2 Makani 29
Mwami Hezekiya waku Juda
1 Hezekiya wakajisi myaka iili makumi obilo aisanu naakatalika kulela, nkabela wakalela kwamyaka iili makumi obilo afuka mu Jelusalemu. Banyina bakali ba Abija mwanaa Zekaliya. 2 Ooyu wakacita ziluleme ku Mwami Leza mbubonya mbuli Devedi sikale wakwe mbwaakacita.
Kusalazya ŋanda ya Mwami Leza
3 Mumwezi wakusaanguna mumwaka wakwe wakusaanguna kulela Hezekiya wakajalula milyango yakuŋanda ya Mwami Leza akwiibambulula.
4 Wakabunganya bapaizi mubbuwa lili kujwe lyaŋanda ya Leza, 5 akwaamba kulimbabo kuti, Nywebo no Balevi mweelede kulisalazya akusalazya ŋanda ya Mwami Leza, Leza wabasikale banu. Mugwisye muŋanda eeyo kufumbwa cinga ciisofwaazya.
6 Basikale besu tiibakali kusyomeka bakali kucita zitaluleme ku Mwami Leza wesu, akumusiya. Bakafutatila busena mbwakkala.
7 Bakajala milyango yaŋanda ya Leza, malambe akazima alimwi tiibakacili kuumpa tununkilizyo azipaizyo kuŋanda ya Leza wa Isilayeli. 8 Akaambo kaako bukali bwa Mwami Leza bwakazida Bajuda abamu Isilayeli. Ncaacita kulimbabo cakankamika akuyoosya bantu boonse. Nywebo lwanu mulizi makani aaya kabotu-kabotu. 9 Nkaambo kaako bamatata bakajaigwa munkondo, abalo bakaintu abana besu bali mubwaange.
10 “Lino ndayeeya kuti mbambe cizuminano a Mwami Leza, Leza wa Isilayeli, kucita kuti bukali bwakwe kulindiswe butaindilili. 11 Nobana bangu, mutalilekeleli. Ndinywe Mwami Leza mbaakasala kuumpa tununkilizyo akusolweda bantu bakwe mukulumba.”
12 Mbaaba Balevi bakaliko, kuzwa kuciinga ca Kohati kwakali Mahati mwana wa Amasiya a Joweli mwana wa Azaliya. Kuzwa kuciinga ca Melali kwakali, Kusyi mwana wa Abudi a Azaliya mwanaa Jehaleleli. Kuzwa kuciinga ca Gesyoni kwakali Jowa mwanaa Zima a Edeni mwanaa Jowa. 13 Kuzwa kulunyungu lwa Elizafani kwakali Syimuli a Jeiyeli. Kuzwa kulunyungu lwa Asafu kwakali Zekaliya a Mataniya. 14 Kuzwa kulunyungu lwa Hemani kwakali Jehiyeli a Syimeyi. Kuzwa kulunyungu lwa Jedutuni kwakali, Syemaiya a Uziyeli.
15 Aaba baalumi bakabunganya Balevinyina, eelyo boonse bakalisalazya. Bamane mukweendelana abwakabalailila mwami, bakatalika kusalazya ŋanda ya Mwami Leza mbubonya mbuli bwaamba mulawo wa Mwami Leza.
16 Bapaizi bakanjila muŋanda eeyo biisalazya, kumane bakagwisizya mubbuwa zyoonse eezyo zitasalali nzibakajana muŋanda ya Mwami Leza. Kuzwa moomo Balevi bakazigwisizya anze bazitola kukkuti lya Kidiloni.
17 Lino mulimo wakusalazya ooku wakatalika mubuzuba bwakusaanguna bwamwezi mutaanzi, kuyoosika mubuzuba bwalusele bwakumanizizya limwi. Kwamazuba aambi aali lusele bakali kusalazya ŋanda ya Mwami Leza lwayo iini, bakamanizya mubuzuba bwakkumi acisambomwe bwamwezi mutaanzi nguwenya ooyo.
Ŋanda yakukombela yapegwa ku Mwami Leza alimwi
18 Lino aawo Balevi bakaya kumwami Hezekiya akuyoomwaambila oobu, “Twiisalazya ŋanda ya Mwami Leza yoonse kubikkilizya acipaililo cakutentela azibelesyo zyaco, alimwi atebule libikkwa zinkwa zyatuuzigwa, azibelesyo zyalyo. 19 Alimwi twapilusya zintu zyoonse mwami Ahazi nzyaakagwisizye mumyaka yakutasyomeka kwakwe kuli Leza. Azyalo twazisalazya zyoonse twazibikka kumbele lyacipaililo ca Mwami Leza.”
