2 Pita 3

Cisyomezyo cakuboola kwa Mwami

¹ Nomuyandwa, lugwalo ndwemulembela oolu ndwabili. Mulingawo oonse ndayanda kumubukulusya kuti muyeeyele zyabwini zyoonse eezi. ² Ncenciceeco ncindamuyeezya majwi aakaamba basinsimi basalala bakaindi alimwi amulawo wa Mwami Mufutuli wesu ngumwakapegwa abatumwa. ³ Kusaanguna muleelede kumvwisya kuti mumazuba aamamanino basimalabali bayooboola baccilila zisusi zyabo. ⁴ Bayooamba kuti, “Sena tali yooyo wakasyomezya kuti uyooboola? Ino uyooboola lili? Basikale besu bakafwa kaindi, pele zintu zyoonse zicili mbubonya mbozyakabede kuzwa kumalengelo.” ⁵ Balilubya-lubya caali kuti amajwi aakwe Leza wakalenga julu alimwi anyika kuzwa kumaanzi naakaandaanya nyika amaanzi. ⁶ Alimwi nyika yaciindi ciya yakanyonyoonwa azambangulwe lyamaanzi. ⁷ Pele Leza amajwi ngoonya aaya ulibambide julu anyika nzyotubona sunu kuti azoozyuumpe amulilo. Ulizibambide kusikila buzuba mbwayoobeteka akunyonyoona bantu basikasampu-sampu.

⁸ Kuli cintu comwe ncemuteelede kuluba pe, nomuyandwa, eeco ncakuti ku Mwami buzuba bomwe buli mbuli cuulu camyaka, acalo cuulu camyaka cili mbuli buzuba bomwe buyo. ⁹ Takuli kuti Mwami Leza wamuka kucita eezyo nzyaakasyomezya, mbobayeeya bamwi, pele ucimweetelela, nkaambo tayandi kuti bamwi bakanyonyoonwe, pele uyanda kuti boonse beempe.

¹⁰ Lino buzuba bwa Mwami buyoosika mbuli mubbi. Mubuzuba oobo zyakujulu ziyoomaninina amuzunzumina uuyoosya. Zintu zyoonse ziyooenzemuka akupya kutaambiki, ayalo nyika azyoonse zili mulinjiyo ziyoopya akumaninina! ¹¹ Lino mukuti zyoonse eezi ziyooenzemuka boobu, tamweelede na kuba bantu baandeene mubukkale bwanu amukukomba Leza? ¹² Nomulindila akubelekela buzuba bwakusika kwa Leza, mubinzya buzuba oobo. Mubuzuba oobo zyakujulu ziyooenzemuka amulilo, zintu zyoonse ziyoonyonyoonwa akupya kutaambiki. ¹³ Pele swebo tulindila julu pya anyika mpya, Leza nzyaakasyomezya, mwalo oomo muyooba bululami.

¹⁴ Nkaako, nomuyandwa, mukuti mulangila zintu eezi, amusungwaale kuti mukajanwe mulikkede muluumuno, kamutakwe kapa, naa kampenda kuli Leza. ¹⁵ Amuzibe kuti Leza ulamweetelela nkaambo uyanda kuti amufutule. Awalo Paulu mukwesu uuyandika wakamulembela zyazeezi abusongo mbwaakapegwa a Leza. ¹⁶ Wakaamba makani aaya mumagwalo aakwe oonse. Mumagwalo aayo muli zimwi ziyumu kumvwa. Bantu basicinguni batakkazikene mumoyo balazipilinganya mbuli mbobacita Malembe amwi. Nibacita boobo balalinyonyoona beni.

¹⁷ Pele nywebo nomuyandwa, mbomuzizi kale eezi amucenjele kuti lweeno lwabantu babi lutamusowi akuwa, kuti musweekelwe kuzyandamana lwanu. ¹⁸ Kamuya bukomena muluse amuluzibo lwa Mwami Mufutuli wesu Jesu Kilisito.

Kulinguwe akube bulemu sunu alyoonse kukabe kutamani. Akube boobo.