2 Makani 30
Kulibambila zyapobwe lyakwiindilila
1 Hezekiya wakatumya mulomo kubantu bazisi zya Isilayeli a Juda. Lino kwaamba zyamusyobo wa Efulemu a Manase wakabalembela magwalo buya. Boonse aaba wakabatamba kuti baboole kuŋanda ya Mwami Leza, kuzoolya pobwe lyakwiindilila lya Mwami Leza wa Isilayeli. 2 Zyamakani aaya, mwami abalupati-pati bakwe kubikkilizya abantu bamu Jelusalemu bakasala kuti pobwe lyakwiindilila libe mumwezi wabili. 3 Eeci cakaba boobo nkaambo bantu tiibakali kukonzya kucita pobwe eeli muciindi calyo, mukuti tiikwakali bapaizi banji bakalisalazizye. Alimwi kwakanyina bantu banji bakabungene mu Jelusalemu. 4 Muzeezo ooyu wakabotela mwami abantu bakwe boonse. 5 Bakazuminana kuti batambe bantu Baisilayeli kuzwida ku Biiyasyeba kuyoosikila ku Dani, boonse aaba bakaitwa kuti baboole ku Jelusalemu kuzoosekelela pobwe lyakwiindilila lya Mwami Leza wa Isilayeli. Kwaciindi cili mbocibede bantu tiibakali kuvula kweendelana ambuli mbokulembedwe.
6 Nibakalaililwa amwami abalupati-pati bakwe batumwa bakainka muzisi zya Isilayeli a Juda kabajisi abwiite oobu:
“Nobantu Baisilayeli amupilukile ku Mwami Leza wa Abulahamu, Izaka a Jakobo awalo natize kulindinywe nywebo nimwakasyaala kunkondo ya Baasiliya. 7 Mutabi mbuli basikale banu a Baisilayelinyoko bamwi batakali kusyomeka ku Mwami Leza wabasikale babo. Mbubuli mbomuzi wakabasubula calunya. 8 Mutabi basicinguni mbuli bwakali basikale banu. Amulibombye ku Mwami Leza. Amuboole kuŋanda yakwe njaakasalazya akutamani. Amubelekele Mwami Leza wanu, kuti bukali bwakwe butakamuzidi. 9 Kuti mwapilukila ku Mwami Leza, aabo bakajata basiluzubonyoko abana banu bayoobafwida nkumbu. Eelyo bayoopiluka kunyika eeyi, nkaambo Mwami Leza ngusiluse ankumbu. Naa mwapilukila kulinguwe uyoomutambula.”
10 Batumwa aabo bakaya muminzi yoonse yazisi zya Efulemu a Manase, mane kuyoosika kumusyobo wa Zebuluni, pele bantu bakabaweela akubacita cisesyo. 11 Nikuba boobo kwakali bamwi bamusyobo wa Asya, Manase a Zebuluni bakalibombya akuza ku Jelusalemu. 12 Awalo Leza wakali kubantu baku Juda kabamvwanya kuti bacite ceeco cakaamba mwami abalupati-pati bakwe, kutobela majwi aa Mwami Leza.
Pobwe lyakwiindilila lyacitwa
13 Bantu banji bakabungana mu Jelusalemu kuzoolya pobwe lyacinkwa citakwe mimena mumwezi wabili. 14 Bakabweza zipaililo zyoonse zyakali kubelesegwa mu Jelusalemu, mukutentela zipaizyo baakuzisowela mukkuti lya Kidiloni. Tubelele twapobwe lyakwiindilila twakajaigwa mubuzuba bwakkumi aane bwamwezi wabili. 15 Bapaizi Balevi batakasalede bakabaa nsoni cakuti bakalisalazya, eelyo bakali kukonzya kupaizya zyakutenta muŋanda ya Mwami Leza. 16 Aboobo bakatola malizi aabo mbokwaambidwe mu Mulawo wa Mozesi muntu wa Leza. Bapaizi bakasansaila bulowa mbubakapegwa a Balevi acipaililo. 17 Akaambo kakuti bambungano eeyo tiibakalisalalide, tiibakali kukonzya kujaya tubelele twapobwe lyakwiindilila, nkaako Balevi bakabajaila akupa tubelele twabo ooto ku Mwami Leza. 18 Kunze aaboobu bamwi bantu bakazwide kumisyobo ya Efulemu, Manase, Isakaa a Zebuluni, tiibakalisalazide. Bakalya pobwe lyakwiindilila cakuteendelana amulawo.
19 Mboobu mwami Hezekiya mbwaakabapailila wakati, “Mwami Leza, ngo Mwami Leza wabasikale babo. Nikuba kuti tabasalali kweendelana amulawo.”
20 Mwami Leza wakamvwa kukomba kwa Hezekiya, taakabacisa bantu aaba. 21 Kwamazuba aali ciloba bantu bakali mu Jelusalemu bakalya pobwe lyacinkwa citakwe mimena, kabatangala. Ciindi eeco Balevi abapaizi bakali kwiimbila Mwami Leza buzuba abuzuba, kabaimbya azingwali-ngwali zyakulumbaizya Mwami Leza. 22 Hezekiya wakalumbaizya Balevi boonse bakeendelezya kabotu kukomba ooku kwamazuba aali ciloba. Bakalya zipaanzi eezyo nzibakeelede akupa zituuzyo zyalumvwano, kabalumbaizya Mwami Leza wabasikale babo.
23 Bantu boonse bakabungene bakazuminana kuti kabacisekelela pobwe eeli kwamazuba aambi aali ciloba. Aboobo bakacita mbubonya oobo cakutangala.
24 Hezekiya mwami waku Juda wakapa bapoho bali cuulu, mbelele, ampongo zili zyuulu zili ciloba zyakuti bantu balye. Abalo balupati-pati bakwe bakapa bapoho bali cuulu ambelele ampongo zili zyuulu zili kkumi. Bapaizi banji bakalimanide kulisalazya.
25 Mbungano yoonse ya Bajuda yakatangala, antoomwe abapaizi a Balevi alimwi abaabo boonse bakazwide ku Isilayeli, alimwi abamasi bakaboolede a Baisilayeli, abaabo bakali kukkala mucisi ca Juda. 26 Kwakali lutangalo lupati mu Jelusalemu, nkaambo kuzwida kuciindi ca Solomoni mwanaa Devedi mwami wa Isilayeli taakwe nikwakacitikide cili boobu mu Jelusalemu. 27 Bapaizi a Balevi bakaleleka bantu. Leza wakabamvwa nkaambo kukomba kwabo kwakamusikila kujulu, kumakkalilo aakwe aasalala.