2 Samuyele 17

Husyayi mbwaakaunina Abisalomu

¹ Lino Ahitofeli wakaya kumbele akwaambila Abisalomu kuti, “Nindasala baalumi zyuulu zili kkumi, nkabela nindanyamuka akutobela Devedi masiku. ² Nindaakumusikila ciindi ncakatende akuzingwa nindaakumukonga, eelyo aabo bantu mbali aabo nibamutija, nindajaya buyo mwami alikke, ³ kwamana bantu boonse ndabaleta kulinduwe mbuli nabwiinga mbwaboola kumulumaakwe. Kuti naa Devedi wafwa, bantu boonse balaba muluumuno.” ⁴ Eelyo kulaya ooku kwakamubotela Abisalomu abapati boonse baku Isilayeli.

⁵ Mpoonya Abisalomu wakati, “Amumwiite awalo Husyayi Muanaki kuti tumvwe mbwataambe.” ⁶ Husyayi naakasika, Abisalomu wakati kulinguwe, “Teelela mbwaamba Ahitofeli, sena tweelede kucita mbuli mbwaalailila? Kuti naa tabusyi, waambe.”

⁷ Mpoonya Husyayi wakati kuli Abisalomu, “Kwaciindi cino kulailila kwa Ahitofeli takuli kabotu pe.” ⁸ Husyayi wakaya kumbele akwaamba kuti, “Ulizi kuti uso abantu bakwe mbaalumi basinguzu kapati alimwi mbakali, bali mbuli munyama wabutambo wabbidwa bana musokwe. Kuleka boobo, uso ulizi kabotu zyamakani aankondo, takonzyi koona abasinkondo bakwe pe. ⁹ Bona nikuba kwaciindi cino uliyubide mumpangala nibuba busena busisikide. Lino kuti akasaangune nguwe kulwana, kufumbwa ooyo uyooamvwa uyooti, ‘Bajaigwa bantu batobela Abisalomu.’ ¹⁰ Naba mwaalumi singuzu, ulaacamba uuli mbuli syuumbwa, mumazwi muyoomutontola nkaambo Baisilayeli boonse balizi kuti uso mwaalumi singuzu, alimwi abaabo boonse mbali aabo mbubonya. ¹¹ Lino kulailila kwangu nkwakuti, Baisilayeli boonse baleelede kubungana kuzwa ku Dani kusikila ku Biiyasyeba, bavule kabatabaliki mbuli musenga wankomwe yalwizi, kwaambisya uunke kunkondo yebo lwako omwini. ¹² Aboobo tuyoomuunkila kubusena ooko kufumbwa nkwayoojanwa, tuyoomuvumpa mbubonya mbuli mume mbuuboola koonse-koonse ansi. Eelyo tuyoobamana doo, taakwe muntu naba omwe uuti kasyaale. ¹³ Kuti naa watijila mumunzi umwi Baisilayeli boonse bayookolomona munzi ooyo mukkuti kuti kutakasyaali mulinguwo kabwe nokaba komwe.”

¹⁴ Lino Abisalomu a Baisilayeli boonse bakati, “Kulailila kwa Husyayi Muanaki nkubotu kwiinda kwa Ahitofeli.” Mwami Leza nguwakanyonganya kulailila kwa Ahitofeli kutegwa aletele Abisalomu bubi.

Devedi mbwaakacenjezegwa

¹⁵ Mpoonya Husyayi wakati kuli Zadoki a Abiyata bapaizi, “Mboobu Ahitofeli mbwaakalailila Abisalomu abapati ba Baisilayeli, ambebo mboobu mbundalailila. ¹⁶ Lino amutume cakufwambaana kuyooambila Devedi kuti, ‘Utakooni kuzito zya Jolodani sunu pe, pele uzubuke, kutegwa mwami abantu bakwe boonse mbali aabo batajaigwi.’”

¹⁷ Lino Jonatani a Ahimaazi bakali kulindila ku Enilogeli, ooko kwakali musimbi mubelesi wakali kuunka kuyoobaambila makani ba Jonatani a Ahimaazi bakali kuunka kuyooambila mwami Devedi, bakali kucita oobo kabatanjili mumunzi kuyoowa kubonwa. ¹⁸ Bumwi buzuba umwi mulombe wakababona, mulombe ooyo wakaambila Abisalomu, nkaako boonse bobilo bakeenda cakufwambaana, baakusika kuŋanda yamwaalumi umwi ku Bahulimu wakajisi mukalo mulubuwa lwakwe, bakanjila mumo. ¹⁹ Mukaintu wakavumba mukalo amane wakamwaya-mwaya malila aawo, kuti kutazibwi. ²⁰ Ciindi bantu ba Abisalomu nibakasika kumukaintu bakati, “Bali kuli ba Ahimaazi a Jonatani?”

Mukaintu wakati kulimbabo, “Bali mutala aakalonga.” Nkabela nibakabayandaula tiibakabajana pe, mpawo bakapiluka ku Jelusalemu. ²¹ Mbubakainkila buyo, baalumi aabo bakazwa mumukalo mubakabede, mpoonya bakainka bakwaambila Devedi zyoonse eezyo Ahitofeli nzyaakalailila Abisalomu. Bakati, “Nyamuka, ufwambaane uzubuke mulonga.” ²² Mpoonya Devedi wakanyamuka, abantu boonse mbaakali aabo, eelyo bakazubuka mulonga wa Jolodani, nibwakaca taakwe naba omwe watakana zubuka Jolodani.

²³ Ciindi Ahitofeli naakabona kuti Kulailila kwakwe tiikwatobelwa, wakatanta mbongolo yakwe, akubweeda kuŋanda kumunzi wakwe mwini. Eelyo wakalailila makani oonse aaŋanda yakwe amane wakalisina, wakazikkilwa mucuumbwe cawisi.

²⁴ Lino Devedi wakasika ku Mahanaimu. Eelyo Abisalomu wakazubuka mulonga wa Jolodani abantu Baisilayeli boonse. ²⁵ Mpawo wakabikka Amasa kuti abe silutwe wabasilumamba mubusena bwa Jowabu. Amasa wakali mwana wa Itula Muisyimayeli, wakakwete Abigelo, mwanaa Nahasyi, mucizi wa Zeluiya banyina Jowabu. ²⁶ Eelyo Baisilayeli a Abisalomu bakayaka zivuka mu Giliyadi.

²⁷ Nkabela Devedi naakasika ku Mahanaimu ba, Syobi mwana mulombe wa Amiyeli wakali kuzwa ku Lodeba, Bazilayi Mugiliyadi wakali kuzwa ku Logelimu, ²⁸ bakaleta malo, amitiba mipati, zibiya, maila, busu, maila akangidwe, nyangu, ²⁹ buci, mabisi, mbelele, amafuta aaŋombe kuli Devedi abantu mbaakali aabo kuti balye, nkaambo bakati, “Bantu bafwa nzala, balikatede alimwi bafwide nyota munkanda oomo mobabede.”