2 Samuyele 9
Devedi a Mefibosyeti
1 Lino Devedi wakabuzya kuti “Sena kuli uucisyeede wamukwasyi wa Saulu naba omwe ngwekonzya kubeda aaluse akaambo ka Jonatani?”
2 Lino kwakali umwi mubelesi wamukwasyi wa Saulu, wakali kutegwa Ziba, mpawo bakamwiita kuti aboole kuli Devedi. Eelyo mwami wakati kulinguwe, “Sena ndonduwe Ziba?”
Wakati, “Ndime, O mwami wangu.”
3 Mwami wakabuzya kuti, “Sena taacikwe naba omwe wamukwasyi wa Saulu, ooyo ngwekonzya kubeda aaluse mbubonya mbuli mbwindakasyomezya ku Mwami Leza?” Ziba wakati kumwami, “Kuli mwana mulombe wa Jonatani, pele ulilemene maulu.”
4 Mwami wakabuzya kuti, “Uli kuli?”
Ziba wakaingula kuti, “Uli muŋanda ya Makee, mwana mulombe wa Amiyeli ku Lodeba.” 5 Mpoonya mwami wakatuma kuyoomuleta kuzwa kuŋanda ya Makee mwana wa Amiyeli ku Lodeba.
6 Nkaako Mefibosyeti mwanaa Jonatani, wakali muzyukulu wa Saulu, wakasika kuli Devedi akuvuntama mukulemeka. Devedi wakati, “Mefibosyeti.” Mpoonya wakaingula kuti, “Mwami.”
7 Devedi wakati kulinguwe, “Utayoowi, nkaambo njanda kukubeda aaluse akaambo kauso Jonatani, alimwi ndakuboozezya nyika yoonse yasyaanyokokulu Saulu, kwamana unoolya andime aatebule lyoonse.”
8 Aawo wakavuntama alimwi wati, “Ino mubelesi wako ninzi, sena ulakonzya kundibamba mebo neendi mbuli mubwa uufwide?”
9 Mwami wakaita Ziba mubelesi wa Saulu, wakamwaambila kuti, “Zintu zyoonse Saulu nzyaakajisi azyoonse zyakali zyamukwasyi wakwe ndazipa kumwana wasimalelo wako.” 10 Ono yebo abana bako balombe antoomwe ababelesi bako munoomulimina nyika eeyo. Mukuti yaakuzyala micelo bamukwasyi wakwe bakajane cakulya, pele walo lwakwe tunoolya aawe lyoonse. Lino Ziba wakajisi bana balombe bali kkumi abasanu ababelesi bali makumi obilo.
11 Mpoonya Ziba wakati kumwami, “Coonse eeco mwami simalelo wangu ncaalailila ncencico mubelesi wakwe ncayoocita.”
Mbombuboobu Mefibosyeti mbwaakalida aatebule lya Devedi, mbuli umwi wabana balombe bamwami. 12 Awalo Mefibosyeti wakajisi mwana mulombe wakali kutegwa Mika. Boonse bamukwasyi wa Ziba bakaba babelesi ba Mefibosyeti. 13 Mefibosyeti wakakkala mu Jelusalemu, nkaambo lyoonse wakalikulida kuŋanda yamwami. Mefibosyeti wakalilemene maulu oonse obilo.