2 Makani 3

¹ Mwami Solomoni wakatalika kuyaka ŋanda ya Mwami Leza mu Jelusalemu acilundu ca Moliya ooko kwalo Mwami Leza nkwaakalibonya kuli Devedi wisi. Wakiiyakila aakali cuumino ca Alauna Mujebusi. ² Wakatalika kuyaka mubuzuba bwabili mumwezi wabili bwamwaka wane wakulela kwakwe. ³ Mboobu Solomoni mbwaakiiyaka, yakali kulampa tukokola tuli makumi aali cisambomwe, bwamba bwakali kulampa tukokola tuli makumi obilo. ⁴ Bulamfu bwakaanda kakumanjililo kakali kweelene abwamba bwaŋanda ya Leza, yakali kulampa tukokola tuli makumi obilo abwalo bulamfu bwakuya mujulu bwakali kulampa tukokola tuli makumi obilo. Mukati lyakazilulwidwe angolida iini-ini. ⁵ Ŋanda mpati yakamatikidwe tupulanga twakazilulwidwe angolida iini-ini akucekaulwa tukunka atuwenge. ⁶ Wakasakatizya ŋanda ya Leza amabwe meebesi. Ngolida njaakabelesya yakazwidide ku Paavaimu. ⁷ Wakazilulula masomo, zisamu zyacitendele, bwaanda, azitendele zyaŋanda ya Leza angolida. Wakacekaula bakelebu abwaanda. ⁸ Kaanda kubusena busalalisya kakali kulampa mbuli bwamba bwaŋanda ya Leza, kakali kulampa tukokola tuli makumi obilo mubulamfu amubwamba. Mukati wakakazilulula amatalenta aali myaanda iili cisambomwe aangolida iini-ini. ⁹ Mpikili zyangolida zyakali kulema masyekeli aali makumi osanwe. Bwaanda bwatwaanda twamujulu twakazingululwidwe angolida.

¹⁰ Solomoni wakapanzya bakelebu bobilo mbaakazilulula angolida akubabikka mubusena busalalisya. ¹¹ Kuzwa kumpela lyabbaba limwi kuyoosika kuli limwi kwakali tukokola tuli makumi obilo. Ibbaba lyakelebu wakusaanguna lyakali kulampa tukokola tosanwe alimwi kumwi kubwaanda bwaŋanda ya Mwami Leza, ooku kumwi bbaba limwi, alyalo lyakali kulampa tukokola tosanwe bbaba lyakelebu wabili lyakali kulampa tukokola tosanwe, lyakagumide kelebu umwi. ¹² Mbubonya buyo bbaba lyakelebu wabili lyakali kulampa tukokola tosanwe, alyalo lyakagumide bwaanda bwaŋanda ya Leza, kakuli limwi alyalo lilampa tukokola tosanwe lyakagumide kelebu wakusaanguna. ¹³ Mababa aabakelebu bobilo aabo akakwakwabukide tukokola tuli makumi obilo. Bakaliimvwi kabalangide muŋanda mpati. ¹⁴ Wakaluka cisitilizyo cacijulu-julu, cisombo atutali toosedwe kabotu twandeketela, cakasimbidwe bakelebu.

Zicinda zyobilo zyamukuba

¹⁵ Kumbele aaŋanda ya Leza wakabamba zicinda zyobilo antoomwe zyakali kulampa tukokola tuli makumi otatwe atusanu. Cicinda comwe-comwe cakalijisi cipumpu cilampa tukokola tosanwe. ¹⁶ Wakabamba tuwenge twakalukidwe kabotu-kabotu ntwaakabikka atala aazicinda. Wakabamba mapomegilaneti aali mwaanda ngaakaangilila kutuwenge. ¹⁷ Zicinda eezi wakaziyakila kumbele lyaŋanda ya Leza, cimwi cakali kumusanza, cimwi kunyika. Cakumusanza wakacuulika kuti Jakini, cakunyika wakacuulika kuti Bowazi.