2 Samuyele 19
Jowabu mbwaakakalalila Devedi
1 Lino Jowabu wakaambilwa kuti, “Mwami ucilila Abisalomu.”
2 Buzuba oobo akati kabasilumamba kuzunda kwakasanduka kuba dilwe, nkaambo mubuzuba oobo bakamvwa kuti, “Mwami ulila mwanaakwe.” 3 Bantu nibakanjila mumunzi buzuba oobo bakali kuya bunombaila mumunzi mbubunombaila basilumamba beenda kabauside akaambo kakuzundwa munkondo. 4 Mwami wakalivumba kubusyu, wapozomoka wakati, “Maawe, mwanaangu Abisalomu, Abisalomu, mwanaangu, mwanaangu.”
5 Mpoonya Jowabu wakanjila muŋanda yamwami akwaamba kuti, “Sunu watyompya bantu bako boonse aabo bakuvuna yebo abana bako balombe, bana bako basimbi, bakaintu bako, abamwanakasuwa bako. 6 Nkaambo ulayanda bakusulide akubasula bakuyanda. Bona sunu wacisalazya kuti basilutwe abasinkondo tabakwe makani kulinduwe, lino sunu ndabona kuti, Abisalomu naali muumi, swebo toonse katumana kufwa, noobotelwa. 7 Nyamuka uunke ukaumbulizye basinkondo. Masimpe ndakonkezya kuli Leza, kuti naa utainki, taakwe muntu naba omwe uutisyaale anduwe masiku aaya. Nkabela eeci cilakubijila kwiindilila. 8 Mpoonya mwami wakanyamuka waakukkala kumanjililo. Nkabela bantu boonse bakaambilwa kuti, ‘Mwami ulikkede kumanjililo. Eelyo basinkondo boonse bakaboola kulinguwe.’”
Devedi mbwaakabweeda ku Jelusalemu
Lino Baisilayeli boonse bakatija akubweeda kumaanda aabo. 9 Bantu bamisyobo yoonse ya Isilayeli bakatalika kwaambilana kuti, “Mwami Devedi nguwakatuvuna kuzwa kuli Basinkondoma, alimwi nguwakatuvuna kuzwa ku Bafilisiti, pele lino watija mucisi akaambo ka Abisalomu. 10 Awalo Abisalomu ooyo ngutwakananika kuti abe mwami wesu wakafwa munkondo. Ino ono twabaa nzi ncotutaboozyi mwami?”
11 Lino mwami wakatumya makani kuli Zadoki a Abiyata bapaizi aakuti, “Amwaambile bapati ba Juda kuti, ‘Ino nkaambo nzi nimuyanda kusyaalila ndinywe kuboozya mwami? Wakaamba boobu nkaambo zyakali kwaamba Baisilayeli zyakali mvwidwe kale kuli nguwe. 12 Nywebo muli basimukowama, tuli ciinga comwe, ino nkaambo nzi nimuyanda kusyaalila ndinywe kuboozya mwami?’” 13 Alimwi mumwaambile Amasa kuti, “Sena toli simukowama? Leza andisubule alimwi akwiindilila kuti naa utakabi silutwe wabasilumamba mumazuba aaboola mubusena bwa Jowabu.” 14 Aboobo Devedi wakacita kuti basinkondo boonse ba Juda bakakatile kulinguwe mbuli muntu omwe. Bamane bakatumya majwi kumwami, aakuti walo abantu bakwe boonse baboole
15 Lino mwami wakaboola, wasika ku Jolodani, eelyo bantu bamusyobo wa Juda bakasika ku Giligali kuyoocingauzya mwami akumuzubusya mutala limwi. 16 Syimeyi mwanaa Gela, Mubenjamini waku Bahulimu, wakafwambaana kuyoocingauzya mwami a bantu ba Juda. 17 Nkabela kwakali anguwe baalumi bali cuulu bakali kuzwa ku Benjamini. Ziba mubelesi wamukwasyi wa Saulu, abana bakwe balombe bali kkumi abasanu, ababelesi bakwe bali makumi obilo, bakazuzaanina ku Jolodani kumbele lyamwami. 18 Nkabela bakazubuka acito kuti bakalete bamukwasyi wamwami akubacitila kufumbwa ncibakali kuyanda.
Syimeyi mwanaa Gela wakavuntama kumbele lyamwami, naakali afwiifwi kuzubuka Jolodani. 19 Wakaamba kuti, “Mwami, utabi nondipa mulandu nikuba kuba aankoto akaambo ka nzindakacita kubisizya mwami simalelo wangu naakazwa mu Jelusalemu. Mwami utacibiki kumoyo wako pe. 20 Nkaambo mebo, ndemubelesi wako, ndilizi kuti ndakabisya, ncenciceeco ncindaboola sunu, ndendime wakusaanguna kusika kuluzubo lwa Josefa loonse kuti nzoocingauzye simalelo wangu.”
21 Aawo Abisyayi mwana mulombe wa Zeluiya wakaingula kuti, “Sena Syimeyi teelede kujaigwa akaambo kaceeci, kayi wakasinganya munanike wa Mwami Leza?”
