2 Makani 33

Manase mwami waku Juda

¹ Manase wakajisi myaka iili kkumi aibili naakatalika kulela, nkabela wakalela kwamyaka iili makumi osanwe aisanu mu Jelusalemu. ² Walo ooyu wakabisizya Mwami Leza mukutobela zisesemyo zyamisyobo eeyo Mwami Leza njaakatandila Baisilayeli. ³ Wakayakulula malende wisi Hezekiya ngaakamwaide. Wakayaka zipaililo zya Baali akupanga mituni ya leza mukaintu Asyela, mbubonya bwakacitide Ahabu Mwami waku Isilayeli. Wakakotamina akukomba zyakujulu. ⁴ Alimwi wakayaka zipaililo muŋanda ya Mwami Leza, mumonya oomo Mwami Leza mwaakaamba kuti, “Mu Jelusalemu mwenooyookombelwa.” ⁵ Alimwi wakayaka zipaililo mumabbuwa obilo aaŋanda ya Mwami Leza. ⁶ Wakapaizya mwanaakwe mulombe mumulilo, wakali kulowa akusonda alimwi wakali kubuzya-buzya akubaŋanga. Wakacita zinyonyoono zinji-zinji kumbele lya Mwami Leza, aboobo wakamunyemya. ⁷ Lino mutuni mubeze wa Asyela wakuubikka muŋanda njiyonya eeyo Mwami Leza njaakaambila Devedi a Solomoni mwanaakwe kuti, “Muŋanda eeyi mu Jelusalemu ngwindakasala kuzwa kumisyobo yoonse ya Isilayeli mwendinookombelwa lyoonse. ⁸ Nkabela nsikooyoontuntulisya limbi Baisilayeli kuzwa kunyika eeyo njindakapa basikale babo, kufumbwa buyo kuti kabacita cili coonse ncindakabalailila, akubamba mulawo woonse ooyo mubelesi wangu Mozesi ngwaakabapa.” ⁹ Pele Manase wakasowa bantu baku Juda akubasolwedela mukubisya kwiinda misyobo eeyo Mwami Leza njaakatandila Baisilayeli.

Manase mbwaakeempa

¹⁰ Nikuba kuti Mwami Leza wakamucenjezya Manase abantu bakwe, pele taakwe nibakamuswiilila. ¹¹ Mwami Leza wakalekela balailili bankondo bamwami waku Asiliya kuti bazoolwane Juda. Aaba bakatola Manase mubwaange, akumubikka kasita mumpemo, bamwaanga nketani zyamukuba, bamutola ku Babuloni. ¹² Naakapenga kapati wakalibombya, wapilukila ku Mwami Leza, Leza wabasikale bakwe kuti amugwasye. ¹³ Leza wakatambula akuvuwa kukomba kwa Manase, nkaako wakacita kuti apilukile ku Jelusalemu, kuyoolela alimwi. Aawo Manase wakaziba kuti Mwami Leza ngo Leza.

¹⁴ Lino kumane ceeci, Manase wakayakulula bwaandwa bulikunze bwamunzi wa Devedi, kumbo aakasensa ka Gihoni, mukkuti mane kuyoosika kumanjililo amulyango wanswi, waakuzinguluka cilundu ca Ofeli. Kunze aakooko wakabulansya bwaanda oobo. Amane wakabikka balailili babasilumamba, muminzi yoonse yakakwabilidwe mucisi ca Juda. ¹⁵ Wakagwisya muŋanda ya Leza baleza babamasi akugwisya mituni, alimwi azipaililo eezyo zyakabikkidwe mubusena mwakali ŋanda ya Leza mu Jelusalemu. Wakazisowela kunze lyamunzi. ¹⁶ Alimwi wakayakulula cipaililo ca Mwami Leza, akupa zituuzyo zyalumvwano azyazyakunywa alincico. ¹⁷ Bantu Bajuda, bakacili kupa zipaizyo mumasena amwi aandeene-andeene aakukombela, pele bakali kupaizizya ku Mwami Leza.

Mamanino aakulela kwa Manase

¹⁸ Lino zyoonse eezyo Manase nzyaakacita kubikkilizya akukomba kwakwe kuli Leza antoomwe azeezyo zyakamwaambila basinsimi muzina lya Mwami Leza wa Isilayeli, zililembedwe mubbuku lyamakani aabami ba Isilayeli. ¹⁹ Mubbuku lyabasinsimi mulilembedwe zyakukomba kwakwe, ambuli Leza mbwaakamwiingula, antoomwe azibi akutasyomeka kwakwe, zyamasena oomo mwaakayakide malende akwiimika misumpuululu yaleza mukaintu Asyela amituni. ²⁰ Manase wakafwa akuzikkwa abasikale bakwe kuŋanda yabwami, eelyo Amoni mwanaakwe nguwakaba mwami mubusena bwakwe.

Mwami Amoni waku Juda

²¹ Amoni wakajisi myaka iili makumi obilo aibili ciindi naakatalika kulela, nkabela wakalela kwamyaka yobilo mu Jelusalemu. ²² Awalo ooyu wakabisizya Mwami Leza mbubonya mbuli Manase wisi. Amoni wakakomba akupaizya mituni yoonse eeyo Manase njaakapangide. ²³ Pele taakali mbuli Manase wisi, mukuti taakalibombya ku Mwami Leza, wakaindilizya kucita zibi. ²⁴ Balupati-pati ba Amoni bakamubukila akumujaya muŋanda yakwe yabwami. ²⁵ Pele bantu bacisi bakajaya bantu boonse aabo bakamubukila mwami Amoni, bamane bakabikka Josiya mwanaakwe kuba mwami mubusena bwakwe.