2 Makani 36
Mwami Jehowahazi waku Juda
1 Eelyo bantu bacisi bakatola Jehowahazi mwanaa Josiya baakumupa bwami mu Jelusalemu mubusena bwawisi. 2 Jehowahazi wakali aamyaka iili makumi obilo aitatu naakatalika kulela, nkabela wakalela kwamyezi yotatwe. 3 Mwami waku Ijipiti wakamwaatula mubulelo ku Jelusalemu alimwi wakatezya baku Juda matalenta aansiliva aali mwaanda 4 alimwi wakabikka Eliyakimu munyina Jehowahazi kuti abe mwami mu Juda a Jelusalemu akusandula zina lyakwe akumwiita kuti Jehoiyakimu. Pele Neko wakatola Jehowahazi munyina Eliyakimu kaangidwe ku Ijipiti.
Mwami Jehoiyakimu waku Juda
5 Jehoiyakimu wakali amyaka iili makumi obilo aisanu naakatalika kulela. Wakalela mu Jelusalemu kwamyaka iili kkumi aumwi. Awalo ooyu wakabisizya Mwami Leza wakwe. 6 Nebukadineza mwami waku Babuloni wakazoomulwana akumwaanga ansimbi zyamukuba akumutola ku Babuloni. 7 Nebukadineza wakatolelezya azibelesyo zyamuŋanda ya Mwami Leza akuyoozibikka muŋanda mwakali kukombela leza wakwe. 8 Lino eezyo zyoonse Jehoiyakimu nzyaakacita, zisesemyo eezyo nzyaakacita azimwi zililembedwe mubbuku lyamakani aabami ba Isilayeli a Juda. Mwanaakwe Jehoiyakini wakaba ngomwami mubusena bwakwe.
Mwami Jehoiyakini waku Juda
9 Jehoiyakini wakali aamyaka iili kkumi alusele naakatalika kulela, wakalela kwamyezi yotatwe amazuba aali kkumi mu Jelusalemu. Awalo ooyu wakabisizya Mwami Leza. 10 Ciindi mwaka niwakazinguka, mwami Nebukadineza wakazoojata Jehoiyakini akumutola ku Babuloni, wakabweza azibelesyo ziyandika zyamuŋanda ya Mwami Leza. Kumane wakabikka Zedekiya wisi umwi Jehoiyakini kuba mwami waku Juda a Jelusalemu.
Mwami Zedekiya waku Juda
11 Zedekiya wakajisi myaka iili makumi obilo aumwi naakatalika kulela. Wakalela kwamyaka iili kkumi aumwi mu Jelusalemu. 12 Awalo ooyu wakabisizya Mwami Leza wakwe, alimwi taakalibombya nikuba kuswiilila majwi aakaamba Jelemiya musinsimi ooyo wakali kukanana majwi aa Mwami Leza. 13 Alimwi wakazangila mwami Nebukadineza nikuba kuti wakali mukonkezezye muzina lya Leza. Wakaba sicinguni kapati akuti taakapilukila ku Mwami Leza wa Isilayeli. 14 Kunze aboobo basololi bacisi ca Juda, bapaizi abantu buyo bakatobela nzila zibi zisesemyo zyamisyobo yabantu yakabazingulukide. Munzila eeyi bakasofwaazya ŋanda ya Mwami Leza eeyo njaakalisalila lwakwe mwini.
15 Mwami Leza wabasikale babo wakali kutuma majwi kwiindila mubatumwa bakwe ciindi aciindi baakucenjezya bantu nkaambo wakali aankumbu kubantu bakwe akuŋanda yakwe. 16 Pele bakali kuvoolozya batumwa aabo akusampaula majwi aakwe. Bakali kufubaazya basinsimi bukali bwa Mwami Leza bwakabazida cakuti bakabula matijilo.
17 Aboobo Mwami Leza wakaleta baku Babuloni kuzoobalwana balo aabo bakajaya bakubusi bacisi ca Juda nibaba baabo bakali muŋanda ya Leza. Taakwe mbibakasiya bakubusi baalumi abasimbi nibaba bamadaala abamacembele. Mwami Leza wakabaaba boonse kuli Nebukadineza. 18 Mwami waku Babuloni ooyu wakasaala zibelesyo zyoonse zyamuŋanda ya Leza zikomene neziceya kubikkilizya alubono lwakali muciyobwedo cakali muŋanda eeyo, niluba lwakali muzyiyobwedo zyamwami abalupati-pati bakwe. 19 Bakaumpa ŋanda ya Leza akoola bwaanda bwamunzi wa Jelusalemu. Bakaumpa maanda aabwami woonse akunyonyoona ziyandisi zyakali mumo zyoonse. 20 Aabo batakajaigwa bakatolwa mubwaange ku Babuloni. Bakabelekela Nebukadineza abalunyungu lwakwe mbuli bazike kuzoosika kuciindi cabulelo bwamuleli waku Pesiya. 21 Aboobo eezyo Mwami Leza nzyaakaambide kwiindila muli Jelemiya musinsimi zyakazuzikigwa, “Nyika iyooba tongo kwamyaka iili makumi aali ciloba mbuuli masabata aakulyookezya.”
Sailasi walailila kuti Bajuda bapilukile
22 Mumwaka wakusaanguna wakulela kwa Sailasi muleli mupati waku Pesiya, Mwami Leza wakazuzikizya majwi aakwe aakakananwa a Jelemiya. Wakacitya kuti Sailasi mwami waku Pesiya aambilizye mubulelo bwakwe boonse mulumbe ooyu wakapegwa mubulembe. 23 “Mboobu mbwaamba Sailasi muleli mupati waku Pesiya, Mwami Leza wajulu wandipa kuti ndele nyika yoonse alimwi wandipa amulimo wakuyaka ŋanda yakwe mu Jelusalemu mucisi ca Juda. Mwami Leza abe aandinywe nobantu bakwe. Amupilukile ku Jelusalemu.”