2 Pita 2

Zyabamayi babeji

¹ Lino kwakali basinsimi babeji akati kabantu besu mbubonya oobo aakati kanu kuyooba bamayi babeji. Bayoonjizya cakusisikizya njiisyo zinyonyoona, nkabela bayookaka Mwami wabo wakabanununa. Nkaako bayoolyeetela lunyonyooko cakufwambaana. ² Banji bayooccilila busofwaazi bwabo, alimwi akaambo kabo bantu banji-banji bayoosampaula nzila yabwini. ³ Mukuyanda kuvuba bayoobelesya majwi aakuunina. Pele cisubulo cabo cilibambilidwe kale alwalo lunyonyooko lwabo lulabalindila.

⁴ Nkaambo Leza taakalekelela bangelo bakabisya, pele wakabawaala kucikkalilo cabafu kuli mudima uusiya mbi, nkobaangidwe kulindila lubeta. ⁵ Alimwi Leza taakalekelela bakaindi, wakabamba buyo Nowa wakali kukambauka zyabululami abamwi bali ciloba naakatumya zambangulwe lyamaanzi kubantu bataswiilili Leza. ⁶ Leza wakabeteka minzi ya Sodomu a Gomola. Wakaitenta amulilo mane kwakacaala twe buyo kuti cibe citondezyo kuli baabo bayookaka kuswiilila Leza. ⁷ Pele wakavuna Loti mululami walo wakali kukatazigwa abweende bwabasizibi muzisusi zyabo. ⁸ Nkaambo muntu uululeme ooyo naakali kukkala akati kabo, mazuba oonse wakali kupenga mumoyo wakwe uulondekede nkaambo kamilimo yabo mibi njaakali kubona akuswiilila. ⁹ Lino Mwami Leza ulizi mbwavuna bamukomba kuzwa kukusunkwa, alimwi ulizi mbwaakabeteka bataluleme kuti bakasubulwe mubuzuba bwalubeta. ¹⁰ Kwaambisya uyoosubula aabo beenda muzisusi zisofweede zyabuntunsi abaabo basampaula bulelo.

Aaba balalikankaizya, tanyoneki, tabayoowi akusampaula balemekwa bakujulu. ¹¹ Nibaba bangelo babainda nguzu abupati tabaleti mulandu wakusampaula aabo balemekwa kumbele lya Leza. ¹² Bantu aaba bali mbuli banyama, batakwe maanu bakalengwa kuti kabajatwa akujaigwa. Balasampaula zintu nzyobatazi. Nibanyonyoona bamwi boobo, abalo bayoonyonyoonwa mbubonya. ¹³ Aboobo bayoosubulwa nkaambo kabubi bwabo. Cibabotela nkukkomanisya mibili yabo buzuba boonse. Bali mbuli tombe nkaambo nibalya andinywe balakkomana mukucita bubeji. ¹⁴ Meso aabo ngankwela taaleki kubisya. Boongelezya batasimide. Myoyo yabo izibide kuyandaula lubono. Balisinganyizidwe. ¹⁵ Bakasiya nzila iiluleme, baleya batola nzila ya Baalamu mwanaa Beyoli, wakali kuyanda bulumbu mukucita zibi. ¹⁶ Pele wakakazigwa ambongolo nkaambo kakulubizya kwakwe. Mbongolo mmunyama uutaambauli yakaambaula mbuli muntu kulesya bufuba-fuba bwamusinsimi ooyu.

¹⁷ Aaba bamayi babeji bali mbuli tusensa tunyina maanzi, ambuli sikunku uutonkaikwa aluuwo. Leza ubabambilide mudima uusiya mbi. ¹⁸ Balaamba majwi akulikankaizya, aabuyo, alimwi azisusi zyabo zyabuntunsi boongelezya beenzinyina batifutuke coonoono kuti kabalubizya. ¹⁹ Balabasyomezya lwaangunuko kabali balo beni mbazike bazintu zinyonyoona buumi. Nkaambo muntu uba muzike waceeco camuzunda. ²⁰ Nkaambo kuti bantu bavunwa kuzwa kubusofwaazi bwaansi mukuziba Mwami wesu Mufutuli Jesu Kilisito, pele kwamana bapilukila akuzundwa ambubo, ncobeni bayoobija kwiinda mbubakali kusaanguna. ²¹ Nicali cibotu kuti nibatakaziba nzila yabululami kwiinda kuti basaangune kwiiziba eelyo musule bazangile mulawo uusalala Leza ngwaabapa. ²² Nibacita boobo, batondezya kuti kasimpi aaka nkakasimpe kati, “Mubwa upilikila kubulusi bwakwe” Ayalo “Ngulube yasambide yabweedela kwaalabana muntimba.”