2 Makani 32

Baasiliya mbubakapingila munzi wa Jelusalemu

¹ Hezekiya mbwakamanina buyo kucita zeezyo nzyaakabelekela Mwami Leza cakusyomeka, Senakelibu mwami waku Asiliya wakasaala cisi ca Juda. Wakasinkilizya minzi yakakwabilidwe kuyanda kuti aitole. ² Ciindi Hezekiya naakabona kuti Senakelibu uyanda kuulwana munzi wa Jelusalemu, ³ wakabuzya-buzya balupati-pati bakwe kubikkilizya abasilumamba zyamakani aakusinka maanzi aatusensa tuli anze lyamunzi, eelyo bakamuzuminina. ⁴ Bantu banji bakabungana akusinka tusensa kuti maanzi kaatazwi muli ntuto, nkaambo bakati mwami waku Asiliya atajani maanzi manji munsi aamunzi. ⁵ Kumane wakabeleka canguzu kubambulula bwaanda oomo mubwakoolekede akuyaka maanda malamfu aakulikwabilizya alimbubo. Kuzwa waawo wakayaka abumbi bwaanda kunze aaboobu bumwi. Amane wakabambulula zilikwabilizyo zyamunzi wa Devedi. Alimwi wakapanga zilwanyo antobo zinji. ⁶ Wakasala bapati babasilumamba kulanga bantu akubayumya-yumya amajwi aaya, ⁷ “Amuyume muzyandamane. Mutayoowi nikuba kutyompwa akaambo kamakani aamwami waku Asiliya uujisi mpi mpati. Swebo tujisi singuzu kwiinda mbabo. ⁸ Tee walo ujisi bantu balya maila, pele swebo wesu ngu Mwami Leza uukonzya kutugwasya amulumamba.” Mwami Hezekiya naakaamba boobo bantu bakayuma-yuma.

⁹ Ba Asiliya ampi yabo nibakacili ku Lakisyi, Senakelibu wakatuma balupati-pati bakwe ku Jelusalemu amajwi aaya kuli Hezekiya mwami wacisi ca Juda abantu mbaakali aabo wati, ¹⁰ “Mboobu mbwaamba mwami Senakelibu waku Asiliya ulati, ‘Ncinzi cimutunzizye kuti kamukkede mu Jelusalemu nomusinkilizigwa?’ ¹¹ Ciindi Hezekiya namwaambila kuti, ‘Mwami Leza wesu ulatuvuna kuzwa ku Baasiliya,’ ulamucenga kuti mufwe nzala anyota. ¹² Tee kayi Hezekiya lwakwe mwini nguwakamwaya malende azipaililo zya Leza ooyu kati kuli baku Juda abaku Jelusalemu, ‘Mweelede kukombela kucipaililo comwe akupaizya alincico?’ ¹³ Sena tamuzi eezyo nzitwakacita ataata kumanyika amwi? Sena baleza bamanyika aayo bakakonzya kubavuna bantu kuzwa kulindime? ¹⁴ Nguuli wabaleza bamanyika aaya taata ngaakanyonyoona wakali kukonzya kuvuna bantu bakwe kuzwa kulindime? Ani inga nywebo leza wanu wamuvuna buti kuzwa kulindime? ¹⁵ Nkaako Hezekiya atamuunini akumucenga, Mutamusyomi, nkaambo kunyina leza wamusyobo umwi naa bwami bumwi bwakali kukonzya kuvuna bantu babo kuzwa kulindime naa kuli taata. Ino mbuti leza wanu ooyo mbwanga wamuvuna kuzwa kulindime!”

