2 Samuyele 14

¹ Lino Jowabu mwanaa Zeluiya wakabona kuti moyo wamwami uli kuli Abisalomu. ² Aawo Jowabu wakatuma muntu ku Tekowa, kuyooleta mukaintu musongo akumwaambila kuti, “Licengeezye mbuli muntu uulaadilwe, usame zisani zyakulila utanani mafuta kutegwa ulangike mbuli mukaintu walikulila mufu kwamazuba manji. ³ Uunke kumwami, ukaambe ncetikwaambile.” Aboobo Jowabu wakamwaambila cakwaamba. ⁴ Ciindi mukaintu waku Tekowa naakasika kumwami, wakamuvuntamina akumulemeka waamba kuti, “Kondigwasya, o mwami.”

⁵ Mpawo mwami wakati kulinguwe, “Ino ujisi penzi nzi?” Walo wakaingula kuti, “Mebo ndimukamufu. ⁶ Lino ndemubelesi wako, ndakajisi bana balombe bobilo, kabali musokwe bakapampana akulwana mukuti kwakanyina uubavuna umwi wakauma mweenzinyina wamujaya. ⁷ Lino mukwasyi oonse wabukila mubelesi wako akwaamba kuti, ‘Tupe mwana ooyo wakajaya munyina, kutegwa awalo tumujaye nkaambo wakajaya munyina. Eeci caamba kuti balanyonyoona awatibe sikukona. Bayanda kuzimaanya buumi bwamwanaangu mbubonya mbuli buzimwa kkala lyamulilo, akutasiila mwaalumi wangu zina niluba lunyungu anyika.’”

⁸ Mpoonya mwami wakati kumukaintu, “Koya kuŋanda yako, njooingula kabotu.”

⁹ Eelyo mukaintu waku Tekowa wakati kumwami, “Mulandu ube alindime, o mwami simalelaangu, akumukwasyi wataata, pele kulinduwe abulelo bwako kutabi mulandu nouceya pe.”

¹⁰ Amvwe boobo mwami wakati, “Kufumbwa muntu uutikupenzye umulete kulindime, taciyookupenzya limbi pe.”

¹¹ Mpoonya mukaintu wakati, “Komba ku Mwami Leza wako, kuti uubweedezya mulandu wakutila bulowa atacinyonyooni limbi, nanga mwanaangu tajaigwi oobo.”

Walo wakati, “Ndakonkezya muzina lya Mwami Leza muumi kuti mwanaako takooyoocisigwi naaceya.”

¹² Mpoonya mukaintu wakati, “Akaka, mubelesi wako kacaamba alimwi kumwami simalelo wakwe.”

Walo wakati, “Amba.”

¹³ Eelyo mukaintu wakati, “Ino nkaambo nzi nokanza cintu cili boobo kubantu ba Leza? O mwami olizula omwini mukuti tosoli kuboozya mwanaako wakatija. ¹⁴ Swebo toonse tuleelede kuzwa, nkaambo tuli mbuli maanzi aatikila aansi, aanga taakonzyi kubunganyizigwa alimwi. Naba Leza tanyonyooni buumi pele ulapa nzila yakuleta baabo batijide. ¹⁵ Lino ndaboolela kuzooamba eeci kumwami simalelo wangu nkaambo bantu bandiyoosya. Aboobo mubelesi wako wakayeeya kuti, ‘Ndiyooambaula kumwami kuti ambweni inga mwami uyoocita ncakumbila mubelesi wakwe. ¹⁶ Nkaambo mwami uyoomvwa, akuvuna mubelesi wakwe kuzwa kumuntu ooyo uyoondinyonyoona antoomwe amwanaangu mulombe kundigwisya mulukono oolo Leza ndwaakapa bantu bakwe.’ ¹⁷ Eelyo mubelesi wako wayeeya kuti, ‘Ma cisyomezyo camwami simalelo wangu cilanduumbulizya, nkaambo mwami simalelo wangu uli mbuli mungelo wa Leza mukuziba cibotu acibi. Mwami Leza wako abe anduwe.’”

