2 Makani 24

Mwami Jowasyi wacisi ca Juda

¹ Jowasyi wakali aamyaka iili ciloba naakaba mwami, nkabela wakalela kwamyaka iili makumi one mu Jelusalemu. Banyina bakali ba Zibiya bazwa ku Biiyasyeba. ² Jowasyi wakali kucita ziluleme ku Mwami Leza mumyaka yoonse ya Jehoiyada mupaizi. ³ Jehoiyada wakakwatila Jowasyi bakaintu bobilo aabo bakamuzyalila bana balombe abasimbi.

⁴ Naakali mwami kwaciindi, Jowasyi wakayanda kubambuluzya ŋanda ya Mwami Leza. ⁵ Aboobo wakaita bapaizi a Balevi, wakabaambila kuti, “Kamuya muminzi yoonse yamu Juda mukatambule mali aakonzya kubambuluzya ŋanda ya Mwami Leza mwaka amwaka kuzwa ku Baisilayeli boonse. Kamuya ono!” Pele Balevi tiibakacita oobo cakufwambaana. ⁶ Nkaako mwami wakaita Jehoiyada mupaizi silutwe akuti kulinguwe, “Ino nkaambo nzi yebo nootaambila Balevi kuleta mutelo wakaamba Mozesi mubelesi wa Mwami Leza, kuzwa ku Juda a Jelusalemu, mukugwasilizya mulimo watente lyacizuminano.”

⁷ Lino aabo bakali kutobela Ataliya mukaintu mubi, bakapwaya ŋanda ya Leza alimwi bakabelesya zisalala zyamumo mukukomba Baali.

⁸ Kweendelana akulailila kwa mwami Balevi bakapanga bbokesi lyamulumbo ndibakabikka kumanjililo aakuŋanda ya Leza. ⁹ Aboobo bakatumya mucisi ca Juda coonse a Jelusalemu kuti bantu balete mulumbo ooyo Mozesi mubelesi wa Leza ngwaakaambila Baisilayeli. ¹⁰ Balupati-pati boonse alimwi abantu boonse bakaleta mulumbo cakutangala, bakali kulosya mubbokesi eelyo, limwi lyazula. ¹¹ Lyoonse kwali kunga Balevi baleta bbokesi kuli balupati-pati bamwami, alimwi nibakali kubona kuti kuli mali manji, mulembi wamwami amugwasyi wamupaizi silutwe, bakali kwaagwisya mali akupilusya bbokesi eelyo mpolikkala. Mbubakali kucita oobu lyoonse, nkaako kwakajanika mali manji-manji.

¹² Mwami Jehoiyada wakaapa baalumi aabo bakali kulanga babambulula ŋanda ya Leza. Balo bakanjizya bayasya mabwe, babezi abafuzi balubulo amukuba kuti babambulule ŋanda ya Mwami Leza. ¹³ Aabo bakali kulanga babelesi bakali bankutwe cakuti mulimo wakaya kumbele. Bakiibambulula ŋanda ya Mwami Leza cakuti yakaba mbubonya mbuyakabede kusaanguna, alimwi bakiiyumya kwiindilila. ¹⁴ Nibakamanizya, bakaleta mali aakasyaala kumwami akuli Jehoiyada, balo bakaabambya zibelesyo zyamuŋanda ya Leza eezi: zyakubelesya mukukomba, mukutentela, azibelesyo zimwi zyangolida ansiliva.

Milawo ya Jehoiyada mbuyakacincwa

Mubuumi bwa Jehoiyada boonse, zipaizyo zyakali kupegwa lyoonse kuŋanda ya Mwami Leza.

¹⁵ Lino Jehoiyada wakoongola wakafwa kajisi myaka iili mwaanda amakumi otatwe. ¹⁶ Wakazikkilwa muzyuumbwe zyabwami mumunzi wa Devedi, nkaambo kazibotu nzyaakacitila Baisilayeli, Leza, alimwi aŋanda ya Leza. ¹⁷ Ucifwa buyo Jehoiyada balupati-pati baku Juda bakazookombelezya mwami Kuti kaswiilila mbabo. ¹⁸ Bakasiya kukombela muŋanda ya Mwami Leza wabasikale babo batalika kukomba misumpuululu ya Leza mukaintu Asyela amituni imwi. Nkaambo kakubisya kwabo ooku, bukali bwa Mwami Leza bwakasikila cisi ca Juda a Jelusalemu. ¹⁹ Nikuba kuti Mwami Leza wakali kutumina basinsimi kubantu aabo kuti babapilusye kulinguwe, alimwi nikuba kuti bakali kubaambila zyakubisya kwabo, pele tiibakaswiilila. ²⁰ Aboobo Muuya wa Mwami Leza wakasikila Zekaliya mwanaa Jehoiyada mupaizi. Wakaima kumbele lyabantu akuti, “Mboobu mbwaamba Leza, ‘Nkaambo nzi ncomutaswiilili milawo ya Mwami Leza? Tamutizwidilile. Nkaambo mwamukaka Mwami Leza, awalo wamukaka.’” ²¹ Nibakamvwa boobo bakamubukila, mukulaililwa amwami bakamuuma mabwe, wafwa mubbuwa lyaŋanda ya Mwami Leza. ²² Mwami Jowasyi taakayeeya zyaluse Jehoiyada wisi Zekaliya nzyaakamucitila, wakajaya mwanaakwe, Zekaliya naakali kufwa wakati, “Mwami Leza acibone ncoocita akukusubula!”

²³ Mwaka niwakazinguka, mpi ya Baalamu yakalwana Jowasyi. Yakasaala cisi ca Juda a Jelusalemu akujaya basololi babantu boonse. Nzibakasaala bakazitola kumwami wabo ku Damasikasi. ²⁴ Nikuba kuti basilumamba baku Alamu bakajisi mpi nsyoonto, Mwami Leza wakaaba mpi mpati kulimbabo. Cakacitika eeci nkaambo baku Juda bakasiya Mwami Leza wabasikale babo. Mbombuboobu Jowasyi mbwaakasubulwa. ²⁵ Baalamu nibakapilukila, bakasiya Jowasyi bamucisa kapati, nibakabona boobo balupati-pati bakwe bakamubukila nkaambo wakajaya mwanaa Jehoiyada mupaizi, nkaako bakamusaulwida abulo bwakwe. Wakafwa alimwi bakamuzikka mumunzi wa Devedi pele kutali muzyuumbwe zyabwami. ²⁶ Mbaaba balupati-pati bakamubukila: Zabadi mwanaa Syimeyati mukaintu waku Amoni, a Jehozabadi mwanaa Syimuliti mukaintu waku Mowabu. ²⁷ Bupanduluzi bwabbuku lyaamba zyamakani aabami mbobulungulula zyabana bakwe basinsimi, alimwi akwaamba zyakwe, ambuli mbwaakabambulula ŋanda ya Leza. Amaziya mwanaakwe nguwakalela mubusena bwakwe.