20 Bucica buyo cifumo-fumo mwami Hezekiya wakabunganya basololi bamumunzi aabo bakainka anguwe kuŋanda ya Mwami Leza. 21 Bakaleta bapoho bali ciloba, mbelele zili ciloba, tubelele tuli ciloba, ampongo zili ciloba. Eezi zyakali cipaizyo cakukombelezezya zinyonyoono zyabwami azinyonyoono zyabantu bacisi ca Juda alimwi acipaizyo cakusalazya ŋanda ya Mwami Leza. Mwami wakaambila bapaizi aabo bali mbalunyungu lwa Aloni kupaizya banyama aaba acipaililo.
22 Aawo bakajaya bapoho, kumane bakabweza bulowa akubusansaila acipaililo. Bamane bakajaya mbelele akusansaila bulowa bwazyo acipaililo. 23 Mpongo zyakukombelezezya cinyonyoono zyakaletwa ku mwami akubantu bakabungene balo bakabikka maanza aabo alinzizyo. 24 Kumane boobo bapaizi bakajaya mpongo eezyo akutila bulowa bwazyo mbuli cituuzyo cakukombelezezya zinyonyoono zyabantu boonse kweendelana abwakalailila mwami kuti zipaizyo zyakutenta akukombelezezya zicitilwe bantu boonse.
25 Hezekiya wakatobela malailile Mwami Leza ngaakapede Devedi kwiindila muli Gadi wakali musinsimi wakwe, alimwi amuli Natani. Wakaimika Balevi muŋanda ya Leza kabajisi tulumbu, nsakalala atuntimbwa.
26 Zingwali-ngwali zili mbuli zeezyo mwami Devedi nzyaakali kwiimbya. Abalo bapaizi bamwi bakaimvwi aawo ambabo bakajisi myeembo. 27 Aawo Hezekiya wakalailila kuti kutentwe zipaizyo acipaililo. Mbubakatalikila buyo bantu bakatalika kulumbaizya Mwami Leza munyimbo, kabaimbya azingwali-ngwali ziindene-indene. 28 Boonse bakaliko ooko bakaswaangana mukukomba, ciindi eeco baimbi bakali kwiimba, abasimyeembo bakali kusiba. Kwiimba ooku kwakatolelela kusikila nibakamanizya kupaizya. 29 Kumane boobo Hezekiya abantu boonse bakavuntama akukomba Leza. 30 Mwami abasololi babantu bakaambila Balevi kwiimba nyimbo zyakutembaula Mwami Leza zyakalembwa a Devedi alimwi a Asafu musinsimi. Aboobo bakaimba boonse cakutangala, kabavuntama akukomba.
31 Hezekiya wakati, “Lino mwalipa ku Mwami Leza, aboobo amulete zipaizyo azituuzyo zyakulumba kuŋanda ya Mwami Leza.” Eelyo mbungano yakaleta zituuzyo zyakulumba ku Mwami Leza, bamwi babo bakaleta zipaizyo zyakutenta zyakuliyandila. 32 Zipaizyo zyakutenta nzibakaleta ku Mwami Leza nzeezi, bapoho bali makumi aali ciloba, mbelele zili mwaanda, atubelele tuli myaanda yobilo. 33 Banyama bakapaizigwa antoomwe bapoho bakali myaanda iili cisambomwe kubikkilizya ambelele ampongo zili zyuulu zyotatwe. 34 Akaambo kakuti kwanyina bapaizi banji bakali kukonzya kujaya banyama boonse aaba, Balevi bakagwasya kusikila mulimo niwakamana. Ciindi eeci bapaizi bamwi bakalilisalazizye. Balevi bakalikusyomeka mukulisalazya kwiinda bapaizi. 35 Zipaizyo zyakutenta zyakali zinji kapati kubikkilizya amafuta aakali kutentwa acipaizyo calumvwano alimwi kwakali azituuzyo zyazyakunywa zyakali kupedwa antoomwe azipaizyo zyakutenta.
Mbombuboobu kukomba muŋanda ya Leza mbokwakatalika alimwi. 36 Hezekiya abantu boonse bakatangala, nkaambo Mwami Leza wakabagwasya kuti bacite eezi zyoonse cakufwambaana.