2 Samuyele 15

Abisalomu mbwaakazangila mwami

¹ Bweende-bweende Abisalomu wakalijanina nkalaki amabbiza abasinkondo bali makumi osanwe bazuzaana kumbele lyakwe. ² Nkabela Abisalomu wakali kunga wabuka cifumo-fumo ulaima kumbali aanzila kumanjililo, eelyo kufumbwa muntu wakali kusika kumwami akaambo kakutongooka, Abisalomu wakali kumwiita akubuzya kuti, “Ino wazwida kumunzi nzi?” Nkabela aamba kuti, “Mubelesi wako ngwamusyobo uuli bobuya mu Isilayeli.” ³ Abisalomu wakali kuti, “Bona, makani aako ali kabotu alimwi aliluleme, pele mwami taakabika muntu wakuswiilila matongoosi aanu pe.” ⁴ Abisalomu wakali kwiindilizya akuti, “Akaka, nikwali kuti ndendime mubetesi, nikwali kunga muntu woonse uuli aamulandu naa matongoosi asika kulindime ndamubeteka buluzi.” ⁵ Kwakali kunga muntu aswena afwiifwi kuzoomulemeka, wakali kutandabika maanza wamujata akumumyonta. ⁶ Mbombuboobu Abisalomu mbwaakali kucitila Baisilayeli boonse bakali kusika kumwami kuzoobetekwa, nkaako Abisalomu wakabatola myoyo Baisilayeli.

⁷ Nikwakamana myaka yone Abisalomu wakati kumwami, “Nkoo nduunke nkape cikonke cangu ku Mwami Leza mu Hebuloni. ⁸ Nkaambo mebo ndemubelesi wako ndakakonkezya ciindi nindakacikkede ku Gesyu mu Alamu ndakati, ‘Kuti naa ncobeni Leza akandipilusye kabotu ku Jelusalemu, ndizoomukomba ku Hebuloni.’”

⁹ Mpoonya mwami wakati, “Koya muluumuno.” Aboobo Abisalomu wakanyamuka akuunka ku Hebuloni. ¹⁰ Nikuba boobo wakatumide bantu cakusisikizya kumisyobo yoonse ya Isilayeli kati, “Mbomuti mvwide buyo mweembo uulila, mwaambe kuti, ‘Abisalomu ngo mwami mu Hebuloni.’” ¹¹ Nkabela Abisalomu wakainka abasinkondo bali myaanda yobilo kuzwa ku Jelusalemu bakali kumusindikila kabatazi cakali kucitika. ¹² Abisalomu naakacili kupa zipaizyo, wakatumina kuyooita Ahitofeli, mulailili wa Devedi uuzwa ku Gilo. Mbombuboobu nkamu yabazangi mbuyakakomena kapati, mbubakali kuyabuvula bantu bakali a Abisalomu.

Devedi mbwaakatija kuzwa ku Jelusalemu

¹³ Lino kwakasika mutumwa kuli Devedi wakati, “Bantu ba Isilayeli baccilila Abisalomu.”

¹⁴ Mpoonya Devedi wakati kubabelesi bakwe boonse aabo bakali aanguwe ku Jelusalemu, “Amunyamuke tutije, nkaambo ambweni inga taakwe naba omwe uuti zookonzye kutija asika Abisalomu. Amufwambaane kunyamuka atatweenzyi akutuletela bubi anyonyoona munzi woonse apanga.”

¹⁵ Eelyo babelesi bamwami bakati kulinguwe, “Bona, babelesi bako balilibambilide kucita kufumbwa mwami simalelo wabo ncayeeya.” ¹⁶ Aboobo mwami wakainka kumbele, abalo bamukwasyi wakwe boonse bakamutobela. Mwami wakasiya bamwanakasuwa bakwe bali kkumi kuti babambe munzi wakwe.

¹⁷ Lino mwami wakainka, bantu bakwe boonse bakamutobela, bakaakwiima kuŋanda yamamanino. ¹⁸ Ooko babelesi bakwe boonse nkubakalikwiinda kumbali aanguwe, Bakeleti, Bapeleti, a Bagiti boonse bakali myaanda iili cisambomwe bakamutobela kuzwa ku Gati. ¹⁹ Mpoonya mwami wakati kuli Itayi Mugiti, “Ino yebo ututobelela nzi? Kobweeda ukakkale amwami uyoolela, nkaambo yebo uli wamasi, alimwi wakatija buya kunyika yako. ²⁰ Ookasika jilo, ono sunu inga ndakucita buti kuti uunke andiswe, kakuli ambebo nsizi nkweya? Kobweeda, uunke abasicisinyoko. Mwami Leza akubede aaluse alimwi asyomeke kulinduwe.”

