2 Samuyele 21
Balunyungu lwa Saulu mbubakajaigwa
1 Lino kwakali nzala mubwami bwa Devedi kwamyaka yotatwe, iiccililene. Nkaako Devedi wakabuzya ku Mwami Leza. Mwami Leza wakati, “Mulandu uuli aali Saulu alunyungu lwakwe, nkaambo bakajaya Bagibiyoni.” 2 Aboobo mwami Devedi wakaita Bagibiyoni. Bagibiyoni tiibakali Baisilayeli pe, bakali Baamoli basyeede. Nikuba kuti Baisilayeli bakakonkezezye kuti tabakabajayi, pele Saulu wakabajaya nkaambo wakali kuyandisisya Baisilayeli a ba Juda. 3 Mpoonya Devedi wakati ku Bagibiyoni, “Ino ndimucitile nzi? Ino ndimulungile nzi, kuti muleleke bantu ba Mwami Leza?”
4 Bagibiyoni bakati kulinguwe, “Mulandu uuli akati kesu a Saulu, alunyungu lwakwe tuukonzyi kulungwa aamali buyo pe, alimwi swebo tatukonzyi kujaya muntu mu Isilayeli.”
Mpawo Devedi wakati kulimbabo, “Ino ono muyanda kuti ndimucitile nzi?”
5 Bakati kumwami, “Saulu wakatupenzya akutunyonyoona swebo, mukuti tutabi aabusena munyika ya Isilayeli, 6 nkaako tupe bana balombe balunyungu lwakwe bali ciloba, kutegwa tukabaangilile kumbele lya Mwami Leza ku Gibeya, munzi wa Saulu munanike wa Leza.”
Mwami Devedi wakati, “Ndamupa.”
7 Pele Devedi wakafwida Mefibosyeti mwanaa Jonatani uuli muzyukulu wa Saulu luse, nkaambo kacikonke ca Devedi a Jonatani mwanaa Saulu kumbele lya Mwami Leza. 8 Amane mwami Devedi wakatola bana balombe bobilo ba Lizipa, mwana musimbi wa Aya, aabo mbaakazyalila Saulu, Amoni a Mefibosyeti, alimwi abana balombe bosanwe ba Melabu, mwana musimbi wa Saulu aabo mbaakazyala kuli Adiliyeli mwanaa Bazilayi Mumeholati. 9 Wakabapa ku Bagibiyoni, balo bakabaangilila kucilundu kumbele lya Mwami Leza, eelyo boonse baali ciloba bakafwa. Bakaangililwa mumazuba mataanzi aakutalika kutebula.
10 Lino Lizipa mwana wa Aya, wakabweza cisaka akuciyala atala aabbwe aawo aakali mitumba, kuzwa leelyo limwi cakawigwa mvula. Alimwi taakwe naakazumizya bayuni kuti bakkale amitumba ciindi casikati, nibaba banyama masiku.
11 Nkabela Devedi naakaambilwa eeco ncaakacita Lizipa mwana musimbi wa Aya mwanakasuwa wa Saulu, 12 Devedi wakainka akuyoobweza zifuwa zya Saulu azyamwanaakwe Jonatani kuzwa kubantu baku Jabesyigiliyadi, aabo bakazibbide kuzwa kubbuwa lyaku Betisyani, ooko Bafilisiti nkobakazyaanzikide. 13 Devedi wakaleta zifuwa zya Saulu kuzwa ooko antoomwe azyamwanaakwe Jonatani. Kumane bakalundika zifuwa zyabaabo bakaangilidwe. 14 Bamane bakazikka zifuwa zya Saulu azyamwanaakwe Jonatani munyika ya Benjamini, mumunzi wa Zela, mucuumbwe ca Kisyi wisi. Eelyo bakacita zyoonse mwami Devedi nzyaakalailila. Nkabela kuzwa waawo Leza wakamvwa kukomba kwabo.
Mbubakalwana a Bafilisiti
15 Cimwi ciindi Bafilisiti bakalwana a Baisilayeli, nkabela Devedi awalo wakainka antoomwe abasinkondo bakwe. Eelyo bakalwana Bafilisiti, cakuti wakakatala kapati. 16 Mpoonya Isyibibenobu, umwi wamantu, wakayanda kujaya Devedi. Bulemu bwasumo lyakwe lyamukuba bwakali masyekeli aali myaanda yotatwe wakalijisi apanga pya. 17 Pele Abisyayi mwanaa Zeluiya wakavuna Devedi, wakajaya Mufilisiti ooyo. Mpoonya bantu ba Devedi bakakonka bati, “Tokainki limbi kunkondo andiswe, mukuti ambweni inga wajaigwa.”
18 Niyakamana nkondo eeyi kwakabuka iimbi a Bafilisiti ku Gobu, mpoonya Sibekayi, Muhusyati, wakajaya Safu, umwi wamantu aayo.
19 Kumane yeeyi kwakabuka iimbi ku Gobu a Bafilisiti, mpoonya Elihanani, mwanaa Jaaleolegimu waku Betelehemu, wakajaya Lahimi munyina Goliyati Mugati, ooyu wakajisi sumo lyalusako luli mbuli sako lyasikuluka.
20 Alimwi kwakabuka aimbi nkondo ku Gati, kwalo ooko kwakali dintu lyakajisi manwe aali cisambomwe kujanza lyomwe-lyomwe alimwi lyakajisi manwe aali cisambomwe kucituta comwe-comwe antoomwe manwe aayo akali makumi obilo aane. Alyalo lyakali limwi lyamantu. 21 Nilyakasoka Baisilayeli, Jonatani mwanaa Syima munyina Devedi wakalijaya.
22 Aaya oonse one akali mantu aaku Gati. Nkabela oonse akajaigwa a Devedi antoomwe abasinkondo bakwe.