2 Makani 9
Kuswaya kwamwami mukaintu waku Syeba
1 Lino mwami mukaintu waku Syeba naakamvwa mpuwo ya Solomoni wakainka ku Jelusalemu kuti akamusunke amibuzyo miyumu. Wakainka kasindikilwa ababelesi banji, bakali kweenda ankamela zyakayumwide tununkilizyo, amabwe mayandisi alimwi angolida zinji. Nibakaswaangana a Solomoni, mwami mukaintu ooyo wakabuzya Solomoni mibuzyo yoonse yakali kumoyo. 2 Solomoni wakaingula mibuzyo eeyo yoonse, kunyina wakamuyumina pe. 3 Mwami mukaintu waku Syeba wakalamwa kuti Solomoni mmusongo, alimwi naakabona ŋanda yakwe njaakayaka, 4 zyakulya zyakwe, azyabalupati-pati bakwe, basyaaŋandu mumajansi aabo, basikupa zyakunywa, azipaizyo zyakutenta ambwaakayaka ŋanda ya Mwami Leza wakakankamana.
5 Nkabela wakati kumwami Solomoni, “Zintu nzindakamvwa nkecili mucisi cangu zyanduwe abusongo bwako nzyakasimpe! 6 Pele tiindakasyoma kusikila nindalibonena ndemwini. Ndakamvwide kuce buyo kwaamba zyabusongo bwako butaambiki, zyainda mbundakamvwide. 7 Ncobeni balaacoolwe bantu ababelesi bako aabo bakkala kumbele lyako lyoonse akumvwa zyabusongo bwako. 8 Alumbwe Mwami Leza wako! Walo wabotelwa kuti ube mwami ulele muzina lyakwe. Wakubikka mubwami akaambo kakuti ulayanda Baisilayeli akubakwabilila lyoonse. Wakakubikka mubwami kuti ulele Baisilayeli bweelede mubululami.”
9 Mpoonya mwami mukaintu waku Syeba wakapa Solomoni ngolida iilema matalenta aali mwaanda amakumi obilo. Wakamupa tununkilizyo tunji amabwe mayandisi. Solomoni taakwe naakatambula limbi tununkilizyo tunji tuli mbuli twakamupa mwami mukaintu waku Syeba.
10 Bantu ba Hilamu aba Solomoni bakaleta ngolida kuzwa ku Ofii. Bakaleta azisamu zyaalumagi amabwe meebesi. 11 Solomoni wakabelesya zisamu eezi mukuyasya malyatilo aaŋanda ya Mwami Leza ayakwe, akubeza tuntimbwa atulumbu twabaimbi. Taakwe limbi nikwakabwenwe zisamu zili boobu mu Juda. 12 Awalo Solomoni wakapa mwami mukaintu waku Syeba zyoonse nzyaakakumbila wakamupa zinji kwiinda zeezyo zyakamuletelede mwami ooyo. Mpoonya mukaintu ooyo ababelesi bakwe bakabweeda ku Syeba.
Zyabuvubi bwa Solomoni
13 Mwaka amwaka mwami Solomoni wakali kutambula ngolida iilema matalenta aali myaanda iili cisambomwe amakumi aali cisambomwe acisambomwe, 14 kutabalilizya amitelo yakali kuleta basimakwebo abamami ba Baalabu abeendelezi banyika, bakaleta ngolida amukuba kuli Solomoni. 15 Mwami Solomoni wakapanga ntobo mpati zili myaanda yobilo, nkabela imwi aimwi yakali yangolida iiwondedwe. Ntobo yomwe-yomwe yakafulwa angolida iilema mabeka aali myaanda iili cisambomwe. 16 Alimwi wakapanga azimbi ntobo nsyoonto zili myaanda yotatwe, imwi aimwi yakali kulema mabeka aangolida aali otatwe. Zyoonse eezi wakazibikka kuŋanda yakwe yakali kugundu lya Lebanoni. 17 Alimwi wakapanga acuuno cabwami cipati cameja aabazovu ncaakasyingulula angolida iini-ini. 18 Kwakali malyatilo aali cisambomwe kuyoosika aakkalilwa eeni, cakalijisi acilyatilo cangolida. Ciyaamino cakalivungumene, kumabazu aaco kwakali cikozyanyo casyuumbwa omwe-omwe. 19 Mumabazu aamalyatilo kwakali basyuumbwa bobilo-bobilo, antoomwe bakali kkumi ababili. Taakwe umwi mwami wakajisi cuuno cili mbuli ceeci pe.
20 Nkomeki zyoonse zya Solomoni zyakali zyangolida, azibelesyo zyamuŋanda yakugundu lya Lebanoni zyakali zyangolida iini-ini. Taakwe nsiliva yakali kubelesegwa mumazuba aa Solomoni, nkaambo nsiliva tiiyakali kulemekwa.
21 Mwami wakalijisi bantu beenzya mato aamakwebo bakali kulangwa abantu ba Hilamu. Lyoonse kwainda myaka yotatwe akali kunga aletelela ngolida, nsiliva, meja aabazovu, bapombo abasokwe. 22 Mwami Solomoni wakali muvubi alimwi musongo kwiinda bami boonse baanyika. 23 Nkabela bantu bamanyika oonse bakali kuunka kulinguwe kuyoomvwa zyabusongo Leza mbwaakamupede. 24 Mwaka amwaka bakali kuzoomubona bakali kuletelezya azipego zyansiliva, ngolida, majansi, zilwanyo, tununkilizyo, mabbiza amamyuulu.
25 Lino Solomoni wakajisi twaanda twamabbiza ankalaki, amabbiza aali zyuulu zili kkumi azibili aakali muminzi mwakali kuyobwedwa nkalaki, zimwi zyakali aanguwe mu Jelusalemu.
26 Solomoni wakalikweendelezya bamami kuzwida kumulonga wa Yufuletisi kuyoosika kunyika ya Bafilisiti mane do kumunyinza waku Ijipiti. 27 Mumazuba aayo nsiliva cakali cintu buyo mu Jelusalemu yakali mbuli mabwe kuvula. Ayalo milombe yakali minji mbuli mikuyu kunselelo lyazilundu. 28 Mabbiza aakwe wakali kwaajana ku Ijipiti akumasi amwi.
Lufu lwa Solomoni
29 Lino zyoonse eezyo nzyaakacita Solomoni kuzwa naakatalika kulela kusikila kumamanino zililembedwe mumabbuku aa Natani musinsimi, mubusinsimi bwa Ahija waku Syilo amuzilengaano zya Ido wakasinsima zya Jelobowamu mwanaa Nebati. 30 Wakali mwami mu Jelusalemu kalela Baisilayeli boonse kwamyaka iili makumi one. 31 Wakafwa akuzikkwa abasikale bakwe mumunzi wa Devedi wisi, eelyo mwanaakwe Lehobowamu nguwakalela mubusena bwakwe.