¹⁶ Kwiindilizya waawa balupati-pati ba Senakelibu abalo bakasaaza Mwami Leza a mubelesi wakwe Hezekiya. ¹⁷ Mwami wabo wakalemba akutukana Mwami Leza wa Isilayeli kati, “Mbubonya mbuli baleza bamisyobo yamanyika amwi mbubatakali kukonzya kuvuna bantu babo kuzwa kulindime, awalo leza wa Hezekiya takonzyi kuvuna bantu bakwe kulindime.” ¹⁸ Balupati-pati aabo bakapozomoka majwi aaya Mucihibulu mukuti bayoosye akutyompya bantu bamu Jelusalemu bakali aabwaanda bwamunzi. Bakacita oobo kuti cibaubaubile kutola munzi ooyo. ¹⁹ Bantu aaba bakali kukanana zya Leza waku Jelusalemu mbubonya mbuli mbubakali kwaamba zyabaleza babantu bamanyika amwi, aabo bapangwa amaanza aabantu.

²⁰ Hezekiya amusinsimi Izaya mwana wa Amozi bakalilila Leza wakujulu kuli ceeci. ²¹ Aawo Leza wakatuma mungelo wakazoonyonyweeda limwi boonse basilumamba, basololi, abalupati-pati muzivuka zyamwami waku Asiliya. Aboobo mwami wabo wakapilukila kulimbabo kauside. Naakanjila muŋanda yaleza wakwe, bana bakwe beni bakamujaya amapanga.

²² Mbombuboobu Mwami Leza mbwaakavuna Hezekiya abantu baku Jelusalemu kuzwa kuli Senakelibu mwami waku Asiliya akuli bamwi boonse. Wakabakwabilila kuzwa kumabazu oonse. ²³ Bantu banji bakali kuza ku Jelusalemu, kabaleta zipaizyo ku Mwami Leza azipego kuli Hezekiya. Kuzwa waawo bamasi oonse bakali kulemeka Hezekiya.

Mwami Hezekiya mbwakaciswa akupona

²⁴ Lino ciindi eeco mwami Hezekiya wakaciswa calufu. Wakakomba ku Mwami Leza walo wakamupa citondezyo cakuti ulapona. ²⁵ Pele Hezekiya wakali kulikankaizya cakuti taakatondezya kulumba ku Mwami Leza kuli ceeco ncaakamucitila. Nkaako bukali bwa Mwami Leza bwakamusikila abamu Juda abaku Jelusalemu. ²⁶ Kumamanino Hezekiya abaku Jelusalemu bakalibombya, nkaako Mwami Leza taakabasubula muciindi cakulela kwa Hezekiya.

Zyabuvubi ampuwo ya Hezekiya

²⁷ Hezekiya wakavuba kapati cakuti bakatalika kumulemeka. Wakayasya maanda aaziyobwedo zyangolida, nsiliva, mabwe mayandisi, tununkilizyo, ntobo, azimwi zibelesyo ziyandika. ²⁸ Kuzwa waawo wakayaka matala aakubikka maila, azibikkilo zyawaini amafuta, alimwi wakayaka azimpati zyaŋombe azyamaanda aambelele. ²⁹ Kunze aaboobo Mwami Leza wakamupa mbelele, ŋombe alimwi alubono lumwi lunji cakuti wakayaka minzi minji. ³⁰ Hezekiya nguwakasinka kasensa kaku Gehoni akusya kankolola kutegwa maanzi akunkile kumbo lyamunzi wa Devedi. Wakazwidilila mulizyoonse nzyaakacita. ³¹ Ciindi batumwa baku Babuloni nibakasika kulinguwe kuzoobuzya zyamaleele aakacitika munyika, Leza wakalekelezya Hezekiya mukuti abone mpaakabikide moyo.

Mamanino aakulela kwa Hezekiya

³² Lino zimwi eezyo zyakulela kwa Hezekiya amilimo yakulyaaba kwakwe, zililembedwe mucilengaano ca Izaya musinsimi mwana wa Amozi zili mubbuku lyamakani aabami ba Juda a Isilayeli. ³³ Hezekiya wakafwa akuzikkwa abasikale bakwe kubusena kuzikkilwa balunyungu lwabwami. Baku Juda a Baisilayeli bakamulila kapati. Nkabela Manase mwanaakwe nguwakaba mwami mubusena bwakwe.