2 Makani 8
Cizuminano ca Solomoni a Hilamu
1 Solomoni cakamutolela myaka iili makumi obilo kuyaka ŋanda ya Leza ayakwe. 2 Wakayakulula minzi njaakapegwa a mwami Hilamu akutumizya Baisilayeli kuti bakakkale mumo.
Aimwi milimo ya Solomoni
3 Solomoni wakazunda zisi zya Hamatizoba. 4 Wakayakulula Palumila, kubikkilizya aminzi yaziyobwedo njaakayakide mu Hamati. 5 Wakakwabilila Betiholoni wamutala akunselelo. Wakaikwabilizya bwaanda, zitendele ampingizyo. 6 Wakayaka Baalati aminzi yaziyobwedo kubikkilizya aminzi yakuyobweda nkalaki amabbiza aakwe, wakayakilizya azeezyo nzyaakayanda mu Jelusalemu, Lebanoni amuzisi zyoonse nzyaakali kweendelezya. 7 Lino bantu bakasyeede Baamoli, Bahiti, Bapelezi, Bahivi a Bajebusi, bantu boonse aaba tiibakali Baisilayeli pe. 8 Ncecaamba kuti mbalunyungu lwabaabo bakasyaala batakanyonyoonwa a Baisilayeli, Solomoni wakababelesya mucibbalo mbubonya mbuli mbobali sunu. 9 Pele Solomoni taakwe naakali kucita Baisilayeli buzike, balo mbibakali basilumamba, beendelezi batukamu twabasilumamba, basilutwe bankalaki abatanti bazyo. 10 Solomoni wakalijisi balupati-pati bakwe bali myaanda yobilo amakumi osanwe, aaba mbibakali kubelesya bantu.
11 Lino mwami Solomoni wakaleta mukaintu wakwe mwanaa Falo kuzwa kumunzi wa Devedi, kumubikka muŋanda yabwami njaakamuyakila wakati, “Mukaintu wangu, teelede kukkala muŋanda yabwami ya Devedi mwami wa Baisilayeli, nkaambo kufumbwa oomo mwakanjizidwe bbokesi lyacizuminano ca Mwami Leza mulasalala.”
12 Solomoni wakapaizya ku Mwami Leza acipaililo eeco ncaakayakila Mwami Leza mukkoce. 13 Wakapaizya kweendelana abwaamba mulawo wa Mozesi kujatikizya zyamazuba aamapobwe, mbuli Masabata, mwezi mupya, azyamapobwe otatwe acitika mumwaka, aali ndipobwe lyacinkwa citakwe mimena, pobwe lyabutebuzi, apobwe lyazivuka. 14 Kweendelana abwakamulailila Devedi wisi, wakasala malizi aabapaizi kumilimo yabo, a Balevi bakagwasilizya bapaizi munyimbo zyabuzuba abuzuba. Amane wakasala malizi aabalindizi bamilyango nkaambo mbombubo oobo Devedi muntu wa Leza mbwaakalaililide. 15 Malailile mwami ngaakapede bapaizi a Balevi aajatikizya maanda aaziyobwedo azimwi akatobelwa bweelede.
16 Lino mulimo woonse wamwami Solomoni wakacitwa, kuzwida buzuba mbubakabikka ntalisyo yaŋanda ya Mwami Leza kusikila biimana. Mbombubo oobo ŋanda ya Leza mbuyakayakwa.
17 Naakamana Solomoni wakainka ku Eziyongeba aku Elati, minzi yalwizi lwaku Edomu. 18 Kali kooko mwami Hilamu wakatumina Solomoni mato aakali kweenzegwa abalupati-pati bakwe bakacibwene, bakazi zyamumaanzi. Bakeenda abantu ba Solomoni kuyoosika ku Ofii, ooko bakaakuleta matalenta aangolida aasika kumyaanda yone amakumi osanwe ngubakazoopa mwami Solomoni.