¹⁸ Mpoonya mwami wakaingula mukaintu ooyu kuti, “Utandisisi kufumbwa cintu ncenti kubuzye.”

Mpawo mukaintu wakati, “Koamba simalelo wangu.”

¹⁹ Mwami wakati, “Sena tali Jowabu wakwaambila zyoonse eezi?”

“Mukaintu wakaingula kuti, ‘Ndaambisya masimpe kuti o mwami simalelo wangu, taakwe muntu uukonzya kukusisila makani. Iiyi ngu Jowabu mubelesi wako wakandilailila, nguwenya nguwakandaambila majwi aaya oonse.’ ²⁰ Lino mubelesi wako Jowabu wakacita oobu kuti asandule bweende bwamakani. Pele mwami wangu musongo uli mbuli mungelo wa kujulu mukuziba zintu zyoonse zili ansi aano.”

²¹ Bweende-bweende mwami wakati kuli Jowabu, “Langa, lino ndazumina. Koya ukamulete Abisalomu.”

²² Mpoonya Jowabu wakakotama mukulemeka, akumulumbaizya. Wakaamba kuti, “Sunu mubelesi wako ulizi kuti wamubeda aaluse, o mwami simalelo wangu, mukuti wazumina ncindakumbila.” ²³ Aboobo Jowabu wakanyamuka wakainka ku Gesyu kuyooleta Abisalomu ku Jelusalemu. ²⁴ Naakamusisya mwami wakati, “Kakkede ooko kuŋanda yakwe, atasiki kuzoondibona pe.” Aboobo Abisalomu wakakkala kuŋanda yakwe, taakwe naakabonana amwami.

Abisalomu mbwaakayanzanyizigwa awisi Devedi

²⁵ Lino mucisi ca Isilayeli coonse kakutakwe muntu naba omwe wakali kutembaulwa mbuli Abisalomu akaambo kabubotu bwakwe. Kuzwa kumaulu kusikila kumutwe taakali kunongeka.

²⁶ Ciindi naakali kugelwa mwaka amwaka wakali kupima masusu aakwe akujana kuti alema masyekeli aali myaanda yobilo. ²⁷ Abisalomu wakazyede bana balombe botatwe, musimbi omwe, wakali kutegwa Tamaa. Tamaa wakali mukaintu mubotu ciwa.

²⁸ Abisalomu wakakkala mu Jelusalemu kwamyaka yobilo iizwide katanabonana amwami. ²⁹ Abisalomu wakaita Jowabu kuti azoomutume kumwami, pele Jowabu taakwe naakasika. ³⁰ Lino Abisalomu wakati kubabelesi bakwe, “Mwabona muunda wa Jowabu ulibambene awangu, alimwi mulibwene kuti ulilimide maila. Kamuya mukaatente.” Nkaako babelesi ba Abisalomu bakatenta muunda ooyo.

³¹ Mpoonya Jowabu wakainka kuli Abisalomu kuŋanda yakwe akumwaambila kuti, “Ino nkaambo nzi babelesi bako ncibatenta muunda?”

³² Abisalomu wakaingula kuti, “Bona, ndakatumya jwi kulinduwe kuti, ‘Boola kuno nzookutume kumwami,’ kuyoomubuzya kuti, ‘Ino wakandigwisizya nzi ku Gesyu? Nicali kwiinda kubota nindacili nkuko.’ Ndiyanda kubonana a mwami, kuti naa ndijisi mulandu akandijaye buyo.”

³³ Mpoonya Jowabu wakainka kumwami akumwaambila makani aaya, eelyo Devedi wakaita Abisalomu. Wakasika kumwami akukotama mukulemeka mwami, mwami wakamyonta Abisalomu.