²¹ Itayi wakaingula mwami kuti, “Mbubuli Mwami Leza mbwali muumi amwami simalelo wangu mbwali muumi, kufumbwa ooko mwami simalelo wangu nkwayooba, nikuba kufwa naa buumi, ambebo ndemubelesi wako nkweyooba.”

²² Mpoonya Devedi wakati kuli Itayi, “Koya ino, inda kumbele.” Itayi Mugiti wakainda kumbele, walo abantu bakwe boonse amikwasyi yabo. ²³ Bantu boonse nibakabona mwami abantu bakwe kabainda, bakalila kumane mwami abantu bakwe boonse bakazubuka kalonga ka Kidiloni bagama kunkanda.

²⁴ Lino Zadoki a Balevi boonse bakasika, mpoonya awalo Abiyata wakasika. Balevi bakayumwide bbokesi lyacizuminano ca Leza bakalitula kusikila bantu boonse nibakaindilila munzi. ²⁵ Mpoonya mwami wakati kuli Zadoki, “Bweedezya bbokesi lyacizuminano ca Leza mumunzi. Kuti naa Mwami Leza andibede aaluse, uyoondiboozya kuzoolibona mbolikkede. ²⁶ Pele kuti naa Mwami Leza waamba kuti, ‘Nsiboteledwe anduwe, mbubo citicitike cicitike, eelyo acite kufumbwa cimubotela.’” ²⁷ Alimwi mwami wakati kuli Zadoki mupaizi, “Langa nduwe muntu mupati wa Mwami Leza. Lino kobweeda buyo kumunzi muluumuno, yebo a Abiyata abana banu bobilo, Ahimaazi mwanaako, a Jonatani mwana wa Abiyata. ²⁸ Bona, njoolindila kuzito zya Jolodani munkanda mane kusikila nkamvwe kuzwa kulinduwe. ²⁹ Aboobo Zadoki a Abiyata bakabweedezya bbokesi lyacizuminano ca Mwami Leza ku Jelusalemu akukkala nkukonya.”

³⁰ Devedi wakatanta atala aacilundu ca Oliva kaya bweenda amaulu buyo kumwi ulalila, alimwi kalivumbide kumutwe. Abalo bantu boonse bakali aanguwe bakalilivumbide kumitwe kabamutobela ooku kabaya bulila. ³¹ Mwami Devedi wakamvwa kuti, “Ahitofeli uli akati kabazangi ba Abisalomu.” Mpawo Devedi wakati, “O Mwami Leza, ndakukomba, kosandula kulailila kwa Ahitofeli kuti kube kwabufuba-fuba.”

³² Devedi naakasika atala aacilundu aawo aakali kukombelwa Mwami Leza, wakabona Husyayi Muanaki kazoomucingauzya acibaki cidelaukide, alimwi kabikkide vu amutwe. ³³ Devedi wakati kulinguwe, “Bona wanditobela tacikootugwasya pe, ³⁴ noopiluka kumunzi ukaambile Abisalomu, kuti ‘Ndaba mubelesi wako, omwami mbubonya mbuli mbundakali mubelesi wauso ciindi cakamana, lino ndaba mubelesi wako.’ Munzila eeyi uyoozunda malailile aa Ahitofeli. ³⁵ Kayi Zadoki a Abiyata bapaizi banookkede anduwe kuya? Aboobo kufumbwa ncoyoomvwa kuzwa kuŋanda yabwami, ukaambile Zadoki a Abiyata bapaizi. ³⁶ Nkaambo balijisi bana balombe ba: Ahimaazi mwanaa Zadoki, a Jonatani mwana wa Abiyata, aaba mbotinoyootuma kufumbwa ncoomvwa.”

³⁷ Aboobo Husyayi mweenzinyina Devedi wakanjila mumunzi ciindi Abisalomu naakali kunjila mu Jelusalemu.