intasinsimini bantu ba Isilayeli, akuleka kukambauka ziyoocitika kuciinga ca Izaka.’ 17 Nkaako mboobu mbwaamba Mwami Leza ulati, ‘Mukaintu wako uyooba muvuule mumunzi ooyu, bana bako balombe abasimbi bayoojaigwa munkondo. Nyika yako iyooelekwa akupambaulwa, yebo lwako uyoofwida mucisi cabantu batasyomi. Bantu bamu Isilayeli kasimpe bayootolwa mubwaange, kulaale kuzwa kucisi cokwabo.’”