2 Timoti 1
1 Ndime Paulu, mutumwa wa Kilisito Jesu mukuyanda kwa Leza kweendelana acisyomezyo cabuumi ncotwakasyomezegwa muli Kilisito.
2 Ndakujuzya mwanaangu Timoti uuyandwa. Leza Taata a Kilisito Jesu Mwami wesu, bakubede aaluse, lweengelelo akukupa luumuno.
Paulu mbwaakayumya-yumya Timoti
3 Ndalumba Leza masiku asikati ciindi nekuyeeya mukukomba kwangu. Leza ngonguwe ngwembelekela milimo amoyo uusalala mbubuli bwakali kucita basikale besu. 4 Ndayeeya kulila kwako, alimwi ndayandisisya masiku asikati kukubona kuti mbe alutangalo lupati. 5 Lyoonse ndaibaluka lusyomo lwako lwini-lwini. Lusyomo oolu lwakali muli banyokokulu ba Loisi kusaanguna amuli banyoko ba Yunisi, alimwi nsidonaiki kuti moluli amulinduwe mbubonya. 6 Nkaambo kaako ncendakwiibalusizya nkuti ubelesye caabilo cakakupa Leza ciindi nindakakubikka maanza. 7 Nkaambo Leza taakwe naakatupa moyo wabukandu pe, wakatupa nguzu, luyando, akulijata.
8 Utafwi nsoni kwaamba zya Mwami wesu pe, alimwi utafwi nsoni akaambo kandime ndemwaange wakwe. Pele ulibambile kupenga akaambo ka Makani Mabotu kweendelana anguzu zikupa Leza. 9 Ooyo wakatufutula akutwiita kuti tube basalali bakwe. Takuli kwaamba kuti twakaitwa nkaambo kamilimo mibotu njitwakacita pe, pele twakaitwa mukweendelana amakanze aakwe mwini alimwi nkaambo muli Kilisito Jesu wakatubeda aaluse ciindi kacitanatalika.
10 Pele lino Leza watuyubunwida eezi mukuboola kwa Mufutuli wesu Kilisito Jesu, nguwe wakamanya nguzu zyalufu akubonya buumi butamani kwiindila mu Makani Mabotu.
11 Leza wakandisala kuti mbe mukambausi, mutumwa, amwiiyi wa Makani Mabotu. 12 Ncenciceeco ncempengela boobu. Nikuba boobo nsyuusi nsoni pe, nkaambo ndimuzi ooyo ngwesyoma. Aboobo ndili kasimpe kuti ulakonzya kubamba kabotu kusikila buzuba bwalubeta eezyo nzyaakandipa kuti mbambe. 13 Tobela majwi meni-meni oonse ngookamvwa kulindime kuti abe citondezyo cako. Ucite eezi mulusyomo aluyando ndotujisi muli Kilisito Jesu. 14 Kozibamba zibotu zyakapegwa kulinduwe a Muuya Uusalala uuli mulindiswe.
15 Ulimvwide kale kuti boonse bali mu Asiya bakandisiya. Akati kabo kuli ba Figelasi a Heemogenesi. 16 Mwami abafwide luzyalo bamukwasyi wa Onesifolosi, nkaambo kanji-kanji wakali kundisamausya. Taakwe naakafwa nsoni nikuba kuti ndakali mwaange pe. 17 Mbwaakasikila buyo mu Loma, wakandiyandaula mane kusikila wandijana. 18 Mwami akamupe kuti ajane luse kuli Leza mubuzuba oobo. Ulizi kabotu-kabotu zyamilimo yoonse njaakandibelekela ku Efesusi.