Amosi 6

Kunyonyoonwa kwacisi ca Isilayeli

¹ Maawe kulindinywe nomuliibide mu Ziyoni, andinywe nomulimvwa kuti mulilikkalide mucilundu ca Samaliya, nywebo nobantu balemenede bacisi cipati eeci, kulindinywe bantu ba Isilayeli nkobaboola kuyanda lugwasyo. ² Kamuya mukabone munzi wa Kaline, kuzwa kooko mukaye kumunzi mupati wa Hamati, mwakumana mukaye ku Gati kucisi caba Filisiti. Sena bwami bwanu mbubotu kwiinda malelo aaya? Sena nyika yabo nimpati kwiinda yanu? ³ Nywebo mulakaka kuti buzuba bubi bulaboola, muleta aafwiifwi ziyoosya. ⁴ Moona amalo aakazilululwa ameja aabazovu, akulyookezya azyuuno zyanu zipati. Mulalya tubelele tubotu aboombe baneneede. ⁵ Mulauma tulumbu mbuli bwakalikulizya Devedi, mulalizya zingwali-ngwali zyanyimbo. ⁶ Mulanywa waini muzinywido zipati zizulisya, mulabelesya tufuta tununkilila tubotu, pele tamuusi akaambo kakunyonyoonwa kwaciinga ca Josefa. ⁷ Nkaambo nywebo muyooba akati kabaabo bayoosaanguna kutolwa mubwaange, mapobwe aanu aakulyookezya kwakulyoolola muzyuuno zipati ayoomana.

⁸ Mwami Leza wakakonkezya muzina lyakwe mwini, Mwami Leza Singuzuzyoonse ulati, “Ndasesemwa kulisumpula kwabantu ba Jakobo, ndacimwa nkwakwa zyabo, ndiyoosaazya munzi azintu zyoonse zili mulinguwe.”

⁹ Kuti kukasyaale bantu muŋanda yomwe bali kkumi, abalo bayoofwa. ¹⁰ Kuti umwi waluzubo sikuzootenta mitumba akaboole kuzooibweza mitumba eeyo muŋanda, kwamana akabuzye umwi uucinooyooyubide oomo kuti, “Sena kuli ngoli aawe?”

Kwaakumana akaingule kuti, “Peepe,” eelyo sikubuzya uyooti, “Shii tatweelede kwaamba zina lya Mwami Leza.”

¹¹ Mwami Leza wapa malailile, uyoopwayaula ŋanda mpati, aŋanda nsyoonto ziyookomooka. ¹² Sena mabbiza alazuzaana atala aamandomba? Sena muntu ulakonzya kulima mulwizi aŋombe? Pele nywebo mwacita kuti bululami bube ncemfu, mwacita ziluleme kuti zibije.

¹³ Nywebo mulasekelela akaambo kakuzunda munzi wa Lodebaa mulati, “Sena tiitwakazunda munzi wa Kaanayimu munguzu zyesu tobeni?”

¹⁴ Mboobu mbwaamba Mwami Leza Singuzuzyoonse ulati, “Ndiyoobusya musyobo umwi kuti uzoomulwane, nomusyobo wa Isilayeli, ooyo uuyoomudyaminina kuzwa kumunzi wa Lebohamati mane kuyoosika kukkuti lyakumusanza ku Alaba.”