2 Makani 2

Solomoni mbwaakalibambila kuyaka ŋanda ya Leza

¹ Lino Solomoni wakayeeya kuyaka ŋanda yakukombela Mwami Leza alimwi ayakwe yabwami. ² Wakasala bantu bakali zyuulu zili makumi aali ciloba kuti kabasusa zintu zyakuyasya alimwi abali zyuulu zili makumi aali lusele kuti kababeza mabwe muzilundu, abali zyuulu zyotatwe amyaanda iili cisambomwe babalanga.

³ Solomoni wakatumya makani aaya kuli Hilamu mwami waku Taya wakati, “Nditumina mikamba mbuli mbookacita kuli taata Devedi naakali kuyaka ŋanda yabwami. ⁴ Cino ciindi ndilibambilide ŋanda yakukombela Mwami Leza wangu. Iyooba busena busalala ooko nkotunoomukomba akutenta tununkilizyo cifumo-fumo, kumangolezya, mu Masabata, ciindi camwezi mupya aziindi zyamapobwe aakulemeka Mwami Leza wesu. Kweendelana akulailila kwakwe ku Baisilayeli mane kukabe kutamani. ⁵ Ŋanda njeyanda kuyaka nimpati, nkaambo Leza wesu mupati kwiinda tumwi twaambwa kuti ntuleza. ⁶ Nikuba boobo taakwe muntu uukonzya kuyakila Leza ŋanda, kayi nimuba mujulu lyamajulu takonzyi kweela. Ino ono mebo mbuti mbwenga ndayaka ŋanda kunze aayakupaizizya buyo. ⁷ Ndakukumbila nditumizya muntu sibuuya mumulimo wangolida, nsiliva, mukuba, alubulo. Alimwi amukuluka masani aacisombo, aadowalowa, aacijulu-julu, atutali toosedwe twacijulu-julu, alimwi kazi zyakusimba. Uzoobelekela mucisi ca Juda mu Jelusalemu, antoomwe abasibuuya bangu kuli zyamaanza, aabo Devedi taata mbaakandipa. ⁸ Ndizi kuti bantu bako balicibwene kutema masamu, aboobo nditumina mukamba, mupulanga amulembe kuzwa ku Lebanoni. Ndilibambilide kutuma bantu bangu kuti bazoogwasye bantu bako, ⁹ mukuti bazooteme zisamu zinji, nkaambo ŋanda ya Leza njeyanda kuyaka inooli mpati yeebeka. ¹⁰ Ndiyoopa bantu bako basikutema masamu, talo lyamaila aasyubwidwe, talo lyawaini, atalo lyamafuta aaoliva.”

¹¹ Mwami Hilamu waku Taya wakasandula Solomoni wati, “Nkaambo kakuti Mwami Leza ulabayandisisya bantu bakwe wabapa nduwe kuti ube mwami wabo. ¹² Aalumbaizigwe Mwami Leza wa Isilayeli wakalenga julu anyika! Wakapa Devedi mwana musongo, simaanu uuteelela. Uutiyakile Mwami Leza ŋanda alimwi aŋanda yabwami yakwe mwini. ¹³ Ndakutumina Hulamuabi mwaalumi sibuuya. ¹⁴ Banyina bakali bamusyobo wa Dani, wisi ngwaku Taya. Wakaiisigwa kabotu mumulimo wangolida, nsiliva, mukuba, lubulo, mabwe azisamu. Wakalicibwene kuluka masani aacisombo, acijulu-julu, atutali toosedwe twadowa-lowa andeketela. Ngusibuuya mumilimo yoonse yakusimba. Ulakonzya kusimba kufumbwa ncaatondezegwa. Uzoobeleka abasibuuya bako kubikkilizya abakakusiila Devedi uso. ¹⁵ Nkaako tumina babelesi bako maila amwi mafuta aaoliva awaini ngookasyomezya. ¹⁶ Swebo tuzootema zisamu zyoonse nzyoyanda kuzwa ku Lebanoni akuzyaanga muziliba kuti zizoosike ku Jopa alwizi. Nywebo mulakonzya kuzibweza kuzwa kooko kuzitola ku Jelusalemu.”

Ŋanda ya Leza mbuyakatalikwa kuyakwa

¹⁷ Mwami Solomoni wakabala bamasi boonse bakali kukkala mu Isilayeli mbubonya bwakacitide Devedi wisi. Wakajana kuti bakali zyuulu zili mwaanda amakumi otatwe amyaanda iili cisambomwe. ¹⁸ Wakatumina bantu bakali zyuulu zili makumi aali ciloba kuti kabasusa zintu zyakuyasya, abali zyuulu zili makumi aali lusele kuti kababweza mabwe muzilundu, abali zyuulu zyotatwe amyaanda iili cisambomwe babalanga.