2 Makani 20

Baedomu mbubakalwana

¹ Nikwakainda ciindi Bamowabu, Baamoni, abamwi ba Bameuni bakaza kuzoolwana Jehosyafati. ² Bamwi bakazooambila Jehosyafati bati, “Kuli mpi mpati yazwida ku Edomu kuzookulwana, kuzwida kulubazu lumwi lwalwizi lwamunyo. Batola kale Hazazonitamaa.” Uuli ngo Engedi. ³ Kayoowede Jehosyafati wakayeeya kubuzya Mwami Leza, alimwi wakalailila kuti bantu ba Juda boonse baliimye kulya. ⁴ Aawo bantu bamu Juda bakaza kuzookumbila lugwasyo ku Mwami Leza, iiyi, bakazwida muminzi yoonse yacisi ca Juda. ⁵ Bakazoobungana abantu bamu Jelusalemu mubbuwa lipya lyaŋanda ya Mwami Leza. Aawo Jehosyafati wakainka, waima kumbele lyabo. ⁶ Wakakomba wati, “O Mwami Leza wabasikale besu, tee nduwe oolela manyika oonse kuzwida kujulu. Ulijisi nguzu kapati taakwe uukonzya kukuyumina. ⁷ Akaka O Leza wesu, tee nduwe wakatandila bantu bako Baisilayeli bantu bamunyika ino? Wakapa balunyungu lwa Abulahamu mweenzinyoko kuti ibe yako akutamani. ⁸ Balikkede mulinjiyo akukuyakila ŋanda yakukombela kabati, ⁹ ‘Naa kwatusikila penzi lyakutusubula mbuli nkondo, cuumo niiba nzala, tuyooima kumbele lya Mwami Leza kuŋanda iiitwa zina lyakwe.’ Banookomba mumapenzi, yebo uyoobavuna.

¹⁰ “Lino kwaboola bantu baku Amoni, Mowabu a Edomu kuti bazootulwane. Ciindi basikale besu nibakazwa mu Ijipiti wakabakasya kuti banjile mumanyika aayo, nkaako bakeeleba, tiibakaaola pe. ¹¹ Lino mbaaba bayanda kutubweedezya, bayanda kututanda munyika njookatupa. ¹² Akaka O Leza wesu basubule nkaambo lwesu tunyina mputo zyakulwana mpi eeyi yatusaala. Tatuzi cakucita pe, tulangila kulinduwe kuti utugwasye.”

¹³ Lino baalumi boonse bacisi ca Juda abakaintu abana babo bakaliimvwi kuŋanda ya Mwami Leza. ¹⁴ Aawo Muuya wa Mwami Leza wakasikila Mulevi umwi Jehaziyeli mwana waciinga ca Asafu, wakali walunyungu lwa Asafu kuzwa kuli Mataniya, Jeiyeli a Benaiya.

¹⁵ Jehaziyeli wakati, “Ndiswiilila omwami Jehosyafati abaabo boonse ba Juda a Jelusalemu. Mboobu mbwaamba Mwami Leza kulindinywe, ‘Mutayoowi akutyompwa akaambo kampi eeyi, nkaambo nkondo eeyi tiili yanu njiya Leza.’

¹⁶ “Juunza mukainke kubalwana ciindi baakutanta kabatobela kazila kaku Zizi. Muyoobajana kumanina kkuti lyakunkanda ya Jeluyeli.

¹⁷ “Tamulindinywe nomuyoobalwana nkondo eeyi pe. Mukandandame, mukalibonene mbuli Mwami Leza mbwayoomuzundila nywebo nobantu ba Juda a Jelusalemu. Mutayoowi nikuba kutyompwa. Mukainke kubalwana juunza Mwami Leza unooli aandinywe.”

¹⁸ Lino aawo Jehosyafati wakakotama abantu ba Juda a Jelusalemu boonse bakavuntama kukomba Mwami Leza. ¹⁹ Aawo Balevi bamwi baziinga zya Kohati a Kola bakaima akulumbaizya Mwami Leza wa Isilayeli cakupozomoka.

²⁰ Lino kakucili kooko cifumo-fumo bakainka kunkanda ya Tekowa. Mbubakeendela buyo Jehosyafati wakati, “Amundiswiilile nobantu ba Juda abamu Jelusalemu, amubikke lusyomo lwanu mu Mwami Leza, ndendilyo nomuyookonzya kulwana. Amusyome zimwaambila basinsimi bakwe, eelyo muyoozwidilila.” ²¹ Amane kubuzya-buzya bantu, Jehosyafati wakasala baimbi mbaakaambila kuti basame zisalala zyabwiimbi akweendela kumbele lyampi, kabaimba kuti, “Alumbaizigwe Mwami Leza! Luyando lwakwe lutazungaani ndwalyoonse alyoonse.”

²² Mbubakatalikila buyo kwiimba, Mwami Leza wakapyopyonganya mpi yabasikusaala. ²³ Baamoni a Bamowabu bakalwana mpi ya Baedomu akubanyonyweeda limwi, bamane bakabukilana beni. ²⁴ Ciindi Baalumi baku Juda nibakasika kumunzi muniini uujisi ŋanda ndamfu yakusompelela, akulanga kwakali mpi eeyo bakabona buyo mibili yakaduumene, taakwe wakatija pe.

²⁵ Lino Jehosyafati abasilumamba bakwe bakasaala ŋombe, bulilu, zyakusama, azibelesyo zimwi zibotu zinji. Cakabatolela mazuba otatwe kusaala, nikuba boobo bakakacilwa kuzibweza zyoonse. ²⁶ Mubuzuba bwane bakabungana mukkuti lya Belaka, akulumbaizya Mwami Leza, ncenciceeci ncolitegwa kkuti lya Belaka asunu. ²⁷ Kuzwa waawo Jehosyafati wakasolweda basilumamba bakwe cakuzunda ku Jelusalemu, Mwami Leza nguwakabazundila basinkondonyina. ²⁸ Nibakasika mumunzi bakainka kuŋanda ya Mwami Leza kabaya buuma tuntimbwa, akusiba mpeta, amyeembo. ²⁹ Misyobo yoonse yakamvwa mbuli Mwami Leza mbwaakazunda basinkondonyina a Baisilayeli. ³⁰ Jehosyafati wakalela cakuliiba, nkaambo Mwami Leza wakamupa luumuno kumabazu oonse.

Mwami Jehosyafati wa Juda

³¹ Mbombuboobu Jehosyafati mbwaakalela mu Juda. Wakali aamyaka iili makumi otatwe aisanu ciindi naakaba mwami wacisi ca Juda, nkabela wakalela mu Jelusalemu kwamyaka iili makumi obilo aisanu. Banyina bakali ba Azuba mwanaa Syilihi. ³² Wakali kutobela nzila zya Asa wisi, wakali kucita ziluzi ku Mwami Leza. ³³ Nikuba boobo taakamwaya malende, aboobo bantu tiibakakomba Mwami Leza wabasikale babo amoyo woonse.

³⁴ Lino zyoonse eezyo Jehosyafati nzyaakacita kuzwa naakatalika kulela kusikila kumamanino zililembedwe mumabbuku aa Jehu mwanaa Hanani aaamba zyamakani aabami ba Isilayeli.

³⁵ Lino cimwi ciindi Jehosyafati mwami wacisi ca Juda wakayanzana a Ahaziya wacisi ca Isilayeli wakali kucita zibyaabi zinji. ³⁶ Kucito ca Eziyongeba bakabamba mato mapati aamakwebo. ³⁷ Pele Eliyazaa mwanaa Dodavahu waku Malesya, wakamucenjezya akuti, “Nkaambo kakuti mwayanzana a Ahaziya, Mwami Leza ulapwayaula nzimwabamba.” Nkaako mato akaandauka taakakonzya kweenda pe.