2 Makani 4
Zibelesyo zyaŋanda ya Leza
1 Mwami Solomoni wakapanga cipaililo camukuba cakali kulampa tukokola tuli makumi obilo, mubulamfu amubutuntuli, kulampa kuya mujulu twakali kkumi. 2 Alimwi Solomoni wakapanga cibumbe caziba lyamukuba cituntumene, bwaasa bwaco cakali tukokola tuli kkumi, bulamfu bwakuya mujulu cakali tukokola tosanwe, kweeleka butuntuli cakali tukokola tuli makumi otatwe. 3 Munsingo lyaco kuzinguluka kwakasimbidwe bapoho bakali kkumi mukakokola komwe. 4 Cibumbe caziba eeco cakakkazikwa abasune bali makumi obilo ababili, botatwe bakalangide kunyika, botatwe kumbo, botatwe kumusanza, alimwi botatwe kujwe. Zibuno zyakanjide mukati kalyo.
5 Mutika wacibumbe caziba eeco wakali mbuli janza. Moombe waco wakali mbuli wankomeki mbuli duba lyampana. Cibumbe caziba eeci cakali kuzula tubiya tuli zyuulu zyotatwe.
6 Alimwi bakabamba mitiba iili kkumi yakusambila wakaibikka kumusanza aimwi yosanwe wakaibikka kunyika. Mulinjiyo bakali kusanzizya zipaizyo zyakutenta. Pele cibumbe caziba ncicakali kusambila bapaizi.
7 Wakapanga zikkalilo zyamalambe zyangolida zili kkumi mbubonya mbuli mbobakali kucita lyoonse, akuzibikka muŋanda ya Leza. Zyosanwe wakazibikka kumusanza, zimwi zyosanwe wakazibikka kunyika. 8 Wakapanga matebule aali kkumi akwaabikka muŋanda ya Leza. Osanwe kumusanza aamwi osanwe wakaabikka kunyika. Alimwi wakapanga amitiba yangolida yakusansaizya iili mwaanda.
9 Bakabambila bapaizi bbuwa alimwi wakabamba abbuwa pati alimwi azitendele zyabbuwa eelyo. Wakazilulula zitendele eezi amukuba. 10 Wakabikka cibumbe caziba eeci kulubazu lwakumusanza lwaajwe.
11 Alimwi Hulamu wakabumba zibiya akupanga mafocolo amitiba yakusansaizya. Mbombubo oobu Hulamu mbwaakamanizya mulimo woonse ooyo ngwakacitila mwami Solomoni muŋanda ya Mwami Leza. 12 Wakapanga azicinda. Wakapanga mizila yatuwenge tuilikidwe yobilo njaakabikka kugolela zicinda.
13 Wakapanga mizila yobilo yamapomegilaneti iili myaanda yone. Mapomegilaneti akali mumizila yobilo-yobilo. 14 Wakapanga zikwiliba amitiba yazyo. 15 Wakapanga cibumbe caziba ncaakakkazika abasune. 16 Wakabumba zibiya akupanga mafocolo, ziyasyo zyanyama zyamala otatwe azimwi. Zyoonse Hulamu nzyaakabambila mwami Solomoni aŋanda ya Mwami Leza, zyakali zyamukuba uusyobwedwe.
17 Mwami Solomoni wakabumbya zibiya mucibanda ca Jolodani akati kaminzi ya Sukkoti a Zaletani. 18 Zintu eezi zyoonse Solomoni nzyaakabambya zyakali zinji cakuti bulemu bwamukuba tiibwakazizilwe pe.
19 Solomoni wakabambya zibelesyo zyamuŋanda ya Leza eezi, cipaililo cangolida, matebule aakali kubikkwa cinkwa cituuzigwa ku Mwami Leza. 20 Wakafuzya azikkalilo zyamalambe zyangolida iini-ini, amalambe aazyo kuti kaayaka kumbele lya Busena Busalalisya mbubonya mbuli mbokwaambidwe.
21 Wakafuzya muluba, malambe amano zyangolida. 22 Wakabambya tukwezuzyo twangolida iini-ini, mitiba yakusansaizya, zipampuzyo aziyokolozyo, zitendele zyangolida zyaŋanda ya Leza azitendele zyamukati kaŋanda yabusena busalalisya kubikkilizya azyaamanjililo.