2 Makani 6
1 Lino Solomoni wakati,
“O Mwami Leza wakasala kukkala mumakumbi aasiya mbi.
2 Lino ndakuyakila ŋanda yabulemu,
busena mbonookkala kukabe kutamani.”
Solomoni mbwaakaambila bantu
3 Baisilayeli boonse bakaliimvwi ooko, aawo mwami Solomoni wakacenguluka, wabaleleka. 4 Wakati, “Aalumbwe Mwami Leza wa Isilayeli! Wabamba cisyomezyo ncaakaamba kuli taata Devedi naakati, 5 ‘Kuzwa ciindi nindakagwisya bantu bangu mu Ijipiti taakwe nindakasala munzi nuuba omwe mumisyobo ya Isilayeli kuti ŋanda njenookombelwa ikayakilwe nkuko alimwi taakwe nindakasala muntu naba omwe kusolweda bantu bangu Baisilayeli. 6 Pele lino ndasala munzi wa Jelusalemu kuti nkenookombelwa mumo, alimwi ndasala Devedi kuti alele bantu bangu Baisilayeli.’”
7 Alimwi Solomoni wakayungizya akwaamba kuti, “Taata Devedi wakalaamuzeezo wakuyaka ŋanda yakukombela Mwami Leza wa Isilayeli. 8 Pele Mwami Leza wakati kulinguwe, ‘Mukuti walikuyeeya kuyaka ŋanda yakukombela, wajisi muzeezo mubotu. 9 Nikuba boobo toli nduwe ootiiyake pe, pele mwanaako nguuyooiyaka ŋanda eeyo mwenookombelwa.’”
10 “Lino Mwami Leza wabamba cisyomezyo cakwe. Ndime ndatola busena bwataata Devedi kuba mwami wa Isilayeli, mbubonya mbuli Mwami Leza mbwaakasyomezya. Ndayaka ŋanda yakukombela Mwami Leza wa Isilayeli. 11 Mulinjiyo ndabikka bbokesi lyacizuminano, lijisi mabwe aacizuminano cakabamba Mwami Leza a Baisilayeli.”
Kukomba kwa Solomoni
12 Lino Solomoni wakainka waakwiima kumbele lyacipaililo kumbele lyabantu boonse. Mpawo wakanyamuna maboko aakwe mujulu. 13 (Solomoni wakapanga ciimino camukuba akucibikka akati-kati kabbuwa. Wakacipangide boobu, cakali kulampa tukokola tosanwe abwalo bwamba bwakali tukokola tosanwe, kuya mujulu cakali tukokola totatwe. Wakatanta aawo akufugama Baisilayeli boonse kabalangilila. Mpawo wakanyamuna maboko aakwe mujulu.) 14 Wati, “O Mwami Leza wa Isilayeli, takukwe Leza uumbi uuli mbuli nduwe kujulu naaba ansi. Yebo wasyomeka kucizuminano cako, alimwi ulatondezya luyando lutamani kubantu batobela nzila zyako cakumaninina. 15 Wacibamba cisyomezyo ncookapangana ataata Devedi mubelesi wako, nkaako sunu wakucita ncobeni ooko nkookasyomezya. 16 Aboobo lino O Mwami Leza wa Isilayeli, ndakomba kuti ucibambe acalo cisyomezyo eeci cimwi ncookapangana ataata Devedi nookati, ‘Lyoonse walunyungu lwako nguunoolela Baisilayeli, kufumbwa buyo kuti balunyungu lwako kabandiswiilila kabotu kweendelana amulawo, mbuli mbondiswiilila ayebo.’ 17 Aboobo ndakomba O Mwami Leza wa Isilayeli kuti ucibambe cisyomezyo cako eeci ncookacita kuli taata Devedi mubelesi wako.
18 “Pele O Leza mwati inga wakonzya kukkala anyika abantu? Kayi nimuba mujulu lyamajulu tokonzyi kweela, ino mbuti muŋanda eeyi njindakuyakila? 19 Nikuba boobo komvwa kupaila akukomba kwangu. Komvwa kulila akukomba kwangu kulinduwe sunu. 20 Sikati amasiku kobamba ŋanda yako eeyi, busena oobu mbookasala kuti kokombelwa. Koswiilila kukomba kwangu. 21 Koswiilila kukomba kwangu akulilauka kwabantu bako nibakomba mubusena buno. Baswiilile kuzwida kujulu nkobede, akutulekelela.
