2 Samuyele 3

¹ Lino kwakali nkondo kwaciindi cilamfu akati kabasilumamba ba Saulu aba Devedi, ba Devedi bakali kuyabuyuma-yuma, kakuli ba Saulu bakali kuyabuteta-teta.

Bana balombe ba Devedi

² Devedi wakazyala bana balombe ku Hebuloni. Mwanaakwe mutaanzi wakali Aminoni ngwaakamuzyalila Ahinowamu waku Jezuliili, ³ wabili wali Kileyabu, ngwaakamuzyalila Abigelo mukamufu Nabali waku Kaameli, watatu wakali Abisalomu, mwana mulombe wa Maaka, mwanaa Talimayi mwami waku Gesyu, ⁴ wane wakali Adonija, mwana ngwaakamuzyalila Hagiti, wasanu wakali Syefatiya, ngwaakamuzyalila Abitali, ⁵ wacisambomwe wakali Itileyamu, ngwaakamuzyalila Egila. Aaba mbabana mbaakazyalila ku Hebuloni.

Abina mbwaakayanzana a Devedi

⁶ Lino nikwakacili nkondo akati kabasilumamba ba Saulu aba Devedi, Abina wakalikomezya kuli basilumamba ba Saulu.

⁷ Saulu wakalijisi mwanakasuwa wakwe zina wakali Lizipa, mwana wa Aya. Isyibosyeti wakati kuli Abina, “Nkaambo nzi ncoolalika mwanakasuwa wataata?” ⁸ Mpawo Abina wakanyema nkaambo kamajwi aakaamba Isyibosyeti. Walo wakati, “Sena uyeeya kuti ndimubwa ku Bajuda basinkondoma? Kuzwida kumatalikilo ndali kusyomeka kuli Saulu uso, akubanabokwabo abeenzinyina alimwi nsiindakwaaba kuli Devedi, wamana yebo uti ndalalika. ⁹ Aboobo Mwami Leza andisubule akwiindilila kuti naa intacitili Devedi eeco Mwami Leza ncaakamukonkezya. ¹⁰ Ncobeni ndagwisya bulelo kumukwasyi wa Saulu akubupa Devedi, kuti alele Baisilayeli a Bajuda, kuzwida ku Dani kusikila ku Biiyasyeba.” ¹¹ Aawo Isyibosyeti taakaingula niliba jwi lyomwe, nkaambo wakali kumuyoowa.

¹² Abina wakatumya mulomo kuli Devedi ku Hebuloni wakati, “Ino eeyi nyika njiyani? Atupangane cizuminano, kutegwa mebo nkakugwasye kuleta Isilayeli yoonse kulindinywe.”

¹³ Mpawo Devedi wakati, “Mbubo. Ndiyoopangana cizuminano anduwe. Pele kuli cintu comwe nceyanda kulinduwe, tokooyoobona busyu bwangu pe, ccita usaangune kundeetela Mikalo, mwanaa Saulu ciindi ncozoondiswaya.” ¹⁴ Nkabela Devedi wakatumya mulomo kuli Isyibosyeti, mwanaa Saulu wakati, “Kondipa mukaintu wangu Mikalo ngwindakakwata andomo zili mwaanda zya Bafilisiti.”

¹⁵ Aawo Isyibosyeti wakatuma bantu kuti bakamugwisye kumulumaakwe Palitiyeli, mwanaa Laisyi.

¹⁶ Pele mulumaakwe wakatobela, kuyabulila nzila yoonse mane kuyoosika ku Bahulimu. Mpoonya Abina wakati kulinguwe, “Koya, piluka.” Eelyo wakapiluka.

¹⁷ Lino Abina wakaambaula abapati ba Baisilayeli kuti, “Ciindi cakamana mwakali kuyandaula Devedi kuti abe mwami wanu. ¹⁸ Lino kamucita oobo mbubonya nkaambo Mwami Leza wakasyomezya Devedi kale wakati, ‘Ndiyoonununa bantu bangu Baisilayeli ku Bafilisiti, abasinkondonyina boonse kwiindila mulinduwe Devedi omubelesi wangu.’” ¹⁹ Alimwi Abina wakakanana amukowa wa Benjamini, azwe waawo wakainka kuyooambila Devedi ku Hebuloni zyoonse eezyo Baisilayeli a Babenjamini nzyibakayeeya kucita.

²⁰ Ciindi Abina naakasika abaalumi bali makumi obilo kuli Devedi ku Hebuloni, Devedi wakacitila Abina pobwe abaabo bakali aanguwe. ²¹ Abina wakati kuli Devedi, “Ndilanyamuka, ngunke ndikasungilizye Baisilayeli boonse kutobela nduwe omwami wangu. Bazoopange cizuminano anduwe cakuti uzoobalele mbuli mboyanda.” Aboobo Devedi wakazumizya Abina, eelyo wakainka caluumuno.

Jowabu mbwaakajaya Abina

²² Mpoonya basilumamba ba Devedi bakaboola a Jowabu kuzwa kukusaala, kabajisi anzibakasaala zinji-zinji. Pele Abina taakacili a Devedi ku Hebuloni, nkaambo wakamutumide kale, wakaluunkide caluumuno. ²³ Ciindi Jowabu abasilumamba boonse aabo bakali aanguwe, nibakasika, wakaambilwa kuti, “Abina mwanaa Nee walisikide kumwami, nkabela wamulekela kuti apiluke, wainka muluumuno.” ²⁴ Amvwe boobo Jowabu wakainka kumwami waakuti, “Ncinzi ncoocita? Tee, Abina walisikide kulinduwe, ino nkaambo nzi ncoomuzumizya kuti ainke, ngooyu wainka ncobeni? ²⁵ Ulizi kuti Abina walisikide kuti azookucenge, akuzooziba zyoonse nzyocita.”

²⁶ Jowabu naakazwa kuli Devedi, wakatuma bantu kuti batobele Abina, eelyo bakamujana kumukalo wa Sila bamuleta. Pele Devedi taakwe ncaakazi pe. ²⁷ Ciindi Abina naakapilukila ku Hebuloni, Jowabu wakamutola kumbali munsi amulyango akwaambaula anguwe cakusisikizya. Nkabela nkukonya ooko wakamuyasa mubula wafwa, wakacita oobu mukupilusizya lufu lwa mwanookwabo Asaheli. ²⁸ Ciindi Devedi naakacimvwa eeci wakati, “Mebo abantu bamubulelo bwangu tatujisi mulandu ku Mwami Leza akaambo kalufu lwa Abina mwanaa Nee. ²⁹ Mwami Leza asubule Jowabu abaciinga cawisi coonse. Alimwi mumukwasyi wakwe lyoonse amube baabo baciswa bulwazi bwabakaintu niciba cinsenda naa balemene naa bajaigwa munkondo naa basinzala.” ³⁰ Mbombuboobu Jowabu a Abisyayi munyina mbubakajaya Abina nkaambo kakuti wakajaya mwanookwabo Asaheli munkondo ku Gibiyoni.

³¹ Mpoonya Devedi wakati kuli Jowabu akubantu boonse aabo bakali aanguwe, “Amudelaule zisani zyanu musame masaka kulila Abina. Alimwi mwami Devedi mwini wakali kuyootobela batembaizya mutumba. ³² Bakazikka Abina ku Hebuloni, nkabela mwami wakalila cakoongolola acuumbwe ca Abina, alimwi bantu abalo boonse bakalila kapati.” ³³ Mpawo mwami Devedi wakaimba lwiimbo lwakulila Abina akuti,

“Sena Abina uleelede kufwa mbuli mubwa?

³⁴ Maanza aako taakwe naaangidwe,

aalo maulu aako taakwe naaangidwe anketani.

Mbuli muntu mbwajaigwa abataluleme,

mbubonya oobo mbookajaigwa ayebo.”

Nkabela bantu boonse bakacili kumulila.

³⁵ Mpoonya bantu boonse bakaboola kuti bakombelezye Devedi kuti alye kalicili sikati, pele Devedi wakakonka, wakati, “Mwami Leza andisubule akwiindilila kuti naa ndilabile niciba cimwi cintu zuba kalitana bbila.” ³⁶ Bantu nibakamvwa eeci, bakamuleka nkaambo kufumbwa mwami ncaakali kucita cakali kubabotezya bantu. ³⁷ Aboobo bantu boonse bakali kukkala a Devedi a Baisilayeli boonse bakaziba kuti tiikwakali kuyanda kwamwami kujaya Abina mwanaa Nee. ³⁸ Mwami wakati kubabelesi bakwe, “Sena tamuzi kuti sunu buno buzuba kwafwa muntu mulemu alimwi mupati mu Isilayeli? ³⁹ Nkaako buzuba buno ndabula nguzu nikuba kuti ndimwami munanike, aaba baalumi Bazeluiya bandikatazya kapati. Leza abweedezye simucitazibi mbubonya mbuli kububi bwakwe.”