2 Makani 7
1 Lino mwami Solomoni naakamana kukomba, kwakaza mulilo kuzwa kujulu akuzooumpa zituuzyo azipaizyo nkabela bulemu bwa Mwami Leza bumwekesya bwakazuzya ŋanda ya Leza. 2 Akaambo kabulemu oobo bwakiizuzizye bapaizi tiibakali kukonzya kunjila muŋanda ya Mwami Leza. 3 Ciindi Baisilayeli boonse nibakabona mulilo kuuuluka abulemu bwa Mwami Leza atala aŋanda eeyo, bakavuntama mukazila, bakomba akulumbaizya Mwami Leza, kabati,
“Mwami Leza mmubotu,
nkaambo luyando lwakwe talumani.”
Kupegwa kwaŋanda ya Leza
4 Lino mwami abantu boonse bakapa zipaizyo ku Mwami Leza. 5 Mwami Solomoni wakapa cipaizyo cabasune bali zyuulu zili mwaanda amakumi obilo azibili, mbelele, ampongo zili zyuulu zili mwaanda amakumi obilo. Mbombuboobu mwami Solomoni abantu boonse mbubakapa ŋanda eeyo kuli Leza. 6 Bapaizi bakaima mumasena aabo mbuli bwakacitide Balevi kabajisi azingwali-ngwali zyakwiimbila Mwami Leza. Eezyo zingwali-ngwali mwami Devedi wakazibambila kutembauzya Mwami Leza. Nzenzizyo nzyaakabelesya naakalumbaizya kati, “Luyando lwakwe talumani.” Kabalangene a Balevi bapaizi bakasiba myeembo, ciindi eeco Baisilayeli boonse bakaliimvwi.
7 Solomoni wakasalazya bbuwa lyakali kumbele lyaŋanda ya Mwami Leza. Mpampawo aawo mpaakapa zipaizyo zyakutenta alimwi amafuta aacipaizyo calumvwano. Nkaambo cipaizyo camukuba ncaakayakide tiicakali kukonzya kutuuzya akupaizya zyamaila azituli zyamafuta. 8 Mbombuboobu Solomoni a Baisilayeli boonse mbubakalya pobwe ciindi eeco kwamazuba aali ciloba. Kwakali bantu banji-banji bakazwida kumweenya wa Hamati mane kuyoosika kumulonga wa Ijipiti. 9 Kwamazuba aali ciloba, bantu aaba bakacita ciyanza cakupa cipaililo, alimwi kwamazuba aambi aali ciloba bakali kusekelela, mubuzuba bwalusele bakamanizya ciyanza coonse.
10 Mubuzuba bwamakumi obilo aatatu bwamwezi waciloba, Solomoni wakaambila bantu kuti baye kumunzi, katangede akukondwa cakumaninina, abantu bakwe.
Mwami Leza mbwaakalibonya kuli Solomoni alimwi
11 Lino mwami Solomoni naakamanizya ŋanda ya Mwami Leza ayakwe, akuti wakazwidilila kucita zeezyo nzyaakali kuyeeya kucita muŋanda ya Mwami Leza ayakwe, 12 Mwami Leza wakalibonya kulinguwe masiku akumwaambila kuti, “Ndakakumvwa kukomba kwako alimwi ndakasalazya busena oobu kuti ibe ŋanda yakundipaizizya, 13 ciindi neyoojata mvula naa kutumina cikwikwi kuti cizoolye zilimwa, naa kutumizya cuumo akati kabantu bangu, 14 naa kuzwa kujulu, njoobalekelela zinyonyoono zyabo, akucita kuti nyika yabo izyale micelo alimwi. 15 Ndinooilanga ŋanda eeyi akuswiilila kukomba kucitilwa mulinjiyo. 16 Nkaambo mebo lwangu ndiisala akwiisalazya kuti ibe busena mbwenookombelwa lyoonse. Ndinooilanga akwiikwabilila lyoonse. 17 Kwaamba zyanduwe, kuti koenda munzila zyangu mbubonya mbuli uso Devedi mbwaakali kucita akucita nzendikulailila, kutobela milawo amalailile aangu, 18 ndiyoositikizya bulelo cili ncecisyomezyo ncindakapa Devedi uso nindakati, ‘Mwanaakwe nguunoolela Baisilayeli lyoonse.’ 19 Pele kuti yebo ukandisiye akutatobela malailile amilawo njindakakupa, mukukomba baleza bambi, 20 ndiyoogwisya Baisilayeli kuzwa munyika yangu eeyo njindabapede, alimwi ndiyoosiya ŋanda yangu eeyi njindakasalazya akaambo kazina lyangu. Nkabela iyooba kasimi acisesyo kuli bamasi.
21 “Nikuba kuti ŋanda eeyi nimbotu, yeebeka, boonse bayooinda mpawo bayoogambwa akuti, ‘Maawe yanyonyooka! Ino nkaambo nzi Mwami Leza naakacita boobu kunyika akuŋanda eeyi?’ 22 Pele bamwi bayooingula kuti, ‘Nkaambo kakuti bakasiya Mwami Leza wabasikale babo, ooyo wakabagwisya munyika ya Ijipiti, bakakomba baleza bambi akubamanina milimo. Ncenciceeco Mwami Leza ncaakacitila zeezi.’”