2 Samuyele 8

Devedi mbwaakazunda

¹ Kusule azeezi Devedi wakalwana Bafilisiti akubazunda, wakatola munzi wa Metegama kuzwa ku Bafilisiti aabo. ² Alimwi wakazunda Bamowabu. Wakabalazika ansi akubeeleka antambo. Eelyo wakeeleka milongo yobilo kuti ijayigwe, alimwi mulongo omwe wakazwide wakuuleka kuti kuucipona. Aboobo Bamowabu wakabacita kuti kabatela kulinguwe.

³ Alimwi Devedi wakazunda Hadadeza, mwanaa Lehobu mwami wacisi ca Zoba, ciindi Hadadeza naakali kukwakwabula cisi cakwe kusikila kumulonga wa Yufuletisi. ⁴ Mpoonya Devedi wakatola kuzwa kulinguwe basimabbiza bali cuulu amyaanda iili ciloba, abasilumamba balizyuulu zili makumi obilo, eelyo wakakosoola misisa yamabbiza oonse, wakaleka buyo aankalaki zili mwaanda. ⁵ Nkabela ciindi Baalamu baku Damasikasi nibakasika kuzoogwasya Hadadeza, Devedi wakajaya baalumi baku Siliya bali zyuulu zili makumi obilo azibili. ⁶ Mpoonya wakabikka basilumamba mu Siliya yamu Damasikasi, nkabela Baalamu bakaba bazike ba Devedi akutalika kutela. Eelyo Leza wakagwasya Devedi kuti azunde kufumbwa ooko nkwaaya. ⁷ Aboobo Devedi wakatola ntobo zyangolida eezyo zyakabwezedwe abazike ba Hadadeza wazileta ku Jelusalemu. ⁸ Nkabela kuzwa ku Beta a Belotayi, minzi ya Hadadeza, mwami Devedi wakabweza mukuba munji kapati.

⁹ Lino ciindi Toyi mwami waku Hamati naakamvwa kuti Devedi wakazunda basilumamba boonse ba Hadadeza, ¹⁰ Toyi wakatuma mwanaakwe Jolamu kuti akajuzye Devedi akumulumbaizya, mukuti wakalwana Hadadeza akumuzunda, Hadadeza ooyu lyoonse wakajisi nkondo a Toyi. Nkabela Jolamu wakatolelezya azintu zyansiliva angolida azyamukuba. ¹¹ Lino Devedi wakapa ku Mwami Leza zintu zyoonse eezi kubikkilizya amali aansiliva, aangolida. Zyoonse eezi wakazipa kuzwa kumisyobo yoonse njaakazunda, ¹² kuzwa ku Edomu aku Mowabu aku Baamoni aku Bafilisiti aku Baameleki akusaala zya Hadadeza mwanaa Lehobu, mwami waku Zoba.

¹³ Nkaako Devedi lwakwe wakaba aampuwo mpati. Ciindi naakapiluka, wakajaya Baedomu bali zyuulu zili kkumi alusele mukkuti lya Munyo. ¹⁴ Wakabikka basilumamba mu Edomu, nkabela boonse Baedomu bakaba bazike bakwe. Mwami Leza wakagwasya Devedi kuti azunde koonse nkwaaya.

¹⁵ Mbombuboobu Devedi mbwaakeendelezya mu Isilayeli yoonse, Devedi wakali kubeteka bantu bakwe boonse cabululami. ¹⁶ Jowabu mwanaa Zeluiya ngowakali silutwe wabasilumamba, Jehosyafati mwana wa Ahiludi ngowakali mulembi wamakani. ¹⁷ Zadoki mwana wa Ahitubi a Ahimeleki mwana wa Abiyata mbebakali bapaizi, Selayiya ngowakali mulembi, ¹⁸ Benaiya mwanaa Jehoiyada wakali ngosilutwe wa Bakeleti a Bapeleti, eelyo bana balombe ba Devedi bakali balailili.