22 “Kuti naa muntu wabisizya mweenzinyina, amana wayandika kuti akonkezye kucipaililo cako amana waboola wazookonkezya muŋanda iino, 23 uswiilile kuzwida kujulu alimwi ubeteke babelesi bako. Ubweedezezye ulaamulandu cisubulo ceelede, ooyo uunyina mulandu umuleke, akwaambilizya kuti unyina mulandu.
24 “Ciindi bantu bako Baisilayeli nibazundwa abasinkondonyina akaambo kakuti bakakubisizya, kwamana baamba kuti nduwe Leza wabo, bakomba muŋanda muno, 25 ubaswiilile kuzwida kujulu akulekelela zinyonyoono zyabantu bako Baisilayeli. Wamana ubaboozye kunyika eeyi njookapa kulimbabo abasikale babo.
26 “Ciindi nobaima mvula akaambo kakuti bakubisizya, kwamana baamba kuti nduwe Leza wabo, bakomba mubusena buno, akweempa akaambo kakuti wabasubula, 27 ubaswiilile kuzwida kujulu akubalekelela, babelesi bako Baisilayeli. Ubaiisye nzila njobeelede kweenda, alimwi utumine mvula anyika eeyo njookakonya bantu bako.
28 “Lino ciindi nokusika nzala mucisi, naa cuumo naa cibabule, naa cikwaalala, naa cikwikwi, naa mpaso, naa basinkilizigwa abasinkondonyina muminzi yabo imwi, naaba mapenzi aali buti naaba malwazi, 29 uswiilile kukomba kwabo. Alimwi naa kuti bamwi bantu bako Baisilayeli bausa amoyo woonse cakulila, bamana banyamuna maboko aabo mukukomba muno muŋanda yako, 30 uswiilile kuzwida kujulu nkobede kukomba kwako. Ubalekelele, akucitila omwe-omwe wabo bweelede. Yebo olikke nduwe uuzi moyo wamuntu. 31 Kutegwa bantu bako kabakuswiilila akweenda munzila zyako ciindi coonse ncobakkede munyika eeyi njookapa basikale besu.
32 “Kwaamba zyamuzwamasi uutali umwi wabantu bako Baisilayeli, wazwida kulaale kuzookomba zina lyako pati. Mukuti bantu bayoomvwa zyajanza lyako lyanguzu litandabede, akuzookukomba muno muŋanda, 33 uswiilile kuzwida kujulu, alimwi umucitile eeco ncaakukumbila, kutegwa boonse bazwamasi bakuzibe akukulemeka mbubonya mbuli bukulemeka bantu bako. Alimwi bayooziba kuti ŋanda eeyi njindakuyakila iiitwa zina lyako mbusena mboelede kukombelwa.
34 “Ciindi noambila bantu bako kuti baye bakalwane basinkondonyina, kuti naa bakomba kuli nduwe kabalangide kumunzi mupati ooyu ngookasala akuŋanda eeyi njindakuyakila, 35 uswiilile kuzwida kujulu akubazundya.
36 “Ciindi bantu bako nobakubisizya nkaambo taakwe uutabisyi, kwamana mukunyema kwako wabaaba mubuzike kuli basinkondonyina nokulampa nokufwiimpa buti, 37 kwamana beempa munyika oomo mobabede akuti twakabisya, twakacita citaluleme, twakalubizya, uswiilile kukomba kwabantu bako. 38 Lino kuti naa beempa ncobeni amyoyo alimwi amyuuya yabo munyika yabasinkondonyina eeyo, akukomba kulinduwe kabalangide kunyika eeyi njookapa basikale babo, akumunzi ooyu ngookasala akuŋanda yako eeyi njindakuyakila, 39 uswiilile kuzwida kujulu, ubacitile ncobalomba. Ubalekelele zinyonyoono azibi zyoonse, nzyobakucitila. 40 Lino O Mwami Leza kolanga akuswiilila kukomba kwesu mubusena oobu.
41 “Nyamuka O Mwami Leza unjile mubusena bwako bwakulyookezezya, Yebo lwako abbokesi lyanguzu zyako. Leleka bapaizi bako mulizyoonse nzyobacita, abalo bantu bako abatangale mububotu bwako. 42 O Mwami Leza utalekelezyi munanike wako. Koyeeya zyaluse nzyookasyomezya kumubelesi wako Devedi.”