22 Pele Devedi wakati, “Peepe nobana ba Zeluiya taakwe canu aawa, mutandinyonganyi. Sunu takweelede kujaya muntu. Tee ndaziba kale kuti ndendime mwami wa Isilayeli.” 23 Amane mwami Devedi wakakonka kuli Syimeyi kuti, “Tokoofwa pe.”
24 Lino Mefibosyeti muzyukulu wa Saulu wakasika kuzoocingauzya mwami, taakwe naakali kusamba kumaulu pe, nikuba kwiilulula cilezu, nikuba kusanzya zisani zyakwe, kuzwa buzuba buya mwami naakatija akuzooboola muluumuno. 25 Nkabela naakasika kuzwa ku Jelusalemu kuzoocingauzya mwami, wakati kulinguwe, “Ino nkaambo nzi nootakainka andime, Mefibosyeti?”
26 Walo wakaingula kuti, “O mwami simalelo wangu, mubelesi wangu wakandicenga, ndakamwaambilide kuti, ‘Ndiletela mbongolo, nditante nduunke kumwami nkaambo ndilemene.’ 27 Walo wakanditamikizya mebo ndemubelesi wako kumwami simalelo wangu. Pele mwami simalelo wangu uli mbuli mungelo wakujulu, ono acite kufumbwa cintu cimubotela kulindime. 28 Boonse bamukwasyi wataata bakeelede kujaigwa amwami simalelo wangu, pele wakabikka mubelesi wako akati kabaabo balya atebule lyako. Ino ndijisi matongoosi nzi aambi kumwami?”
29 Eelyo mwami wakati kulinguwe, “Leka buyo. Ndayeeya kale kuti yebo a Ziba mwaabane nyika.”
30 Aboobo Mefibosyeti wakati kumwami, “Aitole yoonse nkaambo mwami simalelo wangu wasika mumunzi muluumuno.”
31 Lino Bazilayi Mugiliyadi wakasika kuzwa ku Logelimu, eelyo wakainka amwami ku Jolodani kuti azabusye mwami mutala limwi. 32 Bazilayi wakalicembeede kapati, wakali aamyaka iili makumi aali lusele. Ngonguwe wakali kutumina mwami zilyo ciindi ncaakacikkede ku Mahanaimu, nkaambo wakalivubide kapati. 33 Eelyo mwami wakati kuli Bazilayi, “Atuunke ayebo, kutegwa nkakulele ndime ku Jelusalemu.”
34 Pele Bazilayi wakati kumwami, “Ino myaka yongaye njencipona kuti mebo nduunke amwami ku Jelusalemu? 35 Aano ndijisi myaka iili makumi aali lusele, ino inga ndaziba cibotu acibi? Sena mubelesi wako ulakonzya kuziba cibotu kulya naa kunywa? Sena ndicikonzya kuswiilila baalumi abakaintu baimbi? Ino ono ncebeda mukuli kumwami simalelo wangu ncinzi? 36 Mubelesi wako uyanda buyo kuti akusindikile buniini buyo mutala lya Jolodani. Nkaambo nzi mwami nayanda kundilumbula bulumbu buli boobu? 37 Mbubo, undizumizye kuti mebo mpilukile nkafwide kumunzi munsi azyuumbwe zyataata abaama. Pele ndalomba kuti kuunke mwanaangu Kimuhamu amwami simalelo wangu, eelyo amucitile kufumbwa cintu cimubotela.”
38 Mpawo mwami wakaingula kuti, “Kimuhamu ulainka andime, njoomulela mbubonya mbuli mboyanda. Alimwi kufumbwa ncoyooyanda ndiyoomucitila.” 39 Eelyo bantu boonse bakazubuka Jolodani, awalo mwami wakazubuka, mpawo mwami wakamyonta Bazilayi wakamuleleka, aawo wakabweeda kumunzi wakwe.
40 Lino mwami wakaindilila waakusika ku Giligali, awalo Kimuhamu wakali aanguwe. Bantu boonse ba Juda, alimwi acisela ca Baisilayeli bakazubusya mwami akumusindikila. 41 Baisilayeli boonse bakasika kumwami akwaamba kuti, “Ino nkaambo nzi bakwesu bantu ba Juda balikke mbibazubusya mwami abamukwasyi wakwe abantu mbalaabo boonse mutala lya Jolodani?”
42 Bantu ba Juda bakaingula Baisilayeli kuti, “Nkaambo mwami ngwamukowa wesu. Ino camubijila buti eeci? Sena kuli ncotwakalya cibotu camwami? Sena twakatambula cipego?”
43 Baisilayeli bakaingula bantu ba Juda kuti, “Tulijisi zyeelelo zili kkumi mumwami, nkokuti tujisi ziinda zyanu muli Devedi. Ino mutusampawida nzi? Sena tatuli ndiswe nitwakasaanguna kuyeeya kuti mwami aboozegwe?”
Pele bantu ba Juda bakali kwiinda Baisilayeli.