Amosi 4
Isilayeli taapilukila ku Mwami Leza
1 Amuteelele majwi aaya nywebo noŋombe zyaku Basyani nomuli amulundu wa Samaliya. Nywebo nobakaintu nomudyaminina bacete akupwayaula bapengede. Nywebo nomuti kubalumi banu, “Nkoo, amutweetele twakulisansa a moyo!” 2 Mwami Leza wakonka mubusalali bwakwe akuti, “Masimpe ciindi ciyooboola nomuyootolwa atulobyo. Nywebo nobamamanino mukatolwe atulobyo twanswi. 3 Muyookwelelwa alwaanzi lwabwaanda luli munsi-munsi, kusowelwa anze kulangana aa Hamoni.” Mbwaamba Mwami Leza.
Busicinguni bwa Baisilayeli
4 “Amweende ku Beteli mukabisye, amweende ku Giligali mukaindilizye kucita zinyonyoono. Amulete zipaizyo zyanu cifumo-fumo cili coonse. Kamuleta kwakkumi kwanu kwainda mazuba otatwe lyoonse. 5 Muumpa cinkwa cijisi mimena mbuli cipaizyo cakulumba. Amulikankaizye azyakupa zyanu zyakuliyandila. Amulisumpule akaambo kazyo, nywebo Nobaisilayeli. Kayi ncencico eeci ncomuyanda kucita.” Mbwaamba Mwami Leza.
6 “Ndakacita kuti mufwe nzala muminzi yoonse, akuti mubule zinkwa muminzi yoonse, nikuba boobo tamupilukili kulindime pe. Mbwaamba Mwami Leza. 7 Alimwi ndime ndakalesya mvula kuwa kakucisyeede myezi yotatwe kuti mutalike kutebula. Ndakawisya mvula amunzi omwe buyo, pele ndakaikasya kuti iwe kumunzi umwi. Muunda umwi wakawidwa mvula, pele umwi tiiwakawidwa nkaako wakayuma. 8 Bantu bakali kuya buzeeleka kuzwa kumunzi umwi kuyoosika kuluumwi kuti bajane maanzi, pele tiibakajana maanzi manji aakunywa, nikuba boobo tiimwakapilukila kulindime pe.” Mbwaamba Mwami Leza.
9 “Kwaziindi zinji ndakayumya myuunda yanu amyuunda yamisaansa, ndakailetela malwazi angubi. Cikwikwi cakalya mikuyu amioliva aanu, nikuba boobo tiimwakapilukila kulindime pe.” Mbwaamba Mwami Leza.
10 “Ndakatuma zyuumo akati kanu mbuli mbundakacita ku Ijipiti. Ndakajazya bakubusi banu munkondo antoomwe amabbiza aanu aakajatwa, muzivuka zyanu mwakamvwide kununka kwalufu, nikuba boobo tiimwakapilukila kulindime pe.” Mbwaamba Mwami Leza.
11 “Ndakabanyonyoona bamwi banu mbubonya mbuli mbundakanyonyoona bamu Sodomu abamu Gomola. Mwakali mbuli cisisi ciyaka mulilo casikkulwa mucikko, nikuba boobo tiimwakapilukila kulindime pe.” Mbwaamba Mwami Leza.
12 “Nkaako nceeci ncendiyoocita kulindinywe Nobaisilayeli, lino akaambo kakuti ndiyanda kucita ceeci kulindinywe, amulibambile kuswaangana a Leza wanu Nobaisilayeli.”
13 Ooyo uupanga zilundu ngonguwe uulenga luuwo, ulayubununa mizeezo yakwe kumuntu,
ooyo uucita kuti bucedo bube mudima, weendeenda atala aanyika ngo Mwami Leza Singuzuzyoonse, ndezina lyakwe.