Amosi 2

Zya Bamowabu

¹ Mboobu mbwaamba Mwami Leza ulati, “Akaambo kazinyonyoono nzyobandicitila lyoonse bantu bamu Mowabu, nsikooleka kunyema pe. Akaambo kakuti bakatenta mafuwa aamwami waku Edomu mane aba mbuli mulambo, ² ndiyootumina mulilo kuli baku Mowabu ooyo uuyoosyukuta nkwakwa zya Keliyoti. Bamu Mowabu bayoopyopyongana kapati, bayookwemba akaambo kankondo akulila kwamweembo. ³ Ndiyoonyonyoona baleli bacisi eeci, akujaya balupati-pati baco boonse bali mulincico,” mbwaamba Mwami Leza.

Zyabantu bamu Juda

⁴ Mboobu mbwaamba Mwami Leza ulati, “Akaambo kazinyonyoono nzyobandicitila lyoonse bantu bamu Juda, nsikooleka kunyema pe. Nkaambo bakakaka mulawo wa Mwami Leza, alimwi tiibakabamba malailile aakwe, nkaambo baleza bamituni bakabacita kuti baleye, iiyi, baleza aabo basikale babo mbibakali kutobela, ⁵ nkaako ndiyootumina mulilo kubantu bamu Juda ooyo uuyoosyukuta nkwakwa zya Jelusalemu.”

Leza mbwaakabeteka Isilayeli

⁶ Mboobu mbwaamba Mwami Leza ulati, “Akaambo kazinyonyoono nzyobandicitila bamu Isilayeli, nsikooleka kunyema pe. Aaba bauzya baluleme ansiliva, babulide babauzya ndyasyo. ⁷ Balyatauka mitwe yabacete mbuli kuti balyatauka lusuko lwaansi, balakaka kubacitila ziluleme badyaminidwe. Wisi amwanaakwe mulombe boonse boona aamusimbi omwe cakuti basofwaazya zina lyangu lisalala. ⁸ Baloona kumbali aazipaililo zyoonse kulala amajansi ngobanyanga bantu kuba cijatilizyo muŋanda yaleza wabo, balanywa waini ngubakali kubbadezya bamwi.

⁹ “Ndakanyonyoona Baamoli kabalibwenene, nokuba kuti bakali kulampa mbuli milombe, akuyuma mbuli mibanga. Ndakanyonyoona micelo yabo atala, akuzyula miyanda yabo kunsi aanyika. ¹⁰ Nywebo ndakamugwisya mu Ijipiti, ndakamusolweda kwamyaka iili makumi one munkanda kuti nkamupe nyika ya Baamoli. ¹¹ Akati kabana banu ndakamupa basinsimi, aakati kabakubusi banu ndakamupa Banazili. Sena eeci tacili kasimpe nobantu ba Isilayeli? Mbwaamba Mwami Leza. ¹² Pele mwakanywisya Banazili waini akulailila basinsimi kuti batasinsimi pe. ¹³ Nkaako lino ndiyoomupwaya mbuli ŋola mbwiipwayaula niizwide maila. ¹⁴ Basiluno tabakakonzyi kutija, basinguzu tabakakonzyi kuliyumya, basilumamba tabakakonzyi kulivuna pe. ¹⁵ Basimivwi tabakakonzyi kuzyandamana, basilumamba balapuka tabakatiji pe, awalo simabbiza takakonzyi kulivuna. ¹⁶ Naba silumamba sicamba uyootija acintanda buzuba oobo.” Mbwaamba Mwami Leza.