2 Makani 27
Mwami Jotamu wacisi ca Juda
1 Jotamu wakali amyaka iili makumi obilo aisanu naakatalika kulela. Nkabela wakalela mu Jelusalemu kwamyaka iili kkumi acisambomwe. Banyina bakali Jelusya mwanaa Zadoki. 2 Ooyu wakacita ziluleme ku Mwami Leza mbuli Uziya wisi, pele walo taakabisizya Mwami Leza akuumpa tununkilizyo mbuli wisi. Nikuba boobo bantu tiibakaleka kucita nzila zyabo zibi.
3 Jotamu wakayakulula mulyango wakutala waŋanda ya Mwami Leza, akubambulula bwaanda kabotu kubusena bwa Jelusalemu butegwa Ofeli.
4 Muzilundu zyamucisi ca Juda, mugundu wakayaka zikwabilizyo amaanda malamfu. 5 Jotamu wakalwana amwami waku Amoni akumuzunda. Mwaka ooyo Baamoni bakatela matalenta aansiliva aali mwaanda, azisuwo zyamaila aabulotwe zili zyuulu zili makumi osanwe azyuulu zili makumi osanwe aamaila buyo. Baamoni bakatela mbubonya oobu mwaka wabili awatatu.
6 Jotamu wakaba singuzu nkaambo wakali kusyomeka akuswiilila Mwami Leza.
7 Lino zyoonse eezyo Jotamu nzyaakacita kubikkilizya ankondo nzyaakalwana azimwi zililembedwe mubbuku lyamakani aabami Baisilayeli a Juda. 8 Wakali aamyaka iili makumi obilo aisanu naakaba mwami, nkabela wakalela mu Jelusalemu kwamyaka iili kkumi acisambomwe. 9 Jotamu wakafwa, akuzikkwa abasikale bakwe mumunzi wa Devedi, eelyo Ahazi mwanaakwe nguwakalela mubusena bwakwe.