2 Samuyele 23
Lino ngaaya majwi aa Devedi aamamanino
1 Ndoolu lwiimbo lwa Devedi mwanaa Jese.
Ooyo Mwami Leza Sijulu lyamajulu ngwaakasumpula,
Leza wa Jakobo ngwaakananika kuti abe mwami,
muntu uuyandisya kwiimba nyimbo zya Isilayeli.
2 Muuya wa Mwami Leza ulaambaula mulindime,
majwi aakwe ngaazwa mumulomo wangu.
3 Leza wa Jakobo waamba,
mwaala wa Isilayeli wati kulindime,
“Ciindi muntu neendelezya bantu buluzi
uleendelezya mukulemeka Leza.
4 Ulabala mbuli mumuni wa cifumo-fumo.
Nolizwa zuba uba mbuli mumuni,
mumuni wa cifumo-fumo citakwe makumbi.
Walo uuli mbuli mumuni uumenya kwamana kuwa mvula.”
5 Mbombuboobu Leza mbwayooleleka balunyungu lwangu.
Nkaambo wakapangana cizuminano citamani andime
cibambidwe kabotu muzintu zyoonse ciliimvwi nji.
Uyoondigwasya akundipa zyoonse nzyeyanda.
6 Pele bakunze boonse bali mbuli mamvwa
aatakonzyi kugwisigwa munzila,
aayo aatajatiki ajanza.
7 Muntu uuyanda kwaagwisya, weelede kubelesya sumo,
niciba cibulo cimwi, alatentwa mumulilo.
Basilumamba ba Devedi bali aampuwo
8 Ngaaya mazina aabaalumi basinguzu aabo Devedi mbaakajisi: Josyebubasyebeti Mutakemoni, silutwe wabapati botatwe, nguwakalwana akujaya bantu bali myaanda iili lusele, boonse aabo wakabajaya munkondo yomwe.
9 Musule lyayooyo kwakali Eliyazaa mwanaa Dodayi Muaho. Wakali umwi wabasintanze botatwe Devedi mbaakali aabo ciindi nibakatalika Bafilisiti bakabungene ku Damimu kuti balwane. Ciindi eeci Baisilayeli bakazwide kale. 10 Walo wakasyaala kajaya Bafilisiti mane kusikila janza lyakwe nilyakakatala, pele lyakalaangatide kupanga. Buzuba oobu Mwami Leza wakamuzundya, mpawo beenzinyina bakaboola kuzoosaala baabo bakajaigwa.
11 Wakali kutobela ooyu wakali Syama mwana wa Age Muhala. Ciindi Bafilisiti nibakabungene ku Lehi, ooko kwakali muunda uuzwide bunyangu Baisilayeli bakatija Bafilisiti. 12 Pele walo wakaima akati kamuunda akuukwabilila, wakabajaya Bafilisiti banji-banji mukuti Mwami Leza wakamuzundya.
13 Lino ciindi cakutebula, botatwe aakati kabasilutwe bali makumi otatwe bakaya kuli Devedi kumpangala yaku Adulamu, basilumamba ba Bafilisiti bakayakide zivuka mukkuti lya Lefaimu. 14 Devedi wakali mumpangala, nkamu yabasilumamba ya Bafilisiti yakali ku Betelehemu. 15 Lino Devedi naakafwa nyota wakati, “Nikwali muntu uunga wanditekela maanzi aakunywa kuzwa kumukalo uuli munsi aamanjililo aaku Betelehemu.” 16 Mpoonya aabo baalumi botatwe basintanze bakaandulula muzivuka zya Bafilisiti, bateka maanzi mumukalo uuli amanjililo aa Betelehemu, baaleta kuli Devedi. Pele taakaanywa pe, wakaatila ansi ku Mwami Leza. 17 Wakati, “Peepe O Mwami Leza, nsikonzyi kwaanywa maanzi aaya. Nkaambo ndaanywa ndilabaanga ndinywa bulowa bwabaalumi aaba balisangide.” Akaambo kakuti bakalisanga kuyooteka maanzi, Devedi taakaanywa pe.
Eezi nze zintu nzibakacita baalumi aabo botatwe basintanze.
18 Lino Abisyayi munyina Jowabu, mwanaa Zeluiya, walo wakali silutwe wabaaba bali makumi otatwe, ciindi naakalwana basinkondonyina, wakajaya baalumi bali myaanda yotatwe. Nkaako wakaduma mbubuli baya bamwi botatwe. 19 Wakali kulemekwa kwiinda baabo bamwi bali makumi otatwe akuba silutwe wabo, pele taakali kweezyanyizigwa abaabo botatwe bataanzi.
20 Benaiya mwanaa Jehoiyada, awalo wakali mwaalumi singuzu waku Kabuzeeli, wakali silumamba wakacita milimo yabusicamba. Wakajaya basilumamba beni-beni bobilo Babamowabu. Bumwi buzuba kakutontola kakuli caanda wakanjila mudindi mwakali syuumbwa wamujaya. 21 Wakajaya Muijipiti, mwaalumi mupati. Ooyu walo wakajisi sumo lili mbuli musako wasikuluka. Benaiya wakamulwana ankoli buyo, wamunyanga sumo eelyo akumujazya ndilyo. 22 Eeyi njemilimo yabusicamba njaakacita Benaiya mwanaa Joiyanda wabamwi bali makumi otatwe. 23 Wakali dumide akati kabali makumi otatwe nikuba kuti taakali mbuli botatwe baya. Devedi wakacita kuti abe ngomulangi wabalindizi bakwe.
24 Muli baaba bali makumi otatwe kwakali Asaheli munyina Jowabu, Elihanani mwanaa Dodo uuzwa ku Betelehemu, 25 Syama Muhalo, Elika Muhalo, 26 Helezi Mupeliti, Ila mwana wa Ikesyi uuzwa ku Tekowa, 27 Abiyeza uuzwa ku Anatoti, Mebunayi Muhusyati, 28 Zalimoni Muahoni, Mahalayi uuzwa ku Netofa, 29 Helebu mwanaa Baana waku Netofa, Itayi mwanaa Libayi uuzwa ku Gebiya mucisi ca Mubenjamini, 30 Benaiya Mupilatoni, Hidayi uuzwa kumakkuti aaku Gaasyi, 31 Abiyaliboni Muaba Azimaveti waku Bahuli, 32 Eliyaba Musyaliboni, bana ba Jasyeni, Jonatani, 33 mwanaa Syama Muhalaa, Ahiyamu mwanaa Syalaa Muhalaa, 34 Elifeleti mwana wa Ahasibayi waku Maaka, Eliyamu mwana wa Ahitofeli waku Gilo, 35 Hezilo Mukaameli, Palayi Mualabu, 36 Igali mwanaa Natani waku Zoba, Bani waku Gadi, 37 Zeleki Muamoni, Nahalayi Mubeeloti sikubweza zilwanyo zya Jowabu mwanaa Zeluiya, 38 Ila Mujatii, Galebu Mujatii, 39 Uliya Muhiti, antoomwe bakali makumi otatwe aciloba.