2 Samuyele 24
Devedi mbwaakabala bantu
1 Lino Mwami Leza wakakalalila Baisilayeli, nkabela wakacitya kuti Devedi abapenzye naakati, “Kamuya mukabale bantu ba Isilayeli aba Juda.”
2 Mpawo Devedi wakati kuli Jowabu akuli basilutwe babasilumamba aabo bakali aanguwe, “Kamuya mumisyobo yoonse ya Isilayeli kuzwa ku Dani kusikila ku Biiyasyeba, kamuya mubale bantu bakonzya kuya kunkondo kutegwa ndizibe naa bali bongaye.”
3 Pele Jowabu wakatongookela mwami wati, “Mwami Leza wako avuzye bantu aabo ziindi zili mwaanda kwiinda mbobabede sunu, wamana o mwami simalelo wangu ulibonene. Ino ono nkaambo nzi mwami simalelo wangu ncayanda kuti bantu babalwe?” 4 Nikuba boobo jwi lyamwami ndilakamvwigwa. Aboobo Jowabu abasilutwe babasilumamba bakainka kuzwa kumwami kuyoobala bantu ba Isilayeli.
5 Bakazubuka Jolodani, bayaka zivuka munsi aku Aloye kumusanza mumumpata, nibakamana bakainda mu Gadi baakusika ku Jaza. 6 Bakaakusika ku Giliyadi alubazu lwa Tatimuhodisyi, bamane bakayaka ku Danijaani, mbaabo bazinguluka baya ku Sidoni. 7 Bamane baakusika kunkwakwa zya Taya akuminzi yoonse ya Bahivi a Bakenani, kumanizya bakaya ku Biiyasyeba kumusanza wa Juda. 8 Lino nibakamana kweendeenda munyika yoonse, bakaboola ku Jelusalemu kumamanino amyezi iili fuka amazuba aali makumi obilo. 9 Mpawo Jowabu wakapa mweelwe wabantu bakali kukonzya kulwana kumwami, eelyo mu Isilayeli kwakali basilumamba basinguzu bali myaanda iili zyuulu zili lusele, bantu ba Juda bakali myaanda iili zyuulu zyosanwe.
10 Pele Devedi wakausa mumoyo ciindi naakamana kubazya bantu. Eelyo wakati ku Mwami Leza, “Ndabisya kapati kucintu eeci ncindacita. Pele lino, yebo O Mwami Leza, lekelela mulandu wamubelesi wako nkaambo ndacita cabufuba-fuba.”
11 Nkabela Devedi naakabuka cifumo-fumo jwi lya Mwami Leza lyakasika kumusinsimi Gadi kaliti, 12 “Koya ukaambile Devedi kuti, ‘Mboobu mbwaamba Mwami Leza, kuli zintu zyotatwe alinzizyo, usale comwe nceticite.’” 13 Aboobo Gadi wakasika kuli Devedi akumwaambila kuti, “Mboobu mbwaamba Mwami Leza, sala muli zeezi zyotatwe, sena kube nzala munyika yako kwamyaka yotatwe? Naa myezi yotatwe yakuti kotija basinkondonyoko kabakutandaanya amapanga? Naa mazuba otatwe aacuumo munyika yako? Koyeeya lino akuziba cintu eeco ncenjooambila ooyo wandituma.”
14 Mpoonya Devedi wakati kuli Gadi, “Ndili mumapenzi mapati. Lino andaabwe buyo mumaanza aa Mwami Leza, nkaambo luse lwakwe ndupati, pele nditaabwi mumaanza aabantu.”
15 Aboobo Mwami Leza wakatuma bulwazi mu Isilayeli kuzwa cifumo-fumo mane kusikila kuciindi cakaandabwe, nkabela kwakafwa bantu kuzwa ku Dani kusikila ku Biiyasyeba baalumi bali zyuulu zili makumi aali ciloba. 16 Nkabela mungelo wakali kujaya bantu, naakatandabika janza kuti anyonyoone Jelusalemu, Mwami Leza wakamulesya akwaamba kuti kulinguwe. “Mbubo lino, leka.” Wakaleka. Ooyo mungelo wakali kumbali acuumino ca Alauna Mujebusi.
17 Ciindi Devedi naakabona mungelo wakali kujaya bantu, wakati ku Mwami Leza, “Mebo ndime ndabisya kucita cintu eeci, pele bantu aaba, ino bacita nzi? Noosubula ndime amukwasyi wangu.”
18 Lino Gadi wakasika kuli Devedi buzuba oobo mbubonya, wakaamba kuti kulinguwe, “Koya, ukayakile Mwami Leza cipaililo kucuumino ca Alauna Mujebusi.” 19 Mpawo Devedi wakainka mbubonya mbuli Mwami Leza mbwaakalailila kwiindila muli Gadi. 20 Nkabela Alauna naakabona mwami ababelesi bakwe kabaza buza kulinguwe, Alauna wakaya wakotamina mwami mukumulemeka. 21 Mpawo Alauna wakati, “Nkaambo nzi mwami simalelo wangu naasika kumubelesi wakwe?”
Devedi wakati, “Ndazooula cuumino cako kuti ndiyakile Mwami Leza cipaililo kutegwa cuumo cileke bantu.”
22 Eelyo Alauna wakati kuli Devedi, “Mwami simalelo wangu, atole akupaizya kufumbwa eeco cilangika kubota kulinguwe, mbaaba basune bacipaizyo cakutenta, azilayi zyakuumya amajoko abe nkuni. 23 Zyoonse eezi, omwami ndazipa kulinduwe.” Mpawo Alauna wakaindilizya akuti kumwami, “Mwami Leza wako akutambule.”
24 Pele mwami Devedi wakati kuli Alauna, “Peepe, ndiyanda kuzyuula buya, nsikonzyi kupaizya cipaizyo cakutenta ku Mwami Leza wangu ncindataula pe.” Aboobo Devedi wakaula cuumino abasune amali aamasyekeli aansiliva aali makumi osanwe. 25 Eelyo Devedi wakayakila Mwami Leza cipaililo okuya, wakapaizya zipaizyo zyakutenta azipaizyo zyalumvwano. Aboobo Mwami Leza wakamvwa kukomba kwa Devedi nkwaakali kukombela Baisilayeli, nkabela cuumo cakamana.