2 Timoti 3

Zyamazuba aamamanino

¹ Koziba kuti mumazuba aamamanino kuyooba ziyoosya. ² Nkaambo bantu bayooba basikuliyanda, basikuyanda mali, basikulisumpula, basikatwango-twango, basimatusi, bataswiilili bazyali, batalumbi, abatasalali. ³ Bayooba basilunya, batalekeleli, basikubejelezya, batalijati, basibukali, batayandi zibotu. ⁴ Bayooba basilucengo, batatilimuki kuziyoosya, basikulikankaizya, bayanda kulibotezya mucilawo cakubotezya Leza. ⁵ Balabamba ziyanza zyabukombi, pele nguzu zyambubo balazikaka. Bantu bali boobo kobatantamuka. ⁶ Bamwi babo banjila mumaanda kuya boongelezya bamacembele bapenzegwa azibi zyabo beendelezegwa azisusi zisiyene-siyene. ⁷ Nikuba kuti balaiisigwa lyoonse tabakonzyi kuziba zyabwini. ⁸ Mbubonya mbuli Jenesi a Jambulesi mbubakakazya Mozesi, mbubonya oobo abalo bantu aaba mbobakazya zyabwini. Mbantu bali amiyeeyo mibi alimwi lusyomo lwabo ndwakuupaupa aameso. ⁹ Pele kunyina nkobaya, nkaambo bantu boonse bayoobona bufuba-fuba bwabo, mbubonya mbubwakabonwa ba Jenesi a Jambulesi.

Malailile aamamanino

¹⁰ Lino yebo ulizi kabotu njiisyo zyangu, bweende bwangu, makanze aangu, lusyomo lwangu, kukkazika moyo kwangu, luyando lwangu, lukakatilo lwangu, ¹¹ mapenzi aangu, makatazyo aangu, azintu eezyo zyakandicitikila ku Antiyoki, Ikoniyumu, aku Lisitula. Ndakapenga kapati, pele Mwami wakandivuna muli zyoonse eezi! ¹² Ncobeni, boonse bayanda kupona mubuumi bwakuswiilila Leza muli Kilisito Jesu bayoopenzegwa. ¹³ Pele bantu babi banooyoobija akubijila limwi. Bayooena bamwi alimwi akweenwa lwabo beni. ¹⁴ Pele yebo kojatisya makani aayo ngookaiya, alimwi ngozi kuti ngabwini. Nkaambo ulizi aabo bakakwiisya, ¹⁵ alimwi kuzwa ciindi nookacili mwana wakaziba Malembe aasalala aakonzya kukupa busongo bwakufutulwa kwiindila mukusyoma Kilisito Jesu. ¹⁶ Malembe oonse akapegwa a Leza alimwi alagwasya mukwiisya zyabwini, mukukasya zitaluleme, mukululamika zitaluleme eezyo, amukulailila bantu zyabuumi bulondokede. ¹⁷ Malembe alagwasya mubelesi wa Leza kuti aelele akukonzya kucita kufumbwa ziluleme.