Amosi 1

¹ Ngaaya majwi aa Amosi, umwi wabeendelezi baku Tekowa. Waamba zyamakani aacisi ca Isilayeli myaka yobilo kuzungaana kwanyika kakutanaba, ciindi Uziya kali mwami wacisi ca Juda a Jelobowamu mwanaa Jehowasyi kali mwami wacisi ca Isilayeli. ² Amosi wakati, “Mwami Leza ulavuluma kuzwa kucilundu ca Ziyoni, ulazuma kuzwa ku Jelusalemu, macezezyo aabeembezi ayuma, atala aacilundu ca Kaameli apusama.”

Leza mbwaakabeteka babambene limwi a Baisilayeli

³ Mboobu mbwaamba Mwami Leza ulati, “Akaambo kazinyonyoono nzyobandicitila lyoonse bamumunzi wa Damasikasi, nsikooleka kunyema pe. Nkaambo bantu bawo bakauma bamu Giliyadi azilayi zijisi ntakisyo zyalubulo. ⁴ Ndiyootumina mulilo kuŋanda yabwami ya Hazayeli, ooyo uuyoosyukuta nkwakwa yamwami Benihadadi. ⁵ Ndiyoopwayaula mulyango wa Damasikasi, ndiyoonyonyoona mwami uukkala mukkuti lya Aveni, ayooyo uujisi musako wabwami mu Betiedeni. Bantu bamu Alamu bayootolwa mubwaange ku Kee.” Mbwaamba Mwami Leza.

Zya Filisiti

⁶ Mboobu mbwaamba Mwami Leza ulati, “Akaambo kazinyonyoono nzyobandicitila lyoonse bamunzi wa Gaza, nsikooleka kunyema. Akaambo kakuti wakajata bantu boonse babuleya akubauzya kucisi ca Edomu, ⁷ njootumina mulilo kubwaanda bwamunzi wa Gaza ooyo uuyoosyukuta nkwakwa zyawo. ⁸ Ndiyoonyonyoona mwami waku Asyidodi ayooyo uujisi musako wabwami mu Asyikeloni. Ndiyoolwana munzi wa Ekiloni mane kusikila Bafilisiti basyeede bakafwe.” Mbwaamba Mwami Leza.

Zyamunzi wa Taya

⁹ Mboobu mbwaamba Mwami Leza ulati, “Akaambo kazinyonyoono nzyobandicitila lyoonse bamunzi wa Taya, nsikooleka kunyema pe. Akaambo kakuti bakauzya bantu boonse bakatolwa mubwaange ku Edomu, baubausya cizuminano caluumuno, ¹⁰ ndiyootumina mulilo kubwaanda bwa Taya ooyo uuyoosyukuta nkwakwa zyawo.”

Zya Baedomu

¹¹ “Akaambo kazinyonyoono nzyobandicitila lyoonse bantu bamu Edomu, nsikooleka kunyema pe. Mbabakalwana banabokwabo apanga, bafutatika myoyo yabo, mukuti balilutide lyoonse, cakuti bakaindilizya mukunyema, ¹² ndiyootumina mulilo kumunzi wa Temani ooyo uuyoosyukuta nkwakwa zya Bozila.”

Zya Baamoni

¹³ Mboobu mbwaamba Mwami Leza ulati, “Akaambo kazinyonyoono nzyobandicitila lyoonse bantu bamu Amoni, nsikooleka kunyema pe. Akaambo kakuti bakafundula bakaintu baminsi baku Giliyadi kutegwa bakwakwabule munyinza, ¹⁴ ndiyooumpa bwaanda bwamunzi wa Labba mulilo uuyoosyukuta nkwakwa zyawo banooyookwemba mubuzuba bwankondo, guwo linooyoobbubbula mubuzuba bwalyo. ¹⁵ Mwami wawo uyootolwa mubwaange, walo antoomwe abalupati-pati bakwe.” Mbwaamba Mwami Leza.