2 Makani 18

¹ Lino Jehosyafati wakalivubide akulemekwa kapati. Wakaswaangana Ahabu mulukwato. ² Nikwakainda myaka iili mboibede Jehosyafati wakainka kuyooswaya Ahabu ku Samaliya. Ahabu wakajaila Jehosyafati abantu bakwe bakamusindikide mbelele aŋombe zinji. Aboobo wakoongelezya Jehosyafati kuti bakalwane munzi wa Lamotigiliyadi.

³ Ahabu mwami wacisi ca Isilayeli wakabuzya Jehosyafati mwami wacisi ca Juda kuti, “Sena inga wakonzya kuunka andiswe kuyoolwana Lamotigiliyadi?” Jehosyafati wakaingula kuti, “Mebo ndili mbuli nduwe, bantu bangu bali mbuli bantu bako, tulilibambilide kuunka kunkondo andinywe.” ⁴ Pele Jehosyafati wakaambila mwami wacisi ca Isilayeli kuti, “Kusaanguna uleelede kubuzya Mwami Leza kumakani aaya.”

⁵ Aboobo Ahabu mwami wacisi ca Isilayeli wakaita basinsimi bakatisike kumyaanda yone, wakababuzya kuti, “Sena nduunke kuyoolwana Lamotigiliyadi naa pe?”

Basinsimi aabo bakati, “Koya buyo ukuulwane nkaambo Mwami Leza uyoowaaba kulinduwe.” ⁶ Pele Jehosyafati wakabuzya kuti, “Sena taakwe uumbi musinsimi wa Mwami Leza ngotunga twabuzya?”

⁷ Ahabu mwami wacisi ca Isilayeli wakaingula kuti, “Mpali aumbi ngotukonzya kubuzya, Mikaiya mwana wa Imula. Pele mebo ndilimusulide muntu ooyu, nkaambo kakuti lyoonse taakwe nasinsima zintu zibotu kulindime pe, ccita zibi buyo.” Pele Jehosyafati wakaingula kuti, “Peepe utaambi boobo pe.”

⁸ Mpawo Ahabu wakaita umwi wabalupati-pati bakwe wamwaambila kuti akalete Mikaiya cakufwambaana.

⁹ Lino bami aaba bobilo bakasamide majansi aabo aabwami kabakkede azyuuno zyabo kulubuwa lwakuumina maila luli anze lyamulyango wa Samaliya, basinsimi aabo boonse bakali kusinsima kumbele lyabo. ¹⁰ Umwi wabasinsimi aaba uutegwa Zedekiya mwanaa Kanaana, wakapanga meja aalubulo, eelyo wakati kuli Ahabu, “Nceeci ncaamba Mwami Leza ulati, ‘Ameja aaya ulakonzya kubalwana Baalamu akubanyonyweeda limwi boonse.’” ¹¹ Abamwi basinsimi aabo bakali kwaamba mbubonya kabati, “Koya buyo ukalwane Lamotigiliyadi. Mwami Leza wakuzundya kale.” ¹² Aawo uulya wakatumidwe kuyooita Mikaiya wakati kulinguwe, “Bona, basinsimi boonse aaba baamba kuti mwami uyoozunda, aboobo ayebo weelede kusinsima mbubonya buyo.”

¹³ Pele walo Mikaiya wakaamba kuti, “Mbuli Mwami Leza mbwali muumi, ndilaamba zitindaambile Mwami Leza wangu zyalo.”

¹⁴ Naakalibonya, mwami Ahabu wakamubuzya kuti, “Mikaiya, sena mwami Jehosyafati ambebo tuunke kuyoolwana Lamotigiliyadi naa pe?”

Mikaiya wakati, “Kamuya muyoozunda, nkaambo Mwami Leza wamuzundya kale.”

¹⁵ Pele Ahabu wakaingula kuti, “Ino nkukonkye ziindi zyongaye kuti undaambile zyakasimpe muzina lya Mwami Leza?”

¹⁶ Mikaiya wakaingula kuti, “Ndabona Baisilayeli boonse kabamwaikizyenye muzilundu mbubonya mbuli mbelele zitakwe mweembezi. Nkabela Mwami Leza waamba kuti, ‘Aaba bantu tabajisi musololi. Ababweede buyo kumaanda aabo muluumuno.’”

¹⁷ Mpoonya Ahabu wakati kuli Jehosyafati, “Tee ndakwaambila kuti muntu ooyu lyoonse taakwe nasinsima zibotu kulindime, ccita zibi buyo!”

¹⁸ Mikaiya wakaindilizya akuti, “Lino swiilila nzyaamba Mwami Leza! Ndakabona Mwami Leza kakkede acuuno cakwe cabwami kujulu, abakujulu kabaimvwi munsi lyakwe bamwi kululyo, bamwi kulumwensi.

¹⁹ “Mwami Leza wakabuzya kuti, ‘Ino nguni uunga ulacenga Ahabu mwami wacisi ca Isilayeli kuti ainke kumunzi wa Lamotigiliyadi kuti akafwide nkuko?’ Bamwi babakujulu bakaamba ceeci, alimwi abamwi bakaamba cimbi. ²⁰ Kumane muuya umwi wakasika ku Mwami Leza akwaamba kuti, ‘Ndiyoomucenga mebo!’ Mpawo Mwami Leza wakabuzya kuti, ‘Ino uyoomucenga buti?’ ²¹ Muuya ooyo wakaingula kuti, ‘Ndilainka ndikacite basinsimi ba Ahabu boonse kuti bakaambe zyakubeja.’ Eelyo Mwami Leza wakati, ‘Ulakonzya, koya ukamucenge.’”

²² Mpawo Mikaiya wakati, “Ncenciceeci basinsimi bako aaba ncibakuunina. Pele Mwami Leza ukubambilide penzi ncobeni!”

²³ Mpoonya aawo Zedekiya wakainkila Mikaiya, waakumuuma lubayi wati, “Ino muuya wa Leza, waza buti kuti uzooambile nduwe?”

²⁴ Mikaiya wakati, “Uyoolibonena buzuba oobo mboyooyuba muŋanda yamukati.”

²⁵ Mpoonya mwami Ahabu wakalailila umwi wabalupati-pati bakwe kuti, “Tola Mikaiya kuli Amoni mweendelezi wamunzi alimwi akuli Jowasyi mwanaa mwami. ²⁶ Ukabaambile kuti bamubikke muntolongo kabamusanina buyo cinkwa amaanzi mane kusikila nkaboole kunkondo.” ²⁷ Pele Mikaiya wakamwaambila kuti, “Kuti naa ukaboole koli muumi, Mwami Leza taambauli kwiindila mulindime.” Alimwi wakaindilizya akuti, “Kamuziyeeyede nyoonse nobantu eezi nzindaamba!”

Lufu lwa Ahabu

²⁸ Lino mwami Ahabu wa Isilayeli amwami Jehosyafati wa Juda bakainka kukulwana Lamotigiliyadi.

²⁹ Lino Ahabu wakaambila Jehosyafati kuti, “Ndilalwana cakutalizibya, pele yebo kosamide jansi lyabwami.” Aboobo mwami wa Isilayeli wakalwana katalizibyi.

³⁰ Lino mwami waku Alamu wakalailila bapati babeenzya nkalaki kuti batakalwani kufumbwa bunamuntu ccita buyo mwami wa Isilayeli. ³¹ Lino aabo nibakabona Jehosyafati, bakayeeya kuti ngomwami wa Isilayeli, nkabela bakamuunkila kuti bakamulwane pele Jehosyafati wakakwemba, aawo Mwami Leza wakamugwasya. Leza wakabatantamuna kuzwa kulinguwe.

³² Lino basinkalaki nibakabona kuti tali ngomwami wa Isilayeli bakaleka kumutandaanya. ³³ Pele umwi sinkondo wa Baalamu wakawaala muvwi wakwe ciwaale-waale akuyooyasa mwami Ahabu aaswaanganina zikwabilizyo zyamubili. Nkabela mwami wakati kuli uumweenzya munkalaki, “Bandiyasa! Nyonena ambali tuleke kulwana.”

³⁴ Buzuba boonse oobo nkondo yakali kubbebba, walo mwami Ahabu bakalimukkazikide munkalaki kalangide Baalamu mane kusikila kumangolezya. Lino kumabbililo aazuba